ਪਾਰਟੀ ਦਾ ‘ਤੀਰ ਕਮਾਨ’ ਚਿੰਨ੍ਹ ਚੋਰੀ, ਚੋਰ ਨੂੰ ਸਬਕ ਸਿਖਾਉਣ ਦੀ ਲੋੜ : ਊਧਵ

ਮੁੰਬਈ-ਚੋਣ ਕਮਿਸ਼ਨ ਨੇ ਸ਼ੁੱਕਰਵਾਰ ਨੂੰ ‘ਸ਼ਿਵ ਸੈਨਾ’ ਨਾਮ ਅਤੇ ‘ਤੀਰ-ਕਮਾਨ’ ਚਿੰਨ੍ਹ ਸ਼ਿੰਦੇ ਦੀ ਅਗਵਾਈ ਵਾਲੇ ਖੇਮੇ ਨੂੰ ਅਲਾਟ ਕਰ ਦਿੱਤਾ। ਸ਼ਿਵ ਸੈਨਾ ਮੁਖੀ ਊਧਵ ਠਾਕਰੇ ਨੇ ਸ਼ਨੀਵਾਰ ਨੂੰ ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ‘ਤੇ ਨਿਸ਼ਾਨਾ ਵਿੰਨ੍ਹਦੇ ਹੋਏ ਆਪਣੇ ਸਮਰਥਕਾਂ ਨੂੰ ਕਿਹਾ ਕਿ ਪਾਰਟੀ ਦਾ ‘ਤੀਰ-ਕਮਾਨ’ ਦਾ ਚਿੰਨ੍ਹ ਚੋਰੀ ਹੋ ਗਿਆ ਹੈ ਅਤੇ ਚੋਰ ਨੂੰ ਸਬਕ ਸਿਖਾਉਣ ਦੀ ਲੋੜ ਹੈ। ਊਧਵ ਪਾਰਟੀ ਆਗੂਆਂ ਨਾਲ ਮੀਟਿੰਗ ਦੀ ਪ੍ਰਧਾਨਗੀ ਕਰਨ ਤੋਂ ਪਹਿਲਾਂ ਇੱਥੇ ਬਾਂਦਰਾ ਸਥਿਤ ਆਪਣੀ ਰਿਹਾਇਸ਼ ‘ਮਾਤੋਸ਼੍ਰੀ’ ਦੇ ਬਾਹਰ ਸਮਰਥਕਾਂ ਨੂੰ ਸੰਬੋਧਨ ਕਰ ਰਹੇ ਸਨ।
ਇਹ ਪਹਿਲੀ ਵਾਰ ਹੈ ਜਦੋਂ ਠਾਕਰੇ ਪਰਿਵਾਰ ਨੇ ਪਾਰਟੀ ਤੋਂ ਆਪਣਾ ਕੰਟਰੋਲ ਗੁਆ ਦਿੱਤਾ ਹੈ, ਜਿਸ ਦੀ ਸਥਾਪਨਾ ਬਾਲ ਠਾਕਰੇ ਨੇ 1966 ‘ਚ ਕੀਤੀ ਸੀ। ਊਧਵ ਨੇ ਕਿਹਾ ਕਿ ਤੀਰ-ਕਮਾਨ ਚਿੰਨ੍ਹ ਚੋਰੀ ਗਿਆ ਹੈ। ਚੋਰ ਨੂੰ ਸਬਕ ਸਿਖਾਉਣ ਦੀ ਲੋੜ ਹੈ। ਉਹ ਫੜੇ ਗਏ ਹਨ। ਮੈਂ ਚੋਰ ਨੂੰ ਤੀਰ-ਕਮਾਨ ਨਾਲ ਮੈਦਾਨ ‘ਚ ਆਉਣ ਦੀ ਚੁਣੌਤੀ ਦਿੰਦਾ ਹਾਂ ਅਤੇ ਅਸੀਂ ਮਸ਼ਾਲ ਨਾਲ ਇਸ ਦਾ ਮੁਕਾਬਲਾ ਕਰਾਂਗੇ। ਜ਼ਿਕਰਯੋਗ ਹੈ ਕਿ ਚੋਣ ਕਮਿਸ਼ਨ ਨੇ ਪਿਛਲੇ ਸਾਲ ਊਧਵ ਦੀ ਅਗਵਾਈ ਵਾਲੇ ਖੇਮੇ ਨੂੰ ਮਸ਼ਾਲ ਦਾ ਚੋਣ ਨਿਸ਼ਾਨ ਅਲਾਟ ਕੀਤਾ ਸੀ। ਵੱਡੀ ਗਿਣਤੀ ‘ਚ ਊਧਵ ਦੇ ਸਮਰਥਕ ਮਾਤੋਸ਼੍ਰੀ ਦੇ ਬਾਹਰ ਇਕੱਠੇ ਹੋਏ ਅਤੇ ਸ਼ਿੰਦੇ ਦੇ ਖਿਲਾਫ ਅਤੇ ਆਪਣੇ ਨੇਤਾ (ਊਧਵ) ਦੇ ਸਮਰਥਨ ‘ਚ ਨਾਅਰੇਬਾਜ਼ੀ ਕੀਤੀ।