ਜੈਸ਼ੰਕਰ ਨੇ ਡੇਮੇਕੇ ਹਸਨ ਨਾਲ ਕੀਤੀ ਮੁਲਾਕਾਤ

ਅਦੀਸ ਅਬਾਬਾ-ਇਥੋਪੀਆ ਦੀ ਰਾਜਧਾਨੀ ਦੇ ਸੰਖੇਪ ਦੌਰੇ ਦੌਰਾਨ ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨੇ ਉਥੋਂ ਦੇ ਉਪ ਪ੍ਰਧਾਨ ਮੰਤਰੀ ਅਤੇ ਵਿਦੇਸ਼ ਮੰਤਰੀ ਡੇਮੇਕੇ ਮੇਕੋਨੇਨ ਹਸਨ ਨਾਲ ਗੱਲਬਾਤ ਕੀਤੀ। ਡਾਕਟਰ ਜੈਸ਼ੰਕਰ ਨੇ ਟਵੀਟ ਕੀਤਾ ਕਿ ਉਨ੍ਹਾਂ ਦੀ ਇਥੋਪੀਆ ਦੇ ਵਿਦੇਸ਼ ਮੰਤਰੀ ਨਾਲ ਚੰਗੀ ਮੁਲਾਕਾਤ ਹੋਈ, ਜਿਸ ਦੌਰਾਨ ਉਨ੍ਹਾਂ ਨੇ ਬਹੁਪੱਖੀ ਸਹਿਯੋਗ ‘ਤੇ ਵਿਚਾਰ ਸਾਂਝੇ ਕੀਤੇ। ਉਨ੍ਹਾਂ ਕਿਹਾ ਕਿ ਅਦੀਸ ਅਬਾਬਾ ਦੀ ਸੰਖੇਪ ਫੇਰੀ ਦੌਰਾਨ ਡੇਮੇਕੇ ਹਸਨ ਨਾਲ ਬੈਠਕ ਹੋਈ।
ਉਨ੍ਹਾਂ ਕਿਹਾ ਕਿ ਖੇਤਰ ਦੇ ਵਿਕਾਸ ‘ਤੇ ਉਨ੍ਹਾਂ ਦੇ ਦ੍ਰਿਸ਼ਟੀਕੋਣ ਦਾ ਸੁਆਗਤ ਕਰਦੇ ਹੋਏ ਅਫਰੀਕੀ ਸੰਘ ਅਤੇ ਸੰਯੁਕਤ ਰਾਸ਼ਟਰ ਸਮੇਤ ਮਜ਼ਬੂਤ ​​ਬਹੁਪੱਖੀ ਸਹਿਯੋਗ ‘ਤੇ ਵੀ ਵਿਚਾਰ ਸਾਂਝੇ ਕੀਤੇ ਗਏ। ਵਿਦੇਸ਼ ਮੰਤਰੀ ਆਪਣੇ ਦੋ ਦੇਸ਼ਾਂ ਦੇ ਅਧਿਕਾਰਤ ਦੌਰੇ ਦੇ ਦੂਜੇ ਪੜਾਅ ‘ਤੇ ਮੋਜ਼ਾਮਬੀਕ ਦੇ ਰਸਤੇ ‘ਤੇ ਅਦੀਸ ਅਬਾਬਾ ਰੁਕੇ ਹਨ। ਇਸ ਤੋਂ ਪਹਿਲਾਂ ਉਹ ਯੂਗਾਂਡਾ ਗਏ ਸਨ। ਉਨ੍ਹਾਂ ਨੇ ਯੂਗਾਂਡਾ ਦੀ ਰਾਜਧਾਨੀ ਕੰਪਾਲਾ ਵਿੱਚ ਭਾਰਤੀ ਭਾਈਚਾਰੇ ਨਾਲ ਗੱਲਬਾਤ ਕੀਤੀ। ਉਨ੍ਹਾਂ ਕਿਹਾ ਕਿ ਯੂਗਾਂਡਾ ਅਤੇ ਭਾਰਤ-ਯੂਗਾਂਡਾ ਸਬੰਧਾਂ ਵਿੱਚ ਭਾਰਤੀ ਭਾਈਚਾਰੇ ਦਾ ਯੋਗਦਾਨ ਸਾਨੂੰ ਸਾਰਿਆਂ ਨੂੰ ਮਾਣ ਮਹਿਸੂਸ ਕਰਾਉਂਦਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਭਾਰਤੀ ਭਾਈਚਾਰੇ ਵੱਲੋਂ ਮਿਲੇ ਨਿੱਘੇ ਸੁਆਗਤ ਤੋਂ ਬਹੁਤ ਖੁਸ਼ ਹਨ।