ਸ਼ੇਖ ਹਸੀਨਾ ਮੁੜ ਬਣੀ ਪਾਰਟੀ ਪ੍ਰਧਾਨ

ਢਾਕਾ-ਬੰਗਲਾਦੇਸ਼ ਦੀ ਸੱਤਾਧਾਰੀ ਪਾਰਟੀ ਅਵਾਮੀ ਲੀਗ ਨੇ 2024 ਵਿੱਚ ਹੋਣ ਵਾਲੀਆਂ ਆਮ ਚੋਣਾਂ ਦੇ ਮੱਦੇਨਜ਼ਰ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਨੂੰ ਮੁੜ ਪਾਰਟੀ ਮੁਖੀ ਚੁਣ ਲਿਆ। ਉਹ ਲਗਾਤਾਰ 10ਵੀਂ ਵਾਰ ਪਾਰਟੀ ਪ੍ਰਧਾਨ ਚੁਣੀ ਗਈ ਹੈ, ਜਦੋਂ ਕਿ ਓਬੈਦੁਲ ਕਾਦਿਰ ਨੂੰ ਜਨਰਲ ਸਕੱਤਰ ਚੁਣਿਆ ਗਿਆ ਹੈ। ਇਸ ਪਾਰਟੀ ਦੀ ਉਮਰ 73 ਸਾਲ ਹੈ ਅਤੇ ਇਸ ਨੇ 1971 ਵਿਚ ਪਾਕਿਸਤਾਨ ਵਿਰੁੱਧ ਦੇਸ਼ ਦੀ ਆਜ਼ਾਦੀ ਦੀ ਲੜਾਈ ਦੀ ਅਗਵਾਈ ਕੀਤੀ ਸੀ। ਪਾਰਟੀ ਨੇ ਬੰਦ ਦਰਵਾਜ਼ਿਆਂ ਪਿੱਛੇ ਹਸੀਨਾ ਨੂੰ ਆਪਣੀ ਚੋਟੀ ਦੀ ਲੀਡਰਸ਼ਿਪ ਵਜੋਂ ਦੁਬਾਰਾ ਚੁਣਿਆ। ਕੇਂਦਰੀ ਢਾਕਾ ਦੇ ਇੱਕ ਆਡੀਟੋਰੀਅਮ ਵਿੱਚ ਆਯੋਜਿਤ ਅਵਾਮੀ ਲੀਗ ਦੀ 22ਵੀਂ ਰਾਸ਼ਟਰੀ ਕੌਂਸਲ ਵਿੱਚ ਦੇਸ਼ ਭਰ ਤੋਂ ਲਗਭਗ 7,000 ਕੌਂਸਲਰਾਂ ਨੇ ਸ਼ਿਰਕਤ ਕੀਤੀ। ਇਸ ਤੋਂ ਪਹਿਲਾਂ ਇੱਥੋਂ ਨੇੜਲੇ ਸੁਹਰਾਵਰਦੀ ਉਦਾਨ ਵਿੱਚ ਖੁੱਲ੍ਹੀ ਰੈਲੀ ਕੀਤੀ ਗਈ। ਪਾਰਟੀ ਦੇ ਸੰਵਿਧਾਨ ਤਹਿਤ ਨਵੀਂ ਲੀਡਰਸ਼ਿਪ ਅਗਲੇ ਤਿੰਨ ਸਾਲਾਂ ਲਈ ਪਾਰਟੀ ਦੀ ਅਗਵਾਈ ਕਰੇਗੀ।
75 ਸਾਲਾ ਹਸੀਨਾ 1981 ਤੋਂ ਭਾਰਤ ਤੋਂ ਬੰਗਲਾਦੇਸ਼ ਪਰਤਣ ਤੋਂ ਬਾਅਦ ਉਦਾਰਵਾਦੀ ਪਾਰਟੀ ਦੀ ਪ੍ਰਧਾਨ ਰਹੀ ਹੈ। ਹਸੀਨਾ 1975 ਵਿੱਚ ਆਪਣੀ ਖੁਦ ਦੀ ਜਲਾਵਤਨੀ ਤੋਂ ਬਾਅਦ ਭਾਰਤ ਵਿੱਚ ਰਹਿ ਰਹੀ ਸੀ। ਹਸੀਨਾ ਦੇ ਪਿਤਾ ਬੰਗਬਹਾਦੁਰ ਸ਼ੇਖ ਮੁਜੀਬੁਰ ਰਹਿਮਾਨ, ਬੰਗਲਾਦੇਸ਼ ਦੇ ਸੰਸਥਾਪਕ, ਨੂੰ 15 ਅਗਸਤ, 1975 ਨੂੰ ਉਸਦੇ ਪਰਿਵਾਰ ਦੇ ਜ਼ਿਆਦਾਤਰ ਮੈਂਬਰਾਂ ਸਮੇਤ ਕਤਲ ਕਰ ਦਿੱਤਾ ਗਿਆ ਸੀ। ਆਜ਼ਾਦੀ ਤੋਂ ਬਾਅਦ, ਉਸ ਦੀ ਅਵਾਮੀ ਲੀਗ ਦੀ ਅਗਵਾਈ ਵਾਲੀ ਸਰਕਾਰ ਨੂੰ ਉਸ ਦਿਨ ਡੇਗ ਦਿੱਤਾ ਗਿਆ ਜਦੋਂ ਹਸੀਨਾ ਅਤੇ ਉਸ ਦੀ ਛੋਟੀ ਭੈਣ ਸ਼ੇਖ ਰੇਹਾਨਾ ਇੱਕ ਸੰਖੇਪ ਦੌਰੇ ’ਤੇ ਜਰਮਨੀ ਵਿੱਚ ਸਨ। ਇਸ ਤੋਂ ਬਾਅਦ ਦੋਵੇਂ ਭੈਣਾਂ ਨੇ ਭਾਰਤ ਵਿਚ ਸ਼ਰਨ ਲੈ ਲਈ।
ਪਾਰਟੀ ਸੂਤਰਾਂ ਮੁਤਾਬਕ ਅਵਾਮੀ ਲੀਗ ਦੇ ਸੀਨੀਅਰ ਨੇਤਾ ਅਮੀਰ ਹੁਸੈਨ ਅਮੂ ਨੇ ਸ਼ਨੀਵਾਰ ਨੂੰ ਕੌਂਸਲ ਸੈਸ਼ਨ ’ਚ ਪਾਰਟੀ ਪ੍ਰਧਾਨ ਦੇ ਅਹੁਦੇ ਲਈ ਹਸੀਨਾ ਦੇ ਨਾਂ ਦਾ ਪ੍ਰਸਤਾਵ ਰੱਖਿਆ, ਜਿਸ ਨੂੰ ਇਕ ਹੋਰ ਕੌਂਸਲਰ ਨੇ ਸਮਰਥਨ ਦਿੱਤਾ। ਅਵਾਮੀ ਲੀਗ ਦੇ ਨੇਤਾ ਸਾਧਨ ਚੰਦਰ ਮਜ਼ੂਮਦਾਰ ਨੇ ਜਨਰਲ ਸਕੱਤਰ ਦੇ ਅਹੁਦੇ ਲਈ ਓਬੈਦੁਲ ਕਾਦਿਰ ਦੇ ਨਾਂ ਦਾ ਪ੍ਰਸਤਾਵ ਰੱਖਿਆ ਅਤੇ ਫੈਸਲੇ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ। ਇਸ ਤੋਂ ਪਹਿਲਾਂ, ਹਸੀਨਾ ਨੇ ਰਾਸ਼ਟਰੀ ਝੰਡਾ ਲਹਿਰਾ ਕੇ ਅਤੇ ਕਬੂਤਰ-ਗੁਬਾਰੇ ਛੱਡ ਕੇ ਕੌਂਸਲ ਦਾ ਉਦਘਾਟਨ ਕੀਤਾ। ਪਾਰਟੀ ਲੀਡਰਸ਼ਿਪ ਦੀ ਚੋਣ ਲਈ ਤਿੰਨ ਮੈਂਬਰੀ ਕਮਿਸ਼ਨ ਦਾ ਗਠਨ ਕੀਤਾ ਗਿਆ ਸੀ। ਅਵਾਮੀ ਲੀਗ ਦੇ ਪਹਿਲੇ ਪ੍ਰਧਾਨ ਮੌਲਾਨਾ ਅਬਦੁਲ ਹਾਮਿਦ ਭਾਸਾਨੀ ਸਨ ਅਤੇ ਬੰਗਬੰਧੂ ਸਮੇਤ ਅੱਠ ਹੋਰ ਲੋਕਾਂ ਨੇ ਉਸਦਾ ਅਨੁਸਰਣ ਕੀਤਾ।