ਪਤਨੀ ਸ਼ਰਾਬ ਪੀ ਕੇ ਤੰਗ ਕਰੇ ਤਾਂ ਪਤੀ ਲੈ ਸਕਦਾ ਤਲਾਕ-ਹਾਈਕੋਰਟ

ਬਿਲਾਸਪੁਰ-ਛੱਤੀਸਗੜ੍ਹ ਦੀ ਬਿਲਾਸਪੁਰ ਹਾਈ ਕੋਰਟ ਨੇ ਤਲਾਕ ਸਬੰਧੀ ਆਪਣੇ ਇੱਕ ਅਹਿਮ ਫੈਸਲੇ ਵਿੱਚ ਕਿਹਾ ਹੈ ਕਿ ਜੇਕਰ ਕੋਈ ਪਤਨੀ ਆਪਣੇ ਪਤੀ ਨੂੰ ਮਰਦਾਂ ਵਾਂਗ ਪਾਨ ਮਸਾਲਾ, ਗੁਟਖਾ ਅਤੇ ਸ਼ਰਾਬ ਦੇ ਨਾਲ ਮਾਸ ਖਾ ਕੇ ਤੰਗ ਕਰਦੀ ਹੈ ਤਾਂ ਇਹ ਬੇਰਹਿਮੀ ਹੈ। ਬਿਲਾਸਪੁਰ ਹਾਈ ਕੋਰਟ ਦੇ ਜਸਟਿਸ ਗੌਤਮ ਭਾਦੁੜੀ ਅਤੇ ਜਸਟਿਸ ਰਾਧਾਕਿਸ਼ਨ ਅਗਰਵਾਲ ਦੀ ਡਬਲ ਬੈਂਚ ਨੇ ਇਨ੍ਹਾਂ ਆਧਾਰਾਂ ‘ਤੇ ਪਤੀ ਨੂੰ ਤਲਾਕ ਲੈਣ ਦਾ ਹੱਕਦਾਰ ਕਰਾਰ ਦਿੱਤਾ ਹੈ।
ਦਰਅਸਲ, ਕੋਰਬਾ ਜ਼ਿਲੇ ਦੇ ਬਾਂਕੀਮੋਂਗੜਾ ਦੇ ਰਹਿਣ ਵਾਲੇ ਇਕ ਨੌਜਵਾਨ ਦਾ ਵਿਆਹ ਕਟਘੋਰਾ ਦੀ ਇਕ ਲੜਕੀ ਨਾਲ ਹੋਇਆ ਸੀ। ਵਿਆਹ ਦੇ ਸੱਤ ਦਿਨ ਬਾਅਦ 26 ਮਈ 2015 ਦੀ ਸਵੇਰ ਨੂੰ ਉਸ ਦੀ ਪਤਨੀ ਬਿਸਤਰ ‘ਤੇ ਬੇਹੋਸ਼ ਪਈ ਸੀ। ਜਦੋਂ ਪਤੀ ਉਸ ਨੂੰ ਇਲਾਜ ਲਈ ਲੈ ਕੇ ਗਿਆ ਤਾਂ ਪਤਾ ਲੱਗਾ ਕਿ ਉਹ ਸ਼ਰਾਬ ਪੀਣ ਦੇ ਨਾਲ-ਨਾਲ ਨਾਨ-ਵੈਜ ਅਤੇ ਗੁਟਕੇ ਦਾ ਆਦੀ ਹੈ। ਰਿਸ਼ਤੇਦਾਰਾਂ ਨੇ ਇਸ ਬਾਰੇ ਉਸ ਨੂੰ ਸਮਝਾਇਆ। ਇਸ ਤੋਂ ਬਾਅਦ ਵੀ ਉਹ ਨਾ ਮੰਨੀ ਅਤੇ ਪਤਨੀ ਨੇ ਆਪਣੇ ਸਹੁਰੇ ਨਾਲ ਬਦਸਲੂਕੀ ਕਰਨੀ ਸ਼ੁਰੂ ਕਰ ਦਿੱਤੀ।
ਪਟੀਸ਼ਨ ‘ਚ ਦੱਸਿਆ ਗਿਆ ਸੀ ਕਿ ਔਰਤ ਗੁਟਖਾ ਖਾ ਕੇ ਬੈੱਡਰੂਮ ‘ਚ ਕਿਤੇ ਵੀ ਥੁੱਕਦੀ ਸੀ ਅਤੇ ਨਾਂਹ ਕਰਨ ‘ਤੇ ਲੜਾਈ-ਝਗੜਾ ਕਰਦੀ ਸੀ।ਅੌਰਤ ਨੇ 30 ਦਸੰਬਰ 2015 ਨੂੰ ਖੁਦ ਨੂੰ ਅੱਗ ਲਗਾ ਕੇ ਖੁਦਕੁਸ਼ੀ ਦੀ ਕੋਸ਼ਿਸ਼ ਵੀ ਕੀਤੀ ਸੀ। ਇੰਨਾ ਹੀ ਨਹੀਂ ਉਸ ਨੇ ਦੋ ਵਾਰ ਛੱਤ ਤੋਂ ਛਾਲ ਮਾਰ ਕੇ ਅਤੇ ਫਿਰ ਦੋ ਵਾਰ ਕੀਟਨਾਸ਼ਕ ਪੀ ਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਕੀਤੀ। ਪਤਨੀ ਦੀਆਂ ਹਰਕਤਾਂ ਤੋਂ ਤੰਗ ਆ ਕੇ ਪਤੀ ਨੇ ਕੋਰਬਾ ਦੀ ਫੈਮਿਲੀ ਕੋਰਟ ‘ਚ ਤਲਾਕ ਲਈ ਪਟੀਸ਼ਨ ਦਾਇਰ ਕੀਤੀ ਪਰ ਫੈਮਿਲੀ ਕੋਰਟ ਨੇ ਪਤੀ ਦੀ ਪਟੀਸ਼ਨ ਨੂੰ ਇਹ ਕਹਿੰਦੇ ਹੋਏ ਰੱਦ ਕਰ ਦਿੱਤਾ ਕਿ ਇਹ ਉਸ ਦੀ ਨਿੱਜਤਾ ਹੈ। ਪਤੀ ਨੇ ਇਸ ਫੈਸਲੇ ਖਿਲਾਫ ਹਾਈਕੋਰਟ ‘ਚ ਅਪੀਲ ਕੀਤੀ ਸੀ। ਹਾਈ ਕੋਰਟ ਦੇ ਡਬਲ ਬੈਂਚ ਨੇ ਫੈਮਿਲੀ ਕੋਰਟ ਦੇ ਹੁਕਮਾਂ ਨੂੰ ਰੱਦ ਕਰਦਿਆਂ ਪਤੀ ਦੀ ਤਲਾਕ ਦੀ ਅਪੀਲ ਨੂੰ ਸਵੀਕਾਰ ਕਰਦਿਆਂ ਇਸ ਨੂੰ ਪਤਨੀ ਵੱਲੋਂ ਤੰਗ ਪ੍ਰੇਸ਼ਾਨ ਦੱਸਿਆ।