ਆਈਐਮਐਫ ਦੀਆਂ ਸ਼ਰਤਾਂ ਨੂੰ ਮੰਨਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ-ਸ਼ਾਹਬਾਜ਼

ਇਸਲਾਮਾਬਾਦ-ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਬਾਜ਼ ਸ਼ਰੀਫ ਨੇ ਮੰਨਿਆ ਹੈ ਕਿ ਅੰਤਰਰਾਸ਼ਟਰੀ ਮੁਦਰਾ ਫੰਡ (ਆਈਐਮਐਫ) ਨੇ 1.2 ਬਿਲੀਅਨ ਡਾਲਰ ਦੇ ਕਰਜ਼ੇ ਦੀ ਤੀਜੀ ਕਿਸ਼ਤ ਦੇਣ ਲਈ ਬਹੁਤ ਸਖ਼ਤ ਸ਼ਰਤਾਂ ਰੱਖੀਆਂ ਹਨ। ਸ਼ਰੀਫ ਨੇ ਕਿਹਾ- IMF ਵੱਲੋਂ ਜੋ ਸ਼ਰਤਾਂ ਤੈਅ ਕੀਤੀਆਂ ਗਈਆਂ ਹਨ, ਉਹ ਉਸ ਤੋਂ ਜ਼ਿਆਦਾ ਸਖ਼ਤ ਅਤੇ ਖਤਰਨਾਕ ਹਨ, ਜਿੰਨਾ ਅਸੀਂ ਸੋਚਿਆ ਸੀ, ਪਰ ਕੀ ਕਰੀਏ, ਸਾਡੇ ਕੋਲ ਹੋਰ ਕੋਈ ਵਿਕਲਪ ਨਹੀਂ ਹੈ। ਸ਼ਰੀਫ ਨੇ ਇਕ ਟੀਵੀ ਚੈਨਲ ‘ਤੇ ਕਿਹਾ, ਸਾਡੀ ਅਰਥਵਿਵਸਥਾ ਦੀ ਹਾਲਤ ਕਲਪਨਾ ਤੋਂ ਬਾਹਰ ਹੈ। ਆਈਐਮਐਫ ਨੇ ਕਰਜ਼ੇ ਲਈ ਬਹੁਤ ਸਖ਼ਤ ਸ਼ਰਤਾਂ ਰੱਖੀਆਂ ਹਨ, ਪਰ ਸਾਡੇ ਕੋਲ ਉਨ੍ਹਾਂ ਨੂੰ ਸਵੀਕਾਰ ਕਰਨ ਤੋਂ ਇਲਾਵਾ ਹੋਰ ਕੋਈ ਰਸਤਾ ਨਹੀਂ ਹੈ। ਸ਼ਰੀਫ਼ ਦੇ ਬਿਆਨ ਦਾ ਸਮਾਂ ਅਹਿਮ ਹੈ। IMF ਦੀ ਟੀਮ 31 ਜਨਵਰੀ ਨੂੰ ਇਸਲਾਮਾਬਾਦ ਪਹੁੰਚੀ ਅਤੇ 9 ਫਰਵਰੀ ਤੱਕ ਉਥੇ ਰਹੇਗੀ। ਲੋਨ ਦੀ ਕਿਸ਼ਤ ਜਾਰੀ ਕਰਨ ਤੋਂ ਪਹਿਲਾਂ IMF ਕਈ ਸ਼ਰਤਾਂ ਪੂਰੀਆਂ ਕਰਨਾ ਚਾਹੁੰਦਾ ਹੈ।
ਦੱਸ ਦੇਈਏ ਕਿ ਫੋਰੈਕਸ ਰਿਜ਼ਰਵ ‘ਚ ਸਿਰਫ 3.1 ਅਰਬ ਡਾਲਰ ਬਚਿਆ ਹੈ। ਇਸ ਵਿੱਚੋਂ 3 ਬਿਲੀਅਨ ਡਾਲਰ ਸਾਊਦੀ ਅਰਬ ਅਤੇ ਯੂਏਈ ਦੇ ਹਨ। ਇਹ ਗਾਰੰਟੀਸ਼ੁਦਾ ਡਿਪਾਜ਼ਿਟ ਹਨ, ਜਿਸਦਾ ਮਤਲਬ ਹੈ ਕਿ ਇਹਨਾਂ ਨੂੰ ਖਰਚਿਆ ਨਹੀਂ ਜਾ ਸਕਦਾ। ਪਾਕਿਸਤਾਨ ‘ਚ ਵੀਰਵਾਰ ਨੂੰ ਮਹਿੰਗਾਈ ਦਰ ਵਧ ਕੇ 27.8 ਫੀਸਦੀ ਹੋ ਗਈ। ਸਤੰਬਰ 2022 ਵਿੱਚ ਵਿਦੇਸ਼ੀ ਕਰਜ਼ਾ 130.2 ਬਿਲੀਅਨ ਡਾਲਰ ਸੀ। ਇਸ ਤੋਂ ਬਾਅਦ ਡਾਟਾ ਜਾਰੀ ਨਹੀਂ ਕੀਤਾ ਗਿਆ। ਡਾਲਰ ਦੇ ਮੁਕਾਬਲੇ ਰੁਪਿਆ (ਪਾਕਿਸਤਾਨੀ ਕਰੰਸੀ) 274 ਹੋ ਗਿਆ ਹੈ।