ਉਈਗਰਾਂ ਅੱਤਿਆਚਾਰ ਮਾਮਲੇ ’ਚ ਚੀਨ ਵਿਰੁੱਧ ਪ੍ਰਸਤਾਵ ਨੂੰ ਰੱਦ

ਬੀਜਿੰਗ-ਉਈਗਰ ਮੁਸਲਮਾਨਾਂ ‘ਤੇ ਅੱਤਿਆਚਾਰਾਂ ਦੇ ਮੁੱਦੇ ‘ਤੇ ਸੰਯੁਕਤ ਰਾਸ਼ਟਰ ਮਨੁੱਖੀ ਅਧਿਕਾਰ ਪ੍ਰੀਸ਼ਦ (ਯੂ.ਐੱਨ.ਐੱਚ.ਆਰ.ਸੀ.) ‘ਚ ਚੀਨ ਵਿਰੁੱਧ ਪੇਸ਼ ਪ੍ਰਸਤਾਵ ਨੂੰ ਰੱਦ ਕਰ ਦਿੱਤਾ ਗਿਆ। ਇਸ ਦੌਰਾਨ, ਸੰਯੁਕਤ ਰਾਸ਼ਟਰ ਦੀ ਮਨੁੱਖੀ ਅਧਿਕਾਰ ਸੰਸਥਾ ਨੇ ਸ਼ੁੱਕਰਵਾਰ ਨੂੰ ਰੂਸ ਦੇ ਮਨੁੱਖੀ ਅਧਿਕਾਰਾਂ ਦੇ ਰਿਕਾਰਡ ਦੀ ਜਾਂਚ ਵਿੱਚ ਤੇਜ਼ੀ ਲਿਆਉਣ ਲਈ ਇੱਕ ਸੁਤੰਤਰ ਮਾਹਰ ਦੀ ਨਿਯੁਕਤੀ ਲਈ ਵੋਟ ਦਿੱਤੀ। ਯੂ.ਐੱਨ.ਐੱਚ.ਆਰ.ਸੀ. ਦੇ 47 ਮੈਂਬਰ ਹਨ। ਇਸ ਚੀਨ ਵਿਰੋਧੀ ਪ੍ਰਸਤਾਵ ਦੇ ਡਿੱਗਣ ਨਾਲ ਕਈ ਮੁਸਲਿਮ ਦੇਸ਼ਾਂ ‘ਤੇ ਵੱਡਾ ਸਵਾਲ ਖੜ੍ਹਾ ਹੋ ਗਿਆ ਹੈ।
ਦਰਅਸਲ, ਚੀਨ ਦੇ ਸ਼ਿਨਜਿਆਂਗ ਸੂਬੇ ਵਿੱਚ ਉਈਗਰ ਮੁਸਲਮਾਨਾਂ ਦੇ ਮਨੁੱਖੀ ਅਧਿਕਾਰਾਂ ਦੇ ਉਲੰਘਣ ‘ਤੇ ਬਹਿਸ ਕਰਨ ਲਈ ਵੀਰਵਾਰ ਨੂੰ ਯੂਐਨਐਚਆਰਸੀ ਵਿੱਚ ਇੱਕ ਪ੍ਰਸਤਾਵ ਪੇਸ਼ ਕੀਤਾ ਗਿਆ ਸੀ, ਜੋ ਕਿ ਖਤਮ ਹੋ ਗਿਆ। ਜੇਕਰ ਇਹ ਮਤਾ ਪਾਸ ਹੋ ਜਾਂਦਾ ਤਾਂ ਮਾਰਚ ਵਿਚ ਹੋਣ ਵਾਲੇ ਅਗਲੇ ਸੈਸ਼ਨ ਵਿਚ ਉਈਗਰ ਮੁਸਲਮਾਨਾਂ ਦੇ ਮਨੁੱਖੀ ਅਧਿਕਾਰਾਂ ਦੇ ਉਲੰਘਣ ‘ਤੇ ਬਹਿਸ ਹੋਣੀ ਸੀ ਪਰ 47 ਮੈਂਬਰੀ ਕੌਂਸਲ ਵਿਚ 17 ਦੇਸ਼ਾਂ ਨੇ ਮਤੇ ਦੇ ਸਮਰਥਨ ਵਿਚ ਵੋਟਾਂ ਪਾਈਆਂ ਜਦਕਿ 19 ਨੇ ਇਸ ਦੇ ਵਿਰੋਧ ਵਿਚ ਵੋਟ ਪਾਈ। ਜਿਨ੍ਹਾਂ 19 ਦੇਸ਼ਾਂ ਨੇ ਇਸ ਮਤੇ ਦੇ ਵਿਰੋਧ ‘ਚ ਚੀਨ ਦੇ ਪੱਖ ‘ਚ ਵੋਟਿੰਗ ਕੀਤੀ, ਉਨ੍ਹਾਂ ‘ਚ ਮੁਸਲਿਮ ਬਹੁਗਿਣਤੀ ਵਾਲੇ ਅਤੇ ਸੋਮਾਲੀਆ ਨੂੰ ਛੱਡ ਕੇ ਸਾਰੇ ਅਫਰੀਕੀ ਦੇਸ਼ ਸ਼ਾਮਲ ਹਨ। ਇਸ ਮਤੇ ਦੇ ਸਮਰਥਨ ‘ਚ ਜਾਪਾਨ ਅਤੇ ਦੱਖਣੀ ਕੋਰੀਆ ਵਰਗੇ ਦੇਸ਼ ਯੂ.ਐੱਨ.ਐੱਚ.ਆਰ.ਸੀ. ‘ਚ ਇਸ ਮਤੇ ‘ਤੇ ਬਹਿਸ ਚਾਹੁੰਦੇ ਸਨ। ਇਸ ਦੇ ਨਾਲ ਹੀ ਭਾਰਤ, ਮਲੇਸ਼ੀਆ, ਮੈਕਸੀਕੋ ਅਤੇ ਯੂਕਰੇਨ ਵਰਗੇ ਦੇਸ਼ਾਂ ਨੇ ਇਸ ਮਤੇ ‘ਤੇ ਵੋਟਿੰਗ ਦੌਰਾਨ ਦੂਰੀ ਬਣਾਈ ਰੱਖੀ ਅਤੇ ਸਦਨ ਤੋਂ ਗੈਰ-ਹਾਜ਼ਰ ਰਹੇ।