22 ਸਾਲ ਬਾਅਦ ਧੋਤਾ ਗਿਆ ਰੇਪ ਦਾ ਕਲੰਕ

ਅਲੀਗੜ੍ਹ–ਇੱਥੇ ਇਕ ਜਬਰ-ਜ਼ਿਨਾਹ ਦਾ ਮਾਮਲਾ ਸਾਹਮਣੇ ਆਇਆ ਹੈ। 22 ਸਾਲ ਪਹਿਲਾਂ 16 ਸਾਲ ਦੀ ਕੁੜੀ ਨਾਲ ਜਬਰ-ਜ਼ਿਨਾਹ ਦੇ 16 ਸਾਲਾ ਦੋਸ਼ੀ ਨੂੰ ਕਿਸ਼ੋਰ ਨਿਆਂ ਬੋਰਡ ਨੇ ਬਰੀ ਕੀਤਾ ਹੈ। ਬੋਰਡ ਦੇ ਸਾਹਮਣੇ ਰੱਖੇ ਗਏ ਸਬੂਤਾਂ ਅਤੇ ਗਵਾਹੀ ’ਚ ਹੋਈ ਜਿਰਹਾਂ ਦੌਰਾਨ ਸਾਬਤ ਹੋਇਆ ਕਿ ਦੋਹਾਂ ਪੱਖਾਂ ਦਰਮਿਆਨ ਜ਼ਮੀਨ ਵਿਵਾਦ ਕਾਰਨ ਇਸ ਮਾਮਲੇ ’ਚ ਉਕਤ ਵਿਅਕਤੀ ਨੂੰ ਘਸੀਟਿਆ ਗਿਆ। ਨੌਜਵਾਨ ’ਤੇ 22 ਸਾਲ ਪਹਿਲਾਂ ਰੇਪ ਦਾ ਦੋਸ਼ ਲਾਇਆ ਗਿਆ ਸੀ । ਇਸ ਤੋਂ ਬਾਅਦ ਸਮਾਜ ’ਚ ਉਸ ਨੂੰ ਬਲਾਤਕਾਰੀ ਕਿਹਾ ਜਾਣ ਲੱਗਾ। ਨੌਜਵਾਨ ਦੁਹਾਈ ਦਿੰਦਾ ਰਿਹਾ ਕਿ ਉਸ ਨੇ ਅਜਿਹਾ ਨਹੀਂ ਕੀਤਾ। ਆਖ਼ਰਕਾਰ ਕਿਸ਼ੋਰ ਨਿਆਂ ਬੋਰਡ ਨੇ ਉਸ ਨੂੰ ਬਰੀ ਕਰ ਦਿੱਤਾ।
2000 ਦਾ ਹੈ ਮਾਮਲਾ-
ਅਲੀਗੜ੍ਹ ’ਚ ਸਾਲ 2000 ’ਚ ਇਕ ਜਬਰ-ਜ਼ਿਨਾਹ ਦਾ ਮਾਮਲਾ ਸਾਹਮਣੇ ਆਇਆ ਸੀ। ਇਸ ’ਚ ਪੀੜਤ ਪੱਖ ਨੇ ਇਕ 16 ਸਾਲ ਦੇ ਨੌਜਵਾਨ ’ਤੇ ਬਲਾਤਕਾਰੀ ਹੋਣ ਦਾ ਦੋਸ਼ ਲਾਇਆ ਸੀ। ਇਸ ਦੋਸ਼ ਮਗਰੋਂ ਨੌਜਵਾਨ ਦੀ ਸਮਾਜ ਅਤੇ ਪਰਿਵਾਰ ’ਚ ਬਦਨਾਮੀ ਹੋਈ। ਉਸ ਨੂੰ ਲੰਬੀ ਕਾਨੂੰਨੀ ਪ੍ਰਕਿਰਿਆ ’ਚੋਂ ਲੰਘਣਾ ਪਿਆ। ਮਾਮਲਾ ਕਿਸ਼ੋਰ ਨਿਆਂ ਬੋਰਡ ’ਚ ਚੱਲਿਆ। ਹੁਣ ਨੌਜਵਾਨ 38 ਸਾਲ ਦਾ ਹੈ। ਉਸ ਨੇ ਕਿਹਾ ਕਿ ਆਖ਼ਰਕਾਰ ਮੈਂ ‘ਬਲਾਤਕਾਰੀ’ ਕਹਾਉਣ ਦੇ ਟੈਗ ਤੋਂ ਮੁਕਤ ਹੋਇਆ। ਮੇਰੇ ’ਤੇ ਇਕ ਅਜਿਹੇ ਅਪਰਾਧ ਦਾ ਦੋਸ਼ ਲਾਇਆ ਗਿਆ ਸੀ, ਜਿਸ ਨੂੰ ਮੈਂ ਕਦੇ ਨਹੀਂ ਕੀਤਾ। ਹੁਣ ਕੋਰਟ ਦਾ  ਆਦੇਸ਼ ਆਉਣ ਮਗਰੋਂ ਹਰ ਕੋਈ ਨੌਜਵਾਨ ਨੂੰ ਬੇਕਸੂਰ ਮੰਨਣ ਲੱਗਾ ਹੈ।
16 ਸਾਲਾ ਨਾਬਾਲਗ ਕੁੜੀ ਨੇ ਲਾਏ ਸਨ ਦੋਸ਼-
ਕਿਸ਼ੋਰ ਨਿਆਂ ਬੋਰਡ ਦੇ ਪ੍ਰਧਾਨ ਮੈਜਿਸਟ੍ਰੇਟ ਨਰੇਸ਼ ਕੁਮਾਰ ਦਿਵਾਕਰ ਅਤੇ ਮੈਂਬਰ ਸਾਧਨਾ ਗੁਪਤਾ ਤੇ ਪ੍ਰਸ਼ਾਂਤ ਸਿੰਘ ਰਾਘਵ ਨੇ ਆਪਣੇ ਆਦੇਸ਼ ’ਚ ਕਿਹਾ ਕਿ ਇਸਤਗਾਸਾ ਪੱਖ ਇਹ ਸਾਬਤ ਕਰਨ ’ਚ ਅਸਫ਼ਲ ਰਿਹਾ ਕਿ ਦੋਸ਼ੀ ਨੇ ਬਲਾਤਕਾਰ ਕੀਤਾ ਸੀ। ਇਸ ਲਈ ਕੋਰਟ ਨੇ ਉਸ ਨੂੰ ਬਰੀ ਕਰ ਦਿੱਤਾ। ਦੋਸ਼ੀ ਦੇ ਵਕੀਲਾਂ ਜੀਸੀ ਸਿਨਹਾ ਅਤੇ ਕੇ. ਕੇ. ਗੌਤਮ ਨੇ ਕਿਹਾ ਕਿ ਉਨ੍ਹਾਂ ਦੇ ਮੁਵਕਿੱਲ ਅਤੇ ਉਸ ਦੇ ਦੋਸਤ iਖ਼ਲਾਫ਼ 26 ਅਗਸਤ 2000 ਨੂੰ ਅਤਰੌਲੀ ਪੁਲਸ ਸਟੇਸ਼ਨ ’ਚ ਗੁਆਂਢ ਦੀ ਇਕ ਨਾਬਾਲਗ ਕੁੜੀ ਨਾਲ ਜਬਰ-ਜ਼ਿਨਾਹ ਕਰਨ ਦੇ ਦੋਸ਼ ’ਚ ਐਫਆਰਆਈ ਦਰਜ ਕੀਤੀ ਗਈ ਸੀ। ਐਫਆਰਆਈ ’ਚ 16 ਸਾਲਾ ਕੁੜੀ ਨੇ ਦੋਸ਼ ਲਾਇਆ ਕਿ ਨਾਬਾਲਗ ਮੁੰਡੇ ਨੇ ਉਸ ਨਾਲ ਜਬਰ-ਜ਼ਿਨਾਹ ਕੀਤਾ। ਕੁੜੀ ਨੇ ਇਹ ਗੱਲ ਆਪਣੇ ਪਰਿਵਾਰ ਨੂੰ ਦੱਸੀ ਤਾਂ ਮੁਕੱਦਮਾ ਦਰਜ ਕਰਵਾਇਆ ਗਿਆ।