2023 ਬਜਟ : ਸ਼੍ਰੀਲੰਕਾ ਫ਼ੌਜ ਦੀ ਗਿਣਤੀ ਅੱਧੀ ਕਰੇਗਾ

ਕੋਲੰਬੋ-ਰੱਖਿਆ ਮੰਤਰਾਲੇ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਕਿ ਸ੍ਰੀਲੰਕਾ ਨੇ ਸ਼ੁੱਕਰਵਾਰ ਨੂੰ ਤਕਨੀਕੀ ਅਤੇ ਰਣਨੀਤਕ ਤੌਰ ‘ਤੇ ਮਜ਼ਬੂਤ ਅਤੇ ਸੰਤੁਲਿਤ ਰੱਖਿਆ ਬਲ ਬਣਾਉਣ ਲਈ 2030 ਤੱਕ ਆਪਣੀ ਮੌਜੂਦਾ ਫ਼ੌਜ ਦੀ ਗਿਣਤੀ ਅੱਧੀ ਕਰਨ ਦੀ ਯੋਜਨਾ ਦਾ ਐਲਾਨ ਕੀਤਾ। ਸ਼੍ਰੀਲੰਕਾ ਸਰਕਾਰ ਨੇ ਇਹ ਕਦਮ 2023 ਦੇ ਬਜਟ ਵਿੱਚ ਸਿਹਤ ਦੇਖਭਾਲ ਅਤੇ ਸਿੱਖਿਆ ਲਈ ਅਲਾਟ ਕੀਤੀ ਰਕਮ ਦੇ ਮੁਕਾਬਲੇ ਫ਼ੌਜੀ ਖਰਚਿਆਂ ਲਈ ਅਲਾਟਮੈਂਟ ਨੂੰ ਲੈ ਕੇ ਆਲੋਚਨਾ ਦੇ ਵਿਚਕਾਰ ਚੁੱਕਿਆ ਹੈ।  ਸਾਲ 2030 ਤੱਕ ਫ਼ੌਜ ਦੀ 200,783 ਦੀ ਮੌਜੂਦਾ ਗਿਣਤੀ ਨੂੰ ਘਟਾ ਕੇ 100,000 ਕਰ ਦਿੱਤਾ ਜਾਵੇਗਾ।
ਮੰਤਰਾਲੇ ਨੇ ਕਿਹਾ ਕਿ ਅਗਲੇ ਸਾਲ ਤੱਕ ਇਹ ਗਿਣਤੀ 135,000 ਤੱਕ ਸੀਮਤ ਕਰ ਦਿੱਤੀ ਜਾਵੇਗੀ। ਰਾਜ ਦੇ ਰੱਖਿਆ ਮੰਤਰੀ ਪ੍ਰਮਿਥਾ ਬਾਂਦਾਰਾ ਟੇਨਾਕੂਨ ਦੇ ਹਵਾਲੇ ਨਾਲ ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ “ਰਣਨੀਤਕ ਬਲੂਪ੍ਰਿੰਟ ਦਾ ਸਮੁੱਚਾ ਉਦੇਸ਼ ਆਗਾਮੀ ਸੁਰੱਖਿਆ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ 2030 ਤੱਕ ਇੱਕ ਤਕਨੀਕੀ ਅਤੇ ਰਣਨੀਤਕ ਤੌਰ ‘ਤੇ ਮਜ਼ਬੂਤ ਅਤੇ ਚੰਗੀ ਤਰ੍ਹਾਂ ਸੰਤੁਲਿਤ ਰੱਖਿਆ ਬਲ ਤਿਆਰ ਕਰਨਾ ਹੈ।” ਸਾਲ 2023 ਦੇ ਬਜਟ ਵਿੱਚ 539 ਅਰਬ ਰੁਪਏ ਦੀ ਰੱਖਿਆ ਅਲਾਟਮੈਂਟ ਦੀ ਆਲੋਚਨਾ ਹੋਈ ਹੈ ਕਿਉਂਕਿ ਸ੍ਰੀਲੰਕਾ 1948 ਤੋਂ ਬਾਅਦ ਸਭ ਤੋਂ ਖਰਾਬ ਆਰਥਿਕ ਸੰਕਟ ਦਾ ਸਾਹਮਣਾ ਕਰ ਰਿਹਾ ਹੈ।ਵਿਦੇਸ਼ੀ ਮੁਦਰਾ ਦੀ ਘਾਟ ਕਾਰਨ ਸ਼੍ਰੀਲੰਕਾ ਈਂਧਨ, ਖਾਦਾਂ ਅਤੇ ਦਵਾਈਆਂ ਸਮੇਤ ਵੱਡੀਆਂ ਦਰਾਮਦਾਂ ਨੂੰ ਬਰਦਾਸ਼ਤ ਕਰਨ ਵਿੱਚ ਅਸਮਰੱਥ ਸੀ, ਜਿਸ ਕਾਰਨ ਲੰਬੀਆਂ ਕਤਾਰਾਂ ਲੱਗ ਗਈਆਂ।
2023 ਦੇ ਬਜਟ ਵਿੱਚ ਸਿਹਤ ਅਤੇ ਸਿੱਖਿਆ ਲਈ 300 ਬਿਲੀਅਨ ਰੁਪਏ ਤੋਂ ਵੱਧ ਦੀ ਵੰਡ ਕੀਤੀ ਗਈ ਹੈ। ਹਾਲਾਂਕਿ, 2009 ਵਿੱਚ ਲਿਬਰੇਸ਼ਨ ਟਾਈਗਰਜ਼ ਆਫ ਤਾਮਿਲ ਈਲਮ ਦੇ ਨਾਲ ਸੰਘਰਸ਼ ਦੇ ਅੰਤ ਤੋਂ ਬਾਅਦ ਲਗਭਗ 400,000 ਦੀ ਫ਼ੌਜੀ ਤਾਕਤ ਨੂੰ ਅੱਧਾ ਕਰ ਦਿੱਤਾ ਗਿਆ ਸੀ। ਇਸ ਦੇ ਬਾਵਜੂਦ 200,000 ਤੋਂ ਵੱਧ ਸੈਨਿਕਾਂ ਦੀ ਮੌਜੂਦਾ ਗਿਣਤੀ ਨੂੰ ਵੀ ਬਹੁਤ ਜ਼ਿਆਦਾ ਕਰਾਰ ਦਿੱਤਾ ਗਿਆ ਹੈ। ਰਾਸ਼ਟਰਪਤੀ ਰਾਨਿਲ ਵਿਕਰਮਸਿੰਘੇ ਨੇ ਪਿਛਲੇ ਸਾਲ ਕਿਹਾ ਸੀ ਕਿ ਸ਼੍ਰੀਲੰਕਾ ਦੀ ਫ਼ੌਜ ਨੂੰ ਨਵੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਤਿਆਰ ਕਰਨ ਲਈ ਫ਼ੌਜੀ ਰਣਨੀਤੀ ਨੂੰ ਸੁਧਾਰਨ ਦੀ ਲੋੜ ਹੈ।