ਹਰ 10 ਸਕਿੰਟ ਚ ਹੋ ਰਹੀ ਇਕ ਸ਼ਰਾਬੀ ਦੀ ਮੌਤ

ਜੇਨੇਵਾ – ਵਿਸ਼ਵ ਸਿਹਤ ਸੰਗਠਨ (ਡਬਲਯੂ. ਐੱਚ. ਓ.) ਨੇ ਅਲਕੋਹਲ ’ਤੇ ਕਾਬੂ ਪਾਉਣ ਲਈ ਕੌਮਾਂਤਰੀ ਸਹਿਯੋਗ ’ਤੇ ਜ਼ੋਰ ਦਿੰਦੇ ਹੋਏ ਕਿਹਾ ਕਿ ਸ਼ਰਾਬ ਪੀਣ ਨਾਲ ਹਰ 10 ਸਕਿੰਟ ਵਿਚ ਇਕ ਵਿਅਕਤੀ ਦੀ ਮੌਤ ਹੋ ਰਹੀ ਹੈ ਅਤੇ ਸਬੰਧਤ ਕੰਪਨੀਆਂ ਨੌਜਵਾਨਾਂ ਤੇ ਨਸ਼ੇ ਦੇ ਆਦੀ ਲੋਕਾਂ ਨੂੰ ਨਿਸ਼ਾਨਾ ਬਣਾ ਰਹੀਆਂ ਹਨ। ਦੁਨੀਆ ਦੀ ਨੌਜਵਾਨ ਤੇ ਵਧਦੀ ਆਬਾਦੀ ਵਾਲੇ ਖੇਤਰਾਂ ਅਫਰੀਕਾ ਅਤੇ ਲੈਟਿਨ ਅਮਰੀਕਾ ਨੂੰ ਖਾਸ ਤੌਰ ’ਤੇ ਟੀਚਾ ਬਣਾਇਆ ਜਾ ਰਿਹਾ ਹੈ। ਸ਼ਰਾਬ ਦੀ ਬਾਜ਼ਾਰ ਤਕਨੀਕਾਂ ’ਤੇ ਜਾਰੀ ਇਕ ਨਵੀਂ ਰਿਪੋਰਟ ’ਚ ਵਿਸ਼ਵ ਸਿਹਤ ਸੰਗਠਨ ਨੇ ਕਿਹਾ ਕਿ ਪੂਰੀ ਦੁਨੀਆ ਵਿਚ ਹਰ ਸਾਲ 30 ਲੱਖ ਲੋਕ ਸ਼ਰਾਬ ਦੇ ਹਾਨੀਕਾਰਕ ਇਸਤੇਮਾਲ ਦੇ ਨਤੀਜੇ ਵਜੋਂ ਮਰ ਜਾਂਦੇ ਹਨ।ਪੂਰੀ ਦੁਨੀਆ ਵਿਚ ਹਰ ਸਾਲ ਕੁੱਲ ਮੌਤਾਂ ’ਚੋਂ 5 ਫੀਸਦੀ ਮੌਤ ਅਲਕੋਹਲ ਦਾ ਸੇਵਨ ਕਰਨ ਨਾਲ ਹੁੰਦੀ ਹੈ। ਅਲਕੋਹਲ ਨਾਲ ਸਬੰਧਤ ਮੌਤਾਂ ਵਿਚ ਨੌਜਵਾਨਾਂ ਦਾ ਅਨੁਪਾਤ 13.5 ਫੀਸਦੀ ਹੈ। ਇਨ੍ਹਾਂ ਦੀ ਉਮਰ 20-39 ਸਾਲਾਂ ਦੇ ਵਿਚ ਹੈ। ਇਹ ਮੌਤਾਂ ਕੈਂਸਰ, ਲਿਵਰ ਤੇ ਹੋਰ ਸਰੀਰਕ ਤਕਲੀਫਾਂ ਅਤੇ ਸੜਕ ਹਾਦਸਿਆਂ ਨਾਲ ਹੁੰਦੀਆਂ ਹਨ। ਡਬਲਯੂ. ਐੱਚ. ਓ. ਨੇ ਕਿਹਾ ਕਿ ਅਲਕੋਹਲ ਦੀ ਆਨਲਾਈਨ ਮਾਰਕੀਟਿੰਗ ਤਕਨੀਕਾਂ ਲਈ ਅਸਰਦਾਰ ਰੈਗੂਲੇਟਰੀ ਦੀ ਲੋੜ ਹੈ। ਸ਼ਰਾਬ ਦੀ ਆਨਲਾਈਨ ਮਾਰਕੀਟਿੰਗ ਨੌਜਵਾਨ ਲੋਕਾਂ ਅਤੇ ਹੋਰ ਜ਼ਿਆਦਾ ਸ਼ਰਾਬ ਪੀਣ ਵਾਲਿਆਂ ਨੂੰ ਟੀਚਾ ਬਣਾਉਂਦੀ ਹੈ, ਜੋ ਅਕਸਰ ਉਨ੍ਹਾਂ ਦੀ ਸਿਹਤ ਲਈ ਹਾਨੀਕਾਰਕ ਹੁੰਦੀ ਹੈ।                                              ਸਾਲ 1996 ਅਤੇ 2015 ਵਿਚਾਲੇ ਬਾਕਸ ਆਫਿਸ ’ਤੇ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀਆਂ 100 ਅਮਰੀਕੀ ਫਿਲਮਾਂ ਦੇ ਵਿਸ਼ਲੇਸ਼ਣ ਅਨੁਸਾਰ ਉਨ੍ਹਾਂ ’ਚੋਂ ਲਗਭਗ ਅੱਧੀਆਂ ਵਿਚ ਬ੍ਰਾਂਡਿਡ ਸ਼ਰਾਬ ਦਿਖਾਈ ਗਈ ਸੀ। ਡਬਲਯੂ. ਐੱਚ. ਓ. 2018 ਦੇ ਇਕ ਅਧਿਐਨ ਵਿਚ ਪਾਇਆ ਗਿਆ ਕਿ ਜ਼ਿਆਦਾਤਰ ਦੇਸ਼ਾਂ ’ਚ ਰਵਾਇਤੀ ਮੀਡੀਆ ’ਚ ਸ਼ਰਾਬ ਦੇ ਇਸ਼ਤਿਹਾਰ ਲਈ ਕਈ ਤਰ੍ਹਾਂ ਦੇ ਨਿਯਮ ਹਨ ਜਦਕਿ ਇੰਟਰਨੈੱਟ ਅਤੇ ਸੋਸ਼ਲ ਮੀਡਆ ’ਤੇ ਇਸ ਲਈ ਕੋਈ ਰੈਗੂਲੇਟਰੀ ਨਹੀਂ ਹੈ। ਸਾਲ 2019 ਵਿਚ ਅਮਰੀਕਾ ’ਚ ਪ੍ਰਮੁੱਖ ਅਲਕੋਹਲ ਕੰਪਨੀਆਂ ਦੇ ਮੀਡੀਆ ਖਰਚ ਦਾ 70 ਫੀਸਦੀ ਤੋਂ ਵੱਧ ਪ੍ਰਚਾਰ, ਉਤਪਾਦ ਪ੍ਰਦਰਸ਼ਨ ਅਤੇ ਸੋਸ਼ਲ ਮੀਡੀਆ ਵਿਚ ਆਨਲਾਈਨ ਇਸ਼ਤਿਹਾਰਾਂ ’ਤੇ ਖਰਚਿਆ ਜਾਂਦਾ ਹੈ।