ਹਰਿਆਣਾ ਦੀ ਮਿੱਟੀ ਇੱਕ ਹੋਰ ਭਲਵਾਨ ਦੇ ਰੱਤ ਨਾਲ ਭਿੱਜੀ

ਭਲਵਾਨ ਨਿਸ਼ਾ ਤੇ ਉਸ ਦੇ ਭਰਾ ਦਾ ਗੋਲੀਆਂ ਮਾਰ ਤੇ ਕਤਲ

ਛੇੜਛਾੜ ਦੇ ਵਿਰੋਧ ਦੇ ਚਲਦਿਆਂ ਗਵਾਈ ਜਾਨ

ਸੋਨੀਪਤ-ਹਰਿਆਣਾ ਦੇ ਸੋਨੀਪਤ ਦੇ ਪਿੰਡ ਹਲਾਲਪੁਰ ਦੀ ਰਹਿਣ ਵਾਲੀ ਪਹਿਲਵਾਨ ਨਿਸ਼ਾ ਦਾ ਕਤਲ ਹੋ ਗਿਆ ਹੈ, ਉਹ ਯੂਨੀਵਰਸਿਟੀ ਪੱਧਰ ਦੀ ਮੈਡਲ ਜੇਤੂ ਖਿਡਾਰਨ ਸੀ।  ਦੱਸਿਆ ਜਾ ਰਿਹਾ ਹੈ ਕਿ ਬਦਮਾਸ਼ਾਂ ਨੇ ਇਸ ਘਟਨਾ ਨੂੰ ਸੋਨੀਪਤ ਦੇ ਹਲਾਲਪੁਰ ਪਿੰਡ ‘ਚ ਅੰਜਾਮ ਦਿੱਤਾ ਹੈ। ਇਸ ਪਿੰਡ ਵਿੱਚ ਪਹਿਲਵਾਨ ਸੁਸ਼ੀਲ ਕੁਮਾਰ ਦੇ ਨਾਂਅ ’ਤੇ ਇੱਕ ਅਕੈਡਮੀ ਹੈ। ਹਮਲਾਵਰਾਂ ਨੇ ਨਿਸ਼ਾ, ਉਸ ਦੇ ਭਰਾ ਸੂਰਜ ਅਤੇ ਮਾਂ ਧਨਪਤੀ ‘ਤੇ ਕਈ ਰਾਉਂਡ ਫਾਇਰ ਕੀਤੇ। ਇਸ ਨਾਲ ਪੂਰਾ ਇਲਾਕਾ ਹਿੱਲ ਗਿਆ। ਇਸ ਦੇ ਨਾਲ ਹੀ ਗੋਲੀ ਲੱਗਣ ਕਾਰਨ ਨਿਸ਼ਾ ਅਤੇ ਉਸ ਦੇ ਭਰਾ ਸੂਰਜ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਮਾਂ ਧਨਪਤੀ ਗੰਭੀਰ ਜ਼ਖਮੀ ਹੋ ਗਈ। ਇਸ ਦੇ ਨਾਲ ਹੀ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਸਾਰੇ ਹਮਲਾਵਰ ਮੌਕੇ ਤੋਂ ਫਰਾਰ ਹੋ ਗਏ। ਸਥਾਨਕ ਪੁਲਿਸ ਸਟੇਸ਼ਨ ਅਨੁਸਾਰ ਧਨਪਤੀ ਨੂੰ ਗੰਭੀਰ ਹਾਲਤ ਵਿੱਚ ਰੋਹਤਕ ਪੀਜੀਆਈ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ, ਜਿੱਥੇ ਉਸ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਇਸ ਦੇ ਨਾਲ ਹੀ ਅਜੇ ਤੱਕ ਕਤਲ ਦੇ ਕਾਰਨਾਂ ਦਾ ਖੁਲਾਸਾ ਨਹੀਂ ਹੋਇਆ ਹੈ। ਪੁਲਿਸ ਥਾਣਾ ਖਰਖੌਦਾ ਨੇ ਹੁਣ ਇਸ ਹਾਈ ਪ੍ਰੋਫਾਈਲ ਦੋਹਰੇ ਕਤਲ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਘਟਨਾ ਤੋਂ ਬਾਅਦ ਇਲਾਕੇ ‘ਚ ਦਹਿਸ਼ਤ ਦਾ ਮਾਹੌਲ ਹੈ। ਭੈਣ-ਭਰਾ ਦੇ ਕਤਲ ਤੋਂ ਬਾਅਦ ਪਿੰਡ ਵਾਸੀਆਂ ‘ਚ ਭਾਰੀ ਰੋਸ ਹੈ। ਪਿੰਡ ਵਾਸੀਆਂ ਨੇ ਅਕੈਡਮੀ ‘ਚ ਕੀਤੀ ਭੰਨਤੋੜ, ਗੁੱਸੇ ‘ਚ ਆਏ ਪਿੰਡ ਵਾਸੀਆਂ ਨੇ ਕੁਸ਼ਤੀ ਅਕੈਡਮੀ ਨੂੰ ਲਗਾਈ ਅੱਗ ਕੁਸ਼ਤੀ ਕੋਚ ਪਵਨ ‘ਤੇ ਕਤਲ ਦਾ ਦੋਸ਼ ਹੈ। ਜਾਣਕਾਰੀ ਮੁਤਾਬਕ ਮੌਕੇ ‘ਤੇ ਭਾਰੀ ਪੁਲਸ ਦੀ ਮੌਜੂਦਗੀ ‘ਚ ਗੁੱਸੇ ‘ਚ ਆਏ ਪਿੰਡ ਵਾਸੀਆਂ ਨੇ ਅੱਗ ਲਗਾ ਦਿੱਤੀ। ਕਤਲ ਦਾ ਦੋਸ਼ ਅਕੈਡਮੀ ਸੰਚਾਲਕ ‘ਤੇ ਲਗਾਇਆ ਗਿਆ ਹੈ ਅਤੇ ਕਤਲ ਦਾ ਕਾਰਨ ਮਹਿਲਾ ਪਹਿਲਵਾਨ ਨਾਲ ਛੇੜਛਾੜ ਦਾ ਵਿਰੋਧ ਕਰਨਾ ਦੱਸਿਆ ਗਿਆ ਹੈ। ਪੁਲਿਸ ਨੇ ਇਸ ਸਬੰਧੀ ਅਕੈਡਮੀ ਸੰਚਾਲਕ, ਉਸ ਦੀ ਪਤਨੀ ਅਤੇ ਉਸ ਦੇ ਸਾਥੀਆਂ ਖ਼ਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।