ਸੋਸ਼ਲ ਮੀਡੀਆ ਰਾਹੀਂ ਅਲ੍ਹੜ ਕੁੜੀਆਂ ਧੋਖੇ ਦਾ ਹੋ ਰਹੀਆਂ ਸ਼ਿਕਾਰ

ਲੁਧਿਆਣਾ-ਇਥੇ ਪਿਛਲੇ 5 ਸਾਲਾਂ ਵਿਚ ਮਹਿਲਾ ਅਪਰਾਧ ਨਾਲ ਜੁੜੇ 995 ਮਾਮਲੇ ਸਾਹਮਣੇ ਆਏ ਹਨ। ਸੋਸ਼ਲ ਮੀਡੀਆ ’ਤੇ ਦੋਸਤ ਬਣ ਕੇ ਨੌਜਵਾਨ ਕੁੜੀਆਂ ਨੂੰ ਜਾਲ ਸਾਜ਼ੀ ਵਿਚ ਫਸਾ ਕੇ ਫਿਰ ਸਰੀਰਕ ਸ਼ੋਸ਼ਣ ਕਰਦੇ ਹਨ ਅਤੇ ਵਿਆਹ ਦਾ ਝਾਂਸਾ ਦੇ ਕੇ ਮੁੱਕਰ ਜਾਂਦੇ ਹਨ। ਵਨ ਸਟਾਪ ਸੈਂਟਰ ਵਿਚ ਆ ਰਹੇ ਮਹਿਲਾ ਅਪਰਾਧ ਨਾਲ ਜੁੜੇ ਮਾਮਲੇ ਇਸ ਦੀ ਗਵਾਹੀ ਦੇ ਰਹੇ ਹਨ। ਸਰੀਰਕ ਸ਼ੋਸ਼ਣ ਦਾ ਸ਼ਿਕਾਰ ਹੋਣ ਵਾਲੀਆਂ ਕੁੜੀਆਂ ਦੀ ਉਮਰ 18 ਸਾਲ ਤੋਂ 23 ਸਾਲ ਵਿਚ ਹੈ। ਦਰਅਸਲ ਨੌਜਵਾਨ ਸੋਸ਼ਲ ਮੀਡੀਆ ’ਤੇ ਜ਼ਿਆਦਾ ਸਮਾਂ ਬਿਤਾ ਰਹੇ ਹਨ। ਜਿਸ ਕਾਰਣ ਅਲ੍ਹੜ ਉਮਰ ਦੀਆਂ ਕੁੜੀਆਂ ਸਾਫਟ ਟਾਰਗਿਟ ਬਣ ਜਾਂਦੀਆਂ ਹਨ। ਪਹਿਲਾਂ ਤਾਂ ਅਣਜਾਨ ਲੋਕ ਸੋਸ਼ਲ ਮੀਡੀਆ ਰਾਹੀਂ ਕੁੜੀਆਂ ਨਾਲ ਸੰਪਰਕ ਵਿਚ ਆਉਂਦੇ ਹਨ ਅਤੇ ਲੁਭਾਉਣੇ ਵਾਅਦੇ ਕਰਕੇ ਕੁੜੀ ਨਾਲ ਦੋਸਤੀ ਕਰ ਲੈਂਦੇ ਹਨ। ਇਹ ਦੋਸਤੀ ਸਿਰਫ ਧੋਖਾ ਦੇ ਕੇ ਆਰਥਿਕ ਅਤੇ ਸਰੀਰਕ ਸ਼ੋਸ਼ਣ ਕਰਨ ਤਕ ਹੀ ਸੀਮਿਤ ਹੋ ਕੇ ਰਹਿ ਜਾਂਦੀ ਹੈ।
ਮੀਡੀਆ ਰਿਪੋਰਟਾਂ ਮੁਤਾਬਕ ਇਥੇ ਪਿਛਲੇ 5 ਸਾਲਾਂ ਵਿਚ ਮਹਿਲਾ ਅਪਰਾਧ ਨਾਲ ਜੁੜੇ 995 ਮਾਮਲੇ ਸਾਹਮਣੇ ਆਏ ਹਨ। ਇਸ ਵਿਚ 500 ਸ਼ਿਕਾਇਤਾਂ ਪੀੜਤ ਮਹਿਲਾਵਾਂ ਖੁਦ ਲੈ ਕੇ ਪਹੁੰਚੀਆਂ ਹਨ। ਜਦਕਿ 181 ਹੈਲਪਲਾਈਨ ਨੰਬਰ ’ਤੇ 495 ਸ਼ਿਕਾਇਤਾਂ ਵਨ ਸਟਾਪ ਸੈਂਟਰ ਕੋਲ ਪਹੁੰਚੀਆਂ ਹਨ। ਇਨ੍ਹਾਂ ਵਿਚ 70 ਮਾਮਲੇ ਜਬਰ ਜ਼ਿਨਾਹ ਨਾਲ ਜੁੜੇ ਹਨ ਜਿਸ ਵਿਚ 35 ਕੁੜੀਆਂ ਦੀ ਦੋਸਤੀ ਸੋਸ਼ਲ ਮੀਡੀਆ ਰਾਹੀਂ ਹੀ ਹੋਈ ਸੀ। ਵਨ ਸਟਾਪ ਸੈਂਟਰ ਵਿਚ ਆਉਣ ਵਾਲੀਆਂ ਸ਼ਿਕਾਇਤਾਂ ਵਿਚ ਨੌਕਰੀਪੇਸ਼ਾ ਲੜਕੀਆਂ ਦੇ ਵੀ ਸਰੀਰਕ ਸ਼ੋਸ਼ਣ ਦੀਆਂ ਸ਼ਿਕਾਇਤਾਂ ਹਨ। ਅਧਿਕਾਰੀਆਂ ਮੁਤਾਬਕ ਕੁੜੀਆਂ ਬਾਹਰੀ ਸ਼ਹਿਰਾਂ ਵਿਚ ਨੌਕਰੀਆਂ ਲਈ ਜਾਂਦੀਆਂ ਹਨ। ਉਥੇ ਉਹ ਸੋਸ਼ਲ ਮੀਡੀਆ ਜਾਂ ਆਪਣਏ ਸਹਿਕਮੀ ਦੇ ਧੋਖੇ ਦੇ ਜਾਲ ਵਿਚ ਫਸ ਜਾਂਦੀਆਂ ਹਨ।