ਸੁੰਦਰ ਪਿਚਾਈ 19 ਦਸੰਬਰ ਨੂੰ ਆਉਣਗੇ ਭਾਰਤ, ਅਹਿਮ ਮੁੱਦਿਆ ’ਤੇ ਹੋਵੇਗੀ ਚਰਚਾ

ਨਵੀਂ ਦਿੱਲੀ-ਨਿਊਯਾਰਕ ਟਾਈਮਜ਼ ਦੀ ਇੱਕ ਤਾਜ਼ਾ ਰਿਪੋਰਟ ਅਨੁਸਾਰ ਤਕਨੀਕੀ ਦਿੱਗਜ ਗੂਗਲ ਇੰਕ. ਦੇ ਸੀਈਓ ਸੁੰਦਰ ਪਿਚਾਈ 19 ਦਸੰਬਰ ਨੂੰ ਭਾਰਤ ਆ ਰਹੇ ਹਨ। ਇਸ ਦੌਰਾਨ ਉਹ ਸੀਨੀਅਰ ਸਰਕਾਰੀ ਅਧਿਕਾਰੀਆਂ ਨਾਲ ਮੀਟਿੰਗ ਕਰਨਗੇ, ਜਿਸ ਵਿੱਚ ਪਿਕਸਲ ਬ੍ਰਾਂਡ ਦੇ ਤਹਿਤ ਵਿਕਣ ਵਾਲੇ ਮੋਬਾਈਲ ਫੋਨਾਂ ਨੂੰ ਅਸੈਂਬਲ ਕਰਨ ਦੇ ਮੁੱਦੇ ’ਤੇ ਵੀ ਚਰਚਾ ਕੀਤੀ ਜਾਵੇਗੀ। ਪਿਚਾਈ ਦੇ ਭਾਰਤ ਦੌਰੇ ਬਾਰੇ ਪੁੱਛੇ ਜਾਣ ’ਤੇ ਕੇਂਦਰੀ ਸੰਚਾਰ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਕਿਹਾ ਅਸੀਂ ਕਈ ਮੁੱਦਿਆਂ ’ਤੇ ਚਰਚਾ ਕਰਨ ਲਈ ਉਨ੍ਹਾਂ ਨਾਲ ਮੁਲਾਕਾਤ ਕਰਾਂਗੇ। ਅਸੀਂ ਭਾਰਤ ਵਿੱਚ ਗੂਗਲ ਦੇ ਹੈਂਡਸੈੱਟ ਬਣਾਉਣ, ਐਪ ਡਿਵੈਲਪਰ ਈਕੋਸਿਸਟਮ ਨੂੰ ਵਿਕਸਤ ਕਰਨ, ਸਾਈਬਰ ਸੁਰੱਖਿਆ ਅਤੇ ਭਾਰਤੀ ਭਾਸ਼ਾਵਾਂ ਦੀ ਵਰਤੋਂ ਆਦਿ ਨੂੰ ਲੈ ਕੇ ਚਰਚਾ ਕਰਾਂਗੇ।
ਮੀਟਿੰਗ ਦੇ ਏਜੰਡੇ ਬਾਰੇ ਜਾਣਨ ਲਈ ਗੂਗਲ ਇੰਡੀਆ ਨੂੰ ਈਮੇਲ ਭੇਜੀ ਗਈ ਸੀ ਪਰ ਲਿਖਤੀ ਸਮੇਂ ਤੱਕ ਕੋਈ ਜਵਾਬ ਨਹੀਂ ਆਇਆ। ਹਾਲਾਂਕਿ ਸੂਤਰਾਂ ਨੇ ਕਿਹਾ ਕਿ ਸਰਕਾਰ ਨਾਲ ਗੱਲਬਾਤ ਦੌਰਾਨ ਪਿਚਾਈ ਆਪਣੀ ਪਲੇਅਸਟੋਰ ਨੀਤੀ ਦੇ ਸਬੰਧ ਵਿੱਚ ਆਪਣੇ ਦਬਦਬੇ ਦੀ ਦੁਰਵਰਤੋਂ ਕਰਨ ਲਈ ਭਾਰਤੀ ਮੁਕਾਬਲੇਬਾਜ਼ੀ ਕਮਿਸ਼ਨ (ਸੀਸੀਆਈ) ਦੁਆਰਾ ਲਗਾਏ ਗਏ ਵੱਖ-ਵੱਖ ਜ਼ੁਰਮਾਨਿਆਂ ਦਾ ਮੁੱਦਾ ਵੀ ਉਠਾ ਸਕਦੇ ਹਨ।
ਗੂਗਲ ਦੱਖਣੀ ਚੀਨ ਵਿੱਚ ਫੋਕਸਕਨ ਦੀ ਯੂਨਿਟ ਵਿੱਚ ਬਣਾਏ ਜਾ ਰਹੇ ਆਪਣੇ ਨਵੀਨਤਮ ਪਿਕਸਲ 7 ਮੋਬਾਈਲ ਫੋਨਾਂ ਦੇ ਅੱਧੇ ਉਤਪਾਦਨ ਨੂੰ ਵੀਅਤਨਾਮ ਵਿੱਚ ਤਬਦੀਲ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਅਜਿਹੀ ਸਥਿਤੀ ’ਚ ਪਿਚਾਈ ਦੀ ਵੈਸ਼ਨਵ ਨਾਲ ਗੱਲਬਾਤ ਮਹੱਤਵਪੂਰਨ ਹੋ ਸਕਦੀ ਹੈ ਕਿਉਂਕਿ ਸਰਕਾਰ ’ਚਾਈਨਾ ਪਲੱਸ ਵਨ ਰਣਨੀਤੀ’ ਤਹਿਤ ਦੁਨੀਆ ਭਰ ਦੇ ਬਾਜ਼ਾਰਾਂ ਲਈ ਆਪਣੇ ਉਤਪਾਦਨ ਦਾ ਕੁਝ ਹਿੱਸਾ ਭਾਰਤ ਲਿਆਉਣ ਲਈ ਗਲੋਬਲ ਕੰਪਨੀਆਂ ’ਤੇ ਜ਼ੋਰ ਦੇ ਰਹੀ ਹੈ।
ਗੂਗਲ ਦੇ ਉੱਚ ਅਧਿਕਾਰੀਆਂ ਦਾ ਭਾਰਤ ਦੌਰਾ
ਜੇਕਰ ਇਹ ਸੌਦਾ ਸਫਲ ਹੁੰਦਾ ਹੈ, ਤਾਂ ਗੂਗਲ ਭਾਰਤ ਨੂੰ ਨਿਰਯਾਤ-ਮੁਖੀ ਨਿਰਮਾਣ ਹੱਬ ਵਜੋਂ ਵਰਤਣ ਵਾਲੀ ਤੀਜੀ ਮੋਬਾਈਲ ਡਿਵਾਈਸ ਨਿਰਮਾਤਾ ਹੋਵੇਗੀ। ਸੈਕਟਰ ਦੇ ਹੋਰ ਵੱਡੇ ਖਿਡਾਰੀਆਂ ਵਿੱਚ ਐਪਲ ਇੰਕ ਸ਼ਾਮਲ ਹੈ, ਜਿਸ ਨੇ ਇਸ ਸਾਲ ਅਪ੍ਰੈਲ-ਦਸੰਬਰ ਵਿਚਕਾਰ 20,000 ਕਰੋੜ ਰੁਪਏ ਦੇ ਆਈਫੋਨ ਬਰਾਮਦ ਕੀਤੇ ਹਨ। ਪਿਚਾਈ ਦੇ ਭਾਰਤ ਦੌਰੇ ਤੋਂ ਪਹਿਲਾਂ, ਗੂਗਲ ਦੇ ਕੁਝ ਉੱਚ ਅਧਿਕਾਰੀਆਂ ਨੇ ਭਾਰਤ ਦਾ ਦੌਰਾ ਕੀਤਾ ਅਤੇ ਸਰਕਾਰੀ ਅਧਿਕਾਰੀਆਂ ਨਾਲ ਵੀ ਮੁਲਾਕਾਤ ਕੀਤੀ। ਇਹਨਾਂ ਕਾਰਜਕਾਰੀਆਂ ਵਿੱਚ ਵਿਲਸਨ ਵ੍ਹਾਈਟ, ਪਬਲਿਕ ਪਾਲਿਸੀ ਦੇ ਉਪ ਪ੍ਰਧਾਨ, ਅਤੇ ਕਰਨ ਭਾਟੀਆ, ਗੂਗਲ ਇੰਕ ਵਿੱਚ ਨੀਤੀ ਦੇ ਗਲੋਬਲ ਮੁਖੀ ਸ਼ਾਮਲ ਸਨ। ਸਾਲ 2020 ਵਿੱਚ, ਗੂਗਲ ਨੇ ਭਾਰਤ ਵਿੱਚ 10 ਬਿਲੀਅਨ ਡਾਲਰ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਸੀ।
ਗੂਗਲ ਤੇ ਲੱਗਾ 936.44 ਕਰੋੜ ਰੁਪਏ ਦਾ ਜੁਰਮਾਨਾ
ਪਿਚਾਈ ਦੀ ਭਾਰਤ ਫੇਰੀ ਅਜਿਹੇ ਸਮੇਂ ਹੋ ਰਹੀ ਹੈ ਜਦੋਂ ਸੀਸੀਆਈ ਨੇ ਪਲੇਸਟੋਰ ਨੀਤੀ ਰਾਹੀਂ ਆਪਣੇ ਦਬਦਬੇ ਦੀ ਕਥਿਤ ਦੁਰਵਰਤੋਂ ਲਈ ਗੂਗਲ ’ਤੇ 936.44 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਸੀਸੀਆਈ ਨੇ ਇਸ ਤੋਂ ਪਹਿਲਾਂ ਵੱਖ-ਵੱਖ ਖੇਤਰਾਂ ਵਿੱਚ ਦਬਦਬੇ ਦੀ ਦੁਰਵਰਤੋਂ ਕਰਨ ਲਈ ਗੂਗਲ ’ਤੇ 1,337.76 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਸੀ।
ਗੂਗਲ ਨੇ ਜੀਓ ਪਲੇਟਫਾਰਮ ’ਚ ਖ਼ਰੀਦੀ ਹਿੱਸੇਦਾਰੀ
ਹਾਲਾਂਕਿ ਗੂਗਲ ਨੇ 4.5 ਅਰਬ ਡਾਲਰ ਦੇ ਨਿਵੇਸ਼ ਨਾਲ ਜੀਓ ਪਲੇਟਫਾਰਮਸ ’ਚ 7.73 ਫੀਸਦੀ ਹਿੱਸੇਦਾਰੀ ਖਰੀਦੀ ਹੈ। ਇਸ ਤੋਂ ਇਲਾਵਾ ਇਸ ਨੇ ਕਿਫਾਇਤੀ 4ਜੀ ਸਮਾਰਟਫੋਨ ਬਣਾਉਣ ਲਈ ਰਿਲਾਇੰਸ ਜੀਓ ਨਾਲ ਵੀ ਸਮਝੌਤਾ ਕੀਤਾ ਹੈ। ਹਾਲਾਂਕਿ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸ ਹੈਂਡਸੈੱਟ ਨੂੰ ਬਾਜ਼ਾਰ ’ਚ ਜ਼ਿਆਦਾ ਤਵੱਜੋ ਨਹੀਂ ਮਿਲੀ।