ਖਬਰਾਂਚਲੰਤ ਮਾਮਲੇਦੁਨੀਆ

ਸਿੰਗਾਪੁਰ ‘ਚ ਭਾਰਤੀ ਮੋਬਾਇਲ ਪੇਮੈਂਟ ਸਿਸਟਮ ਰਾਹੀਂ ਭੇਜ ਸਕਣਗੇ ਪੈਸੇ

ਨਵੀਂ ਦਿੱਲੀ-ਭਾਰਤ ਅਤੇ ਸਿੰਗਾਪੁਰ ਦੇ ਲੋਕ ਇਕ-ਦੂਜੇ ਦੇ ਮੋਬਾਇਲ ਪੇਮੈਂਟ ਸਿਸਟਮ ਦੀ ਵਰਤੋਂ ਕਰਕੇ ਬੈਂਕ ਖਾਤਿਆਂ ‘ਚ ਤੁਰੰਤ ਪੈਸੇ ਟ੍ਰਾਂਸਫਰ ਕਰ ਸਕਣਗੇ। ਇਸ ਦੇ ਤਹਿਤ ਸਿੰਗਾਪੁਰ ‘ਚ ਵਸੇ ਕਰੀਬ 2.5 ਲੱਖ ਭਾਰਤੀ ਜਲਦ ਹੀ ਮੋਬਾਇਲ ਪੇਮੈਂਟ ਸਿਸਟਮ, ਯੂ.ਪੀ.ਆਈ. ਰਾਹੀਂ ਬਹੁਤ ਘੱਟ ਕੀਮਤ ‘ਤੇ ਆਪਣੇ ਘਰ ਪੈਸੇ ਭੇਜ ਸਕਣਗੇ।
ਸਿੰਗਾਪੁਰ ਵਿਚ ਭਾਰਤ ਦੇ ਹਾਈ ਕਮਿਸ਼ਨਰ ਪੀ ਕੁਮਾਰਨ ਨੇ ਆਸੀਆਨ-ਇੰਡੀਆ ਮੀਡੀਆ ਇੰਟਰਐਕਸ਼ਨ ਪ੍ਰੋਗਰਾਮ ਨੂੰ ਦੱਸਿਆ ਕਿ ਭਾਰਤ ਦੇ ਯੂਪੀਆਈ ਮੋਬਾਈਲ ਪੇਮੈਂਟ ਇੰਟਰਫੇਸ ਅਤੇ ਸਿੰਗਾਪੁਰ ਦੇ ਬਰਾਬਰ ਸਿਸਟਮ ਵਿਚਕਾਰ ਸੰਪਰਕ ਸਥਾਪਤ ਕਰਨ ਦੀਆਂ ਤਿਆਰੀਆਂ ਚੱਲ ਰਹੀਆਂ ਹਨ ਅਤੇ ਇਹ ਵਿਵਸਥਾ ਇਸ ਸਾਲ ਦੇ ਅੰਤ ਤੱਕ ਚਾਲੂ ਹੋਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਸਿੰਗਾਪੁਰ ਵਿਚ ਕੰਮ ਕਰ ਰਹੇ ਲੱਖਾਂ ਪ੍ਰਵਾਸੀ ਮਜ਼ਦੂਰਾਂ ਨੂੰ ਬਹੁਤ ਘੱਟ ਖਰਚੇ ‘ਤੇ ਜਲਦੀ ਆਪਣੇ ਘਰ ਪੈਸੇ ਭੇਜਣ ਦੀ ਸਹੂਲਤ ਮਿਲੇਗੀ। ਇਸ ਸਮੇਂ ਉਨ੍ਹਾਂ ਨੂੰ ਪੈਸੇ ਦੀ ਅਦਲਾ-ਬਦਲੀ ਕਰਨ ਲਈ ਬਹੁਤ ਸਾਰਾ ਪੈਸਾ ਖਰਚ ਕਰਨਾ ਪੈ ਰਿਹਾ ਹੈ।
ਕੁਮਾਰਨ ਨੇ ਕਿਹਾ ਕਿ ਭਾਰਤੀ ਰਿਜ਼ਰਵ ਬੈਂਕ ਅਤੇ ਸਿੰਗਾਪੁਰ ਦੀ ਮੁਦਰਾ ਅਥਾਰਟੀ ‘ਚ ਕਾਫੀ ਕੰਮ ਹੋ ਚੁੱਕਾ ਹੈ। ਇਹ ਪ੍ਰੋਜੈਕਟ ਲਗਭਗ ਪੂਰਾ ਹੋ ਚੁੱਕਾ ਹੈ, ਹੁਣ ਕਿਸੇ ਵੀ ਸਮੇਂ ਦੋਵਾਂ ਦੇਸ਼ਾਂ ਦੇ ਚੋਟੀ ਦੇ ਨੇਤਾ ਇੱਕ ਦੂਜੇ ਨਾਲ ਗੱਲ ਕਰ ਸਕਦੇ ਹਨ ਅਤੇ ਇਸ ਦੇ ਸ਼ੁਰੂ ਹੋਣ ਦਾ ਐਲਾਨ ਕਰ ਸਕਦੇ ਹਨ।

Comment here