ਸਿਓਲ : ਟਰੱਕ ਦੀ ਟੱਕਰ ‘ਚ 3 ਲੋਕਾਂ ਦੀ ਮੌਤ; 17 ਜ਼ਖਮੀ

ਸਿਓਲ-ਇਥੋਂ ਦੀ ਸਮਾਚਾਰ ਏਜੰਸੀ ਨੇ ਦੱਸਿਆ ਕਿ ਦੱਖਣ-ਪੱਛਮੀ ਦੱਖਣੀ ਕੋਰੀਆ ਵਿੱਚ ਇੱਕ ਖੇਤੀਬਾੜੀ ਸਹਿਕਾਰੀ ਮੁਖੀ ਲਈ ਵੋਟ ਪਾਉਣ ਦੀ ਉਡੀਕ ਕਰ ਰਹੇ ਲੋਕਾਂ ਦੀ ਕਤਾਰ ਨੂੰ ਇਕ ਟਰੱਕ ਨੇ ਟੱਕਰ ਮਾਰ ਦਿੱਤੀ। ਇਸ ਟੱਕਰ ਕਾਰਨ ਘੱਟੋ-ਘੱਟ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਅਤੇ 17 ਹੋਰ ਜ਼ਖ਼ਮੀ ਹੋ ਗਏ। ਸਿਓਲ ਤੋਂ ਲਗਭਗ 240 ਕਿਲੋਮੀਟਰ ਦੱਖਣ ਵਿਚ ਸੁਨਚਾਂਗ ਵਿਚ ਇਕ ਖੇਤੀਬਾੜੀ ਸਹਿਕਾਰੀ ਇਮਾਰਤ ਦੀ ਪਾਰਕਿੰਗ ਵਿਚ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 10:30 ਵਜੇ ਖਾਦ ਲੈ ਕੇ ਜਾ ਰਿਹਾ ਇਕ ਟਨ ਵਜ਼ਨ ਵਾਲਾ ਟਰੱਕ ਲਗਭਗ 20 ਲੋਕਾਂ ਦੇ ਸਮੂਹ ਨਾਲ ਟਕਰਾ ਗਿਆ, ਜੋ ਨਵੇਂ ਸਹਿਕਾਰੀ ਨੇਤਾ ਦੀ ਚੋਣ ਲਈ ਵੋਟਿੰਗ ਕਰਨ ਲਈ ਖੜ੍ਹੇ ਸਨ। ਇਹਨਾਂ ਵਿਚੋਂ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਅਤੇ ਪੰਜ ਹੋਰ ਗੰਭੀਰ ਰੂਪ ਨਾਲ ਜ਼ਖਮੀ ਹੋ ਗਏ। ਮ੍ਰਿਤਕਾਂ ਦੀ ਗਿਣਤੀ ਹੋਰ ਵਧ ਸਕਦੀ ਹੈ ਕਿਉਂਕਿ ਜ਼ਿਆਦਾਤਰ ਪੀੜਤ ਬਜ਼ੁਰਗ ਸਨ। 12 ਲੋਕਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ, ਜਿਨ੍ਹਾਂ ਨੂੰ ਇਲਾਜ ਲਈ ਨੇੜਲੇ ਹਸਪਤਾਲਾਂ ਵਿੱਚ ਭੇਜਿਆ ਗਿਆ। ਟਰੱਕ ਡਰਾਈਵਰ, ਜਿਸ ਦੀ ਉਮਰ 70 ਦੇ ਦਹਾਕੇ ਵਿੱਚ ਹੈ, ਨੂੰ ਮੌਕੇ ‘ਤੇ ਰੰਗੇ ਹੱਥੀ ਅਪਰਾਧੀ ਵਜੋਂ ਗ੍ਰਿਫ਼ਤਾਰ ਕਰ ਲਿਆ ਗਿਆ।