ਸਾਂਬਾ ਸਰਹੱਦ ’ਤੇ ਡਰੋਨ ਦੇਖ ਸੁਰੱਖਿਆ ਫੋਰਸ ਹੋਈ ਅਲਰਟ

ਸ਼੍ਰੀਨਗਰ-ਸਰਹੱਦ ਪਾਰ ਚੌਕਸੀ ਦੇ ਬਾਵਜੂਦ ਵੀ ਕੋਈ ਨਾ ਕੋਈ ਘਟਨਾ ਵਾਪਰਦੀ ਰਹਿੰਦੀ ਹੈ। ਭਾਰਤੀ ਫ਼ੌਜ ਨੇ ਐਤਵਾਰ ਨੂੰ ਜੰਮੂ ਕਸ਼ਮੀਰ ਦੇ ਸਾਂਬਾ ‘ਚ ਕੌਮਾਂਤਰੀ ਸਰਹੱਦ ਕੋਲ ਇਕ ਹੋਰ ਪਾਕਿਸਤਾਨੀ ਡਰੋਨ ਉੱਡਦੇ ਹੋਏ ਦੇਖਿਆ। ਬੀਤੀ ਰਾਤ ਗਸ਼ਤ ਲਗਾ ਰਹੇ ਸੁਰੱਖਿਆ ਫ਼ੋਰਸਾਂ ਵਲੋਂ ਡਰੋਨ ਦੀ ਗਤੀਵਿਧੀ ਦਾ ਪਤਾ ਲਗਾਇਆ ਗਿਆ ਸੀ। ਤਾਜ਼ਾ ਅਪਡੇਟ ਅਨੁਸਾਰ ਜੰਮੂ ਕਸ਼ਮੀਰ ਪੁਲਸ ਨੇ ਕਿਹਾ,”ਸ਼ਨੀਵਾਰ ਦੇਰ ਰਾਤ ਸਾਂਬਾ ਦੇ ਮੰਗੂ ਚਕ ਪਿੰਡ ਦੇ ਪਿੰਡ ਵਾਸੀਆਂ ਨੇ ਪੁਲਸ ਨੂੰ ਇਲਾਕੇ ‘ਚ ਇਕ ਡਰੋਨ ਦੇਖੇ ਜਾਣ ਦੀ ਸੂਚਨਾ ਮਿਲੀ ਸੀ। ਡਰੋਨ ਕਰੀਬ 15 ਮਿੰਟ ਤੱਕ ਹਵਾ ‘ਚ ਰਿਹਾ ਪਰ ਬਾਅਦ ‘ਚ ਉਸ ਨੇ ਵਾਪਸ ਪਾਕਿਸਤਾਨ ਵੱਲ ਉਡਾਣ ਭਰੀ। ਇਸ ਨੂੰ ਹਵਾ ‘ਚ 300 ਮੀਟਰ ਦੀ ਉੱਚਾਈ ‘ਤੇ ਦੇਖਿਆ ਗਿਆ। ਇਸ ਤੋਂ ਬਾਅਦ ਸੁਰੱਖਿਆ ਫ਼ੋਰਸਾਂ ਨੇ ਇਲਾਕੇ ‘ਚ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ ਹੈ।
ਦੱਸਣਯੋਗ ਹੈ ਕਿ ਸ਼ੁੱਕਰਵਾਰ ਨੂੰ ਵੀ ਇਕ ਡਰੋਨ ਪਾਕਿਸਤਾਨ ਵੱਲੋਂ ਆਇਆ ਸੀ। ਜੰਮੂ ਕਸ਼ਮੀਰ ‘ਚ ਕੰਟਰੋਲ ਰੇਖਾ (ਐੱਲ.ਓ.ਸੀ.) ‘ਤੇ ਮੇਂਢਰ ਖੇਤਰ ‘ਚ ਭਾਰਤੀ ਫ਼ੌਜ ਵਲੋਂ 2 ਦਿਨ ਪਹਿਲਾਂ ਪਾਕਿਸਤਾਨੀ ਡਰੋਨ ਦੇਖਿਆ ਗਿਆ ਸੀ। ਪਾਕਿਸਤਾਨ ਵੱਲੋਂ ਆ ਰਹੇ ਡਰੋਨ ਨੂੰ ਸ਼ੁੱਕਰਵਾਰ ਦੇਰ ਰਾਤ ਮੇਂਢਰ ਦੇ ਬਾਲਨੋਈ ਸੈਕਟਰ ‘ਚ ਦੇਖਿਆ ਗਿਆ, ਇਸ ਦੌਰਾਨ ਸੁਰੱਖਿਆ ਫ਼ੋਰਸਾਂ ਨੇ ਕੁਝ ਰਾਊਂਡ ਫਾਇਰਿੰਗ ਕੀਤੀ ਅਤੇ ਉਸ ਨੂੰ ਦੌੜ ਦਿੱਤਾ।