ਸ਼ਾਬਾਸ਼ੀਆਂ…. ਪਾਨੀਪਤ ਦੇ ਕਿਸਾਨ ਪੁੱਤ ਦਾ ਭਾਲਾ ਸਿੱਧਾ ਗੋਲਡ ਤੇ

ਕਿਸਾਨ ਦਾ ਪੁੱਤ ਭਾਰਤ ਦਾ ਮਾਣ ਬਣਿਆ

ਪਾਨੀਪਤ ਜ਼ਿਲ੍ਹੇ ਦੇ ਖੰਡਰਾ ਪਿੰਡ ਦੇ ਕਿਸਾਨ ਪਰਿਵਾਰ ਚ ਜਨਮੇ ਨੀਰਜ ਚੋਪੜਾ ਚੰਡੀਗੜ੍ਹ ’ਚ ਡੀਏਵੀ ਕਾਲਜ ਦੇ ਵਿਦਿਆਰਥੀ ਰਹੇ ਹਨ, ਉਨ੍ਹਾਂ ਨੇ ਸਾਲ 2011 ’ਚ ਕਾਲਜ ਜੁਆਇੰਨ ਕੀਤਾ ਸੀ। ਇਸੇ ਸਾਲ ਉਸ ਨੇ ਆਲ ਇੰਡੀਆ ਇੰਟਰ ਯੂਨੀਵਰਸਿਟੀ ਦਾ ਰਿਕਾਰਡ ਤੋੜ ਦਿੱਤਾ ਸੀ।  ਪੜ੍ਹਾਈ ’ਚ ਵਧੀਆ ਭਵਿੱਖ ਬਣੇ, ਇਸ ਲਈ ਉਸ ਦੇ ਪਿਤਾ ਨੇ ਉਸ ਨੂੰ ਚਾਚੇ ਦੇ ਨਾਲ ਚੰਡੀਗੜ੍ਹ ਭੇਜ ਦਿੱਤਾ। ਪੰਚਕੂਲਾ ’ਚ ਅਥਲੈਟਿਕਸ ਨਰਸਰੀ ਤਾਊ ਦੇਵੀ ਲਾਲ ਸਟੇਡੀਅਮ ਦੇ ਅਥਲੈਟਿਕਸ ਕੋਚ ਨਸੀਮ ਅਹਿਮਦ ਨੇ ਦੱਸਿਆ ਕਿ ਨੀਰਜ ਦੇ ਚਾਚਾ ਸਾਲ 2011 ’ਚ ਉਸ ਦੇ ਕੋਲ ਨੀਰਜ ਨੂੰ ਲੈ ਕੇ ਆਏ ਅਤੇ ਇਹ ਕਿਹਾ ਕਿ ਇਹ ਮੇਰਾ ਭਤੀਜਾ ਹੈ ਜੋ ਖਾ-ਖਾ ਕੇ ਮੋਟਾ ਹੋ ਰਿਹਾ ਹੈ। ਤੁਸੀਂ ਇਸ ਨੂੰ ਵੀ ਦੌੜਾਇਆ ਕਰੋ। ਮੈਂ ਕਿਹਾਕਿ ਤੁਸੀਂ ਸਟੇਡੀਅਮ ’ਚ ਭੇਜ ਦਿਆ ਕਰੋ, ਜਿਸ ਤੋਂ ਬਾਅਦ ਨੀਰਜ ਰੋਜ਼ ਆਉਣ ਲੱਗਿਆ। ਪਾਨੀਪਤ ਦਾ ਇਕ ਹੋਰ ਲੜਕਾ ਪੈਰਾ ਅਥਲੀਟ ਨਰਿੰਦਰ ਸੀ, ਜੋ ਮੇਰੇ ਕੋਲ ਹੋਸਟਲ ’ਚ ਰਹਿੰਦਾ ਸੀ। ਨਰਿੰਦਰ ਅਤੇ ਨੀਰਜ ਦੀ ਦੋਸਤੀ ਹੋਣ ਤੋਂ ਬਾਅਦ ਉਹ ਵੀ ਹੋਸਟਲ ’ਚ ਰਹਿਣ ਆ ਗਿਆ ਅਤੇ ਸਾਲ 2016 ਤਕ ਇੱਥੇ ਰਹਿ ਕੇ ਉਸ ਨੇ ਜੈਵਲਿਨ ਥ੍ਰੋਅ ਦੇ ਗੁਰ ਸਿੱਖੇ। ਅੱਜ ਉਹ ਵਰਲਡ ਰੈਂਕਿੰਗ ’ਚ ਚੌਥੇ ਨੰਬਰ ਦੇ ਖਿਡਾਰੀ ਹਨ। ਨੀਰਜ ਏਸ਼ੀਅਨ ਗੇਮਜ਼ ਅਤੇ ਕਾਮਨਵੈਲਥ ਗੇਮਜ਼ ’ਚ ਗੋਲਡ ਮੈਡਲ ਜਿੱਤ ਚੁੱਕੇ ਹਨ। ਸਾਲ 2016 ’ਚ ਸਾਊਥ ਏਸ਼ੀਅਨ ਗੇਮਜ਼ ਅਤੇ ਵਰਲਡ ਜੂਨੀਅਨ ਚੈਂਪੀਅਨਸ਼ਿਪ ’ਚ ਗੋਲਡ ਮੈਡਲ ਜਿੱਤਿਆ ਸੀ।

ਹਰਿਆਣਾ ਸਰਕਾਰ ਨੇ ਇਨਾਮਾਂ ਦਾ ਮੀਂਹ ਵਰ੍ਹਾ ਦਿੱਤਾ

ਸੂਬੇ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਨੇ ਖੁਦ ਨੀਰਜ ਦਾ ਪ੍ਰਦਰਸ਼ਨ ਦੇਖਿਆ।  ਨੀਰਜ ਦੀ ਜਿੱਤ ’ਤੇ  ਵਧਾਈ ਦਿੱਤੀ ਤੇ ਨੀਰਜ ਨੂੰ ਸਰਕਾਰ ਵੱਲੋਂ ਦਿੱਤੇ ਜਾਣ ਵਾਲੇ ਇਨਾਮਾਂ ਤੇ ਸਨਮਾਨ ਦੀ ਜਾਣਕਾਰੀ ਦਿੱਤੀ। ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਨੇ ਕਿਹਾ ਕਿ ਨੀਰਜ ਦੀ ਜਿੱਤ ਦੇਸ਼ ਤੇ ਹਰਿਆਣਾ ਲਈ ਵੱਡੀ ਪ੍ਰਾਪਤੀ ਹੈ।  ਨੀਰਜ ਚੋਪੜਾ ਨੂੰ ਕਲਾਸ-1 ਦੀ ਨੌਕਰੀ ਦਿੱਤੀ ਜਾਵੇਗੀ, 6 ਕਰੋੜ ਰੁਪਏ ਇਨਾਮ ਵਜੋਂ ਤੇ ਨਾਲ ਹੀ ਕੰਸੇਸ਼ਨਲ ਰੇਟ ’ਤੇ ਪਲਾਟ ਵੀ ਦਿੱਤਾ ਜਾਏਗਾ। ਉਨ੍ਹਾਂ ਇਹ ਵੀ ਕਿਹਾ ਕਿ ਪੰਚਕੂਲਾ ’ਚ ਐਥਲੈਟਿਕਸ ਦਾ ਇਕ ਵੱਖਰਾ ਸੈਂਟਰ ਬਣਾਉਣਗੇ ਤੇ ਉਸ ਦਾ ਹੈੱਡ ਨੀਰਜ ਨੂੰ ਬਣਾਇਆ ਜਾਵੇਗਾ।  ਇਸ ਦੇ ਨਾਲ ਹੀ ਦੂਜੀਆਂ ਖੇਡਾਂ ਨੂੰ ਵੀ ਬੜ੍ਹਾਵਾ ਦਿੱਤਾ ਜਾਵੇਗਾ।

ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਇਸ ਐਥਲੀਟ ਨੂੰ ਦੋ ਕਰੋੜ ਰੁਪਏ ਦਾ ਵਿਸ਼ੇਸ਼ ਇਨਾਮ ਦੇਣ ਦਾ ਐਲਾਨ ਕੀਤਾ ਹੈ। ਕਿਹਾ ਕਿ ਇਹ ਭਾਰਤ ਅਤੇ ਸਾਰੇ ਪੰਜਾਬੀਆਂ ਲਈ ਮਾਣ ਵਾਲੀ ਗੱਲ ਹੈ। ਨੀਰਜ ਚੋਪੜਾ, ਜੋ ਭਾਰਤੀ ਫੌਜ ਦਾ ਸਿਪਾਹੀ ਹੈ, ਉਸਦੇ ਪਰਿਵਾਰ ਦਾ ਪਿਛੋਕੜ ਪੰਜਾਬ ਨਾਲ ਜੁੜਿਆ ਹੋਇਆ ਹੈ।