ਹਾਲੇ 2013 ਚ ਜਿਉਂ ਰਿਹੈ
ਆਓ ਬੱਚਿਓ ਤੁਹਾਨੂੰ ਅਜਬ ਗਜਬ ਦੁਨੀਆ ਦੇ ਦਰਸ਼ਨ ਕਰਾਉੰਦੇ ਹਾਂ.. ਆਪਾਂ ਸਾਰੇ ਹੁਣੇ ਜਿਹੇ ਨਵੇਂ ਸਾਲ 2022 ਦਾ ਸਵਾਗਤ ਕਰਕੇ ਹਟੇ ਹਾਂ, ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਦੁਨੀਆ ਵਿੱਚ ਇੱਕ ਅਜਿਹਾ ਅਜੀਬੋ ਗ਼ਰੀਬ ਦੇਸ਼ ਵੀ ਹੈ, ਜਿੱਥੇ ਹਾਲੇ ਵੀ ਸਾਲ 2013 ਹੀ ਚੱਲ ਰਿਹਾ ਹੈ। ਹੋ ਗਏ ਨਾ ਹੈਰਾਨ? ਅਫਰੀਕੀ ਦੇਸ਼ ਇਥੋਪੀਆ ਦਾ ਕੈਲੰਡਰ ਦੁਨੀਆ ਤੋਂ 9 ਸਾਲ 3 ਮਹੀਨੇ ਪਿੱਛੇ ਚੱਲਦਾ ਹੈ। ਇਹ ਦੇਸ਼ ਹੋਰ ਕਈ ਪੱਖਾਂ ਤੋਂ ਬਹੁਤ ਵੱਖਰਾ ਹੈ, ਜਿਵੇਂ ਕਿ ਸਾਲ ਦੇ 12 ਦੀ ਬਜਾਏ 13 ਮਹੀਨੇ ਹੁੰਦੇ ਹਨ। ਜਾਣੋ ਇਹ ਦੇਸ਼ ਸਾਲ ਅਤੇ ਸਮੇਂ ਦੇ ਲਿਹਾਜ਼ ਨਾਲ ਦੁਨੀਆ ਤੋਂ ਇੰਨਾ ਵੱਖ ਕਿਉਂ ਹੈ-85 ਲੱਖ ਤੋਂ ਵੱਧ ਦੀ ਆਬਾਦੀ ਵਾਲੇ ਅਫਰੀਕਾ ਦੇ ਦੂਜੇ ਸਭ ਤੋਂ ਵੱਧ ਆਬਾਦੀ ਵਾਲੇ ਦੇਸ਼ ਵਜੋਂ ਜਾਣੇ ਜਾਂਦੇ, ਇਥੋਪੀਆ ਦਾ ਆਪਣਾ ਕੈਲੰਡਰ ਗ੍ਰੈਗੋਰੀਅਨ ਕੈਲੰਡਰ ਤੋਂ ਲਗਭਗ ਸਾਢੇ ਅੱਠ ਸਾਲ ਪਿੱਛੇ ਹੈ। ਇੱਥੇ ਨਵਾਂ ਸਾਲ ਹਰ 13 ਮਹੀਨਿਆਂ ਬਾਅਦ 1 ਜਨਵਰੀ ਦੀ ਬਜਾਏ 11 ਸਤੰਬਰ ਨੂੰ ਮਨਾਇਆ ਜਾਂਦਾ ਹੈ। ਅਸਲ ਵਿੱਚ ਗ੍ਰੇਗੋਰੀਅਨ ਕੈਲੰਡਰ 1582 ਵਿੱਚ ਸ਼ੁਰੂ ਹੋਇਆ ਸੀ, ਇਸ ਤੋਂ ਪਹਿਲਾਂ ਜੂਲੀਅਨ ਕੈਲੰਡਰ ਵਰਤਿਆ ਜਾਂਦਾ ਸੀ। ਕੈਥੋਲਿਕ ਚਰਚ ਨੂੰ ਮੰਨਣ ਵਾਲੇ ਦੇਸ਼ਾਂ ਨੇ ਨਵੇਂ ਕੈਲੰਡਰ ਨੂੰ ਸਵੀਕਾਰ ਕਰ ਲਿਆ, ਜਦਕਿ ਕਈ ਦੇਸ਼ ਇਸ ਦਾ ਵਿਰੋਧ ਕਰ ਰਹੇ ਸਨ। ਇਥੋਪੀਆ ਉਨ੍ਹਾਂ ਵਿੱਚੋਂ ਇੱਕ ਸੀ। ਇਥੀਓਪੀਆ ਵਿੱਚ ਰੋਮਨ ਚਰਚ ਦੀ ਛਾਪ ਰਹੀ। ਯਾਨੀ ਕਿ ਇਥੋਪੀਅਨ ਆਰਥੋਡਾਕਸ ਚਰਚ ਇਹ ਮੰਨਦਾ ਰਿਹਾ ਕਿ ਈਸਾ ਮਸੀਹ ਦਾ ਜਨਮ 7 ਈਸਾ ਪੂਰਵ ਵਿੱਚ ਹੋਇਆ ਸੀ ਅਤੇ ਇਸ ਅਨੁਸਾਰ ਕੈਲੰਡਰ ਦੀ ਗਿਣਤੀ ਸ਼ੁਰੂ ਹੋ ਗਈ ਸੀ। ਇਸ ਦੇ ਨਾਲ ਹੀ ਬਾਕੀ ਦੁਨੀਆਂ ਵਿਚ ਈਸਾ ਮਸੀਹ ਦਾ ਜਨਮ ਈਸਵੀ 1 ਵਿਚ ਦੱਸਿਆ ਗਿਆ ਹੈ। ਇਹੀ ਕਾਰਨ ਹੈ ਕਿ ਇੱਥੇ ਕੈਲੰਡਰ ਅਜੇ ਵੀ 2013 ਵਿੱਚ ਫਸਿਆ ਹੋਇਆ ਹੈ, ਜਦੋਂ ਕਿ ਸਾਰੇ ਦੇਸ਼ਾਂ ਵਿੱਚ 2022 ਦੀ ਸ਼ੁਰੂਆਤ ਹੋ ਚੁੱਕੀ ਹੈ। ਇਥੋਪੀਆਈ ਕੈਲੰਡਰ ਵਿੱਚ ਇੱਕ ਸਾਲ ਵਿੱਚ 13 ਮਹੀਨੇ ਹੁੰਦੇ ਹਨ। ਇਨ੍ਹਾਂ ਵਿੱਚੋਂ 12 ਮਹੀਨੇ 30 ਦਿਨ ਹੁੰਦੇ ਹਨ। ਆਖਰੀ ਮਹੀਨੇ ਨੂੰ ਪੈਗਯੁਮ ਕਿਹਾ ਜਾਂਦਾ ਹੈ, ਜਿਸ ਵਿੱਚ ਪੰਜ ਜਾਂ ਛੇ ਦਿਨ ਹੁੰਦੇ ਹਨ। ਇਹ ਮਹੀਨਾ ਸਾਲ ਦੇ ਉਨ੍ਹਾਂ ਦਿਨਾਂ ਦੀ ਯਾਦ ਵਿੱਚ ਜੋੜ ਕੇ ਬਣਾਇਆ ਗਿਆ ਹੈ, ਜੋ ਕਿਸੇ ਕਾਰਨ ਕਰਕੇ ਸਾਲ ਦੀ ਗਿਣਤੀ ਵਿੱਚ ਸ਼ਾਮਲ ਨਹੀਂ ਹੁੰਦੇ। ਇਥੋਪੀਆ ਦੇ ਲੋਕ ਇਸ ਗੱਲ ਦਾ ਧਿਆਨ ਰੱਖਦੇ ਹਨ ਕਿ ਇਸ ਕੈਲੰਡਰ ਅਤੇ ਉਨ੍ਹਾਂ ਦੀਆਂ ਮਾਨਤਾਵਾਂ ਕਾਰਨ ਸੈਲਾਨੀਆਂ ਨੂੰ ਕਿਸੇ ਕਿਸਮ ਦੀ ਸਮੱਸਿਆ ਦਾ ਸਾਹਮਣਾ ਨਾ ਕਰਨਾ ਪਵੇ। ਹਾਲਾਂਕਿ ਇਥੋਪੀਆ ਜਾਣ ਵਾਲੇ ਲੋਕਾਂ ਨੂੰ ਇਸ ਕੈਲੰਡਰ ਕਾਰਨ ਕਿਤੇ ਹੋਟਲ ਬੁਕਿੰਗ ਅਤੇ ਹੋਰ ਕਈ ਬੁਨਿਆਦੀ ਸਹੂਲਤਾਂ ‘ਚ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਦੇਸ਼ ਦੀਆਂ ਹੋਰ ਵੀ ਕਈ ਵਿਸ਼ੇਸ਼ਤਾਵਾਂ ਹਨ। ਉਦਾਹਰਨ ਲਈ, ਇਥੋਪੀਆ ਵਿੱਚ ਯੂਨੈਸਕੋ ਦੀ ਵਿਸ਼ਵ ਵਿਰਾਸਤ ਸਾਈਟ ਵਿੱਚ ਸਭ ਤੋਂ ਵੱਧ ਸਥਾਨ ਸ਼ਾਮਲ ਹਨ। ਦੁਨੀਆ ਦੀ ਸਭ ਤੋਂ ਡੂੰਘੀ ਅਤੇ ਲੰਬੀ ਗੁਫਾ , ਦੁਨੀਆ ਦਾ ਸਭ ਤੋਂ ਗਰਮ ਸਥਾਨ ਅਤੇ ਇੱਥੇ ਕੁਦਰਤੀ ਸੁੰਦਰਤਾ ਦਾ ਭੰਡਾਰ ਹੈ, ਜਿਸ ਕਾਰਨ ਦੁਨੀਆ ਭਰ ਤੋਂ ਸੈਲਾਨੀ ਇੱਥੇ ਆਉਂਦੇ ਹਨ। 11 ਸਤੰਬਰ ਨੂੰ ਮਨਾਏ ਜਾਣ ਵਾਲੇ ਨਵੇਂ ਸਾਲ ਦਾ ਵੀ ਇੱਥੇ ਵਿਸ਼ੇਸ਼ ਆਕਰਸ਼ਣ ਹੁੰਦਾ ਹੈ।
Comment here