ਲੁਧਿਆਣਾ ਬਲਾਸਟ : ਜਾਂਚ ਏਜੰਸੀਆਂ ਸਲੀਪਰ ਸੈੱਲ ਦੀ ਤਲਾਸ਼ ’ਚ

ਮਾਸਟਰਮਾਈਂਡ ਗਗਨਦੀਪ ਨੂੰ ਬੰਬ ਚਲਾਉਣ ਦੀ ਟ੍ਰੇਨਿੰਗ ਬਣੀ ਰਹੱਸ
ਮੁੱਖ ਦੋਸ਼ੀ ਦੀ ਪਤਨੀ ਤੇ ਮਹਿਲਾ ਮਿੱਤਰ ਦੇ ਖਾਤੇ ’ਚ ਆਏ ਵਿਦੇਸ਼ੀ ਫੰਡ
ਲੁਧਿਆਣਾ-ਲੰਘੀ 23 ਦਸੰਬਰ ਨੂੰ ਲੁਧਿਆਣਾ ਅਦਾਲਤੀ ਕੰਪਲੈਕਸ ਵਿੱਚ ਬੰਬ ਧਮਾਕਾ ਹੋਇਆ ਸੀ। ਬੰਬ ਧਮਾਕੇ ਦੇ ਦੋਸ਼ੀ ਗਗਨਦੀਪ ਵਾਂਗ ਪਾਕਿਸਤਾਨ ਪੱਖੀ ਖਾਲਿਸਤਾਨੀ ਜਥੇਬੰਦੀਆਂ ਨੇ ਕਿੰਨੇ ਹੋਰ ਸਲੀਪਰ ਸੈੱਲ ਬਣਾਏ ਹਨ? ਅਜਿਹੀਆਂ ਹੋਰ ਘਟਨਾਵਾਂ ਲਈ ਗਗਨਦੀਪ ਨੇ ਕੋਈ ਟੀਮ ਨਹੀਂ ਬਣਾਈ ਸੀ? ਗਗਨਦੀਪ ਵਰਗੇ ਹੋਰ ਕਿੰਨੇ ਲੋਕ ਪੰਜਾਬ ਵਿਚ ਘੁੰਮ ਰਹੇ ਹਨ? ਕੀ ਗਗਨਦੀਪ ਨੇ ਕੋਈ ਹੋਰ ਵਿਸਫੋਟਕ ਕਿਤੇ ਲੁਕਾ ਕੇ ਰੱਖਿਆ ਹੈ? ਅਜਿਹੇ ਹੋਰ ਵੀ ਕਈ ਸਵਾਲ ਇਨ੍ਹੀਂ ਦਿਨੀਂ ਜਾਂਚ ਏਜੰਸੀਆਂ ਦੇ ਦਿਮਾਗ ’ਚ ਘੁੰਮ ਰਹੇ ਹਨ ਅਤੇ ਕਈ ਟੀਮਾਂ ਇਨ੍ਹਾਂ ਦੇ ਜਵਾਬ ਲੱਭਣ ਲਈ ਵੀ ਕੰਮ ਕਰ ਰਹੀਆਂ ਹਨ।
ਸੂਤਰਾਂ ਅਨੁਸਾਰ ਜਾਂਚ ਏਜੰਸੀਆਂ ਨੂੰ ਸ਼ੱਕ ਹੈ ਕਿ ਗਗਨਦੀਪ ਵਾਂਗ ਇਸ ਘਟਨਾ ਤੋਂ ਬਾਅਦ ਖਾਲਿਸਤਾਨ ਪੱਖੀ ਜਥੇਬੰਦੀਆਂ ਦੇ ਕਈ ਹੋਰ ਮੋਹਤਬਰ ਵੀ ਹੋ ਸਕਦੇ ਹਨ। ਇਹ ਵੀ ਸ਼ੱਕ ਜਤਾਇਆ ਜਾ ਰਿਹਾ ਹੈ ਕਿ ਨਸ਼ਾ ਤਸਕਰੀ ਦਾ ਧੰਦਾ ਕਰਨ ਵਾਲੇ ਗਗਨਦੀਪ ਨੇ ਨਸ਼ੇੜੀ ਨੌਜਵਾਨਾਂ ਨੂੰ ਆਪਣੀ ਟੀਮ ਵਿਚ ਸ਼ਾਮਲ ਕਰਕੇ ਭਵਿੱਖ ਵਿਚ ਅਜਿਹੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਲਈ ਤਿਆਰ ਰੱਖਿਆ ਹੋਇਆ ਹੈ। ਇਹੀ ਕਾਰਨ ਹੈ ਕਿ ਘਟਨਾ ਤੋਂ ਬਾਅਦ ਤੋਂ ਹੀ ਜਾਂਚ ਏਜੰਸੀਆਂ ਦੀਆਂ ਕਰੀਬ 4-5 ਟੀਮਾਂ ਖੰਨਾ ਤੇ ਆਸ-ਪਾਸ ਦੇ ਇਲਾਕਿਆਂ ’ਚ ਥਾਂ-ਥਾਂ ਨਾਕਾਬੰਦੀ ਕਰਕੇ ਸ਼ੱਕੀ ਵਿਅਕਤੀਆਂ ’ਤੇ ਖਾਸ ਨਜ਼ਰ ਰੱਖ ਰਹੀਆਂ ਹਨ।
ਗਗਨਦੀਪ ਨੂੰ ਬੰਬ ਲਗਾਉਣ ਦੀ ਟ੍ਰੇਨਿੰਗ ਕਿਸਨੇ ਅਤੇ ਕਿੱਥੇ ਦਿੱਤੀ?
ਸੂਤਰਾਂ ਮੁਤਾਬਕ ਗਗਨਦੀਪ ਨੂੰ ਬੰਬ ਲਗਾਉਣ ਦੀ ਟ੍ਰੇਨਿੰਗ ਦਿੱਤੀ ਗਈ ਸੀ। ਪੁਲਿਸ ਇਸ ਗੱਲ ਦੀ ਜਾਂਚ ਕਰ ਰਹੀ ਹੈ ਕਿ ਟ੍ਰੇਨਿੰਗ ਕਿਸ ਨੇ ਅਤੇ ਕਿਸ ਜਗ੍ਹਾ ’ਤੇ ਦਿੱਤੀ। ਗਗਨਦੀਪ ਦੇ ਜ਼ਮਾਨਤ ’ਤੇ ਜੇਲ੍ਹ ਤੋਂ ਰਿਹਾਅ ਹੋਣ ਤੋਂ ਬਾਅਦ ਉਸ ਦੀਆਂ ਕਰੀਬ ਢਾਈ ਮਹੀਨਿਆਂ ਦੀਆਂ ਗਤੀਵਿਧੀਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਨਸ਼ੇ ਦੇ ਨਾਲ ਫੜੇ ਗਏ ਲੋਕ ਰਾਡਾਰ ’ਤੇ
ਦੱਸਿਆ ਜਾਂਦਾ ਹੈ ਕਿ ਪੰਜਾਬ ’ਚ ਨਸ਼ਿਆਂ ਸਮੇਤ ਫੜੇ ਗਏ ਲੋਕਾਂ ਨੂੰ ਜਾਂਚ ਏਜੰਸੀਆਂ ਨੇ ਆਪਣੇ ਰਡਾਰ ’ਤੇ ਲਿਆ ਹੋਇਆ ਹੈ। ਸੂਤਰ ਦੱਸਦੇ ਹਨ ਕਿ ਸੂਬੇ ਦੇ ਸਾਰੇ ਜ਼ਿਲ੍ਹਿਆਂ ਦੀ ਪੁਲਿਸ ਨੂੰ ਨਸ਼ਿਆਂ ਸਮੇਤ ਫੜੇ ਗਏ ਵਿਅਕਤੀਆਂ ਦੀਆਂ ਗਤੀਵਿਧੀਆਂ ’ਤੇ ਨਜ਼ਰ ਰੱਖਣ ਲਈ ਕਿਹਾ ਗਿਆ ਹੈ। ਉਨ੍ਹਾਂ ਤੋਂ ਵੀ ਸ਼ੱਕ ਦੇ ਆਧਾਰ ’ਤੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।
ਮਾਸਟਰਮਾਈਂਡ ਦੀ ਪਤਨੀ ਤੇ ਮਹਿਲਾ ਮਿੱਤਰ ਦੇ ਖਾਤੇ ’ਚ ਆਈ ਵਿਦੇਸ਼ੀ ਫੰਡਿੰਗ
ਮੁੱਖ ਮੁਲਜ਼ਮ ਗਗਨਦੀਪ ਸਿੰਘ ਗੱਗੀ ਦੇ ਪਰਿਵਾਰਿਕ ਮੈਂਬਰ ਤੇ ਕਰੀਬੀ ਰਿਸ਼ਤੇਦਾਰ ਇਸ ਤੋਂ ਪੂਰੀ ਤਰਾਂ ਜਾਣੂ ਸਨ। ਮਾਮਲੇ ਦੀ ਜਾਂਚ ’ਚ ਯਤਨਸ਼ੀਲ ਏਜੰਸੀਆਂ ਦੀ ਜਾਣਕਾਰੀ ਵਿਚ ਇਹ ਗੱਲ ਸਾਹਮਣੇ ਆਈ ਹੈ। ਸੂਤਰਾਂ ਮੁਤਾਬਕ ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਗੱਗੀ ਦੀ ਪਤਨੀ ਤੇ ਇਸਤਰੀ ਮਿੱਤਰ ਦੇ ਖਾਤੇ ਵਿਚ ਵਿਦੇਸ਼ੀ ਫ਼ੰਡਿੰਗ ਆਉਣ ਦੇ ਸਬੂਤ ਸਾਹਮਣੇ ਆਏ ਹਨ। ਗਗਨਦੀਪ ਦੀ ਪਤਨੀ ਜਸਪ੍ਰੀਤ ਕੌਰ ਤੇ ਮਹਿਲਾ ਮਿੱਤਰ ਦੇ ਖਾਤੇ ’ਚ ਆਈ ਫ਼ੰਡਿੰਗ ਲੱਖਾਂ ਰੁਪਏ ਵਿਚ ਹੈ। ਜਿਸ ’ਚ ਜ਼ਿਆਦਾਤਰ ਫ਼ੰਡਿੰਗ ਜਰਮਨੀ ਤੋਂ ਹੋਈ ਹੈ। ਜਾਂਚ ਏਜੰਸੀਆਂ ਕੋਲ ਮੌਜੂਦ ਜਾਣਕਾਰੀ ਅਨੁਸਾਰ ਜਸਵਿੰਦਰ ਸਿੰਘ ਮੁਲਤਾਨੀ ਤੇ ਉਸ ਦੇ ਕਰੀਬੀਆਂ ਵੱਲੋਂ ਇਹ ਪੈਸਾ ਟ੍ਰਾਂਸਫ਼ਰ ਕੀਤਾ ਗਿਆ ਸੀ।
ਸੂਤਰਾਂ ਮੁਤਾਬਕ ਗੱਗੀ ਦੇ ਭਰਾ ਪ੍ਰੀਤਮ ਸਿੰਘ ਨੂੰ ਸਾਰੇ ਮਾਮਲੇ ਦੀ ਜਾਣਕਾਰੀ ਨਾ ਹੋਣ ਦੇ ਬਿਆਨ ’ਤੇ ਜਾਂਚ ਏਜੰਸੀਆਂ ਸੰਤੁਸ਼ਟ ਨਹੀਂ ਹਨ। ਇਸ ਸਬੰਧੀ ਪ੍ਰੀਤਮ ਸਿੰਘ ਵੀ ਏਜੰਸੀਆਂ ਦੇ ਸ਼ੱਕ ਦੇ ਰਾਡਾਰ ’ਤੇ ਹੈ। ਹਾਲਾਂਕਿ ਇਸ ਸਬੰਧੀ ਫ਼ਿਲਹਾਲ ਜਾਂਚ ਅਧਿਕਾਰੀ ਪੁਸ਼ਟੀ ਨਹੀਂ ਕਰ ਰਹੇ।
ਦੋਵੇਂ ਸਾਬਕਾ ਪੁਲਿਸ ਅਧਿਕਾਰੀਆਂ ਤੋਂ ਏਜੰਸੀਆਂ ਨੇ ਕੀਤੀ ਪੁੱਛਗਿੱਛ
ਖੰਨਾ ਪੁਲਿਸ ਦੇ ਦੋ ਸਾਬਕਾ ਐੱਸਐੱਚਓ ਤੋਂ ਲੁਧਿਆਣਾ ਵਿਖੇ ਜਾਂਚ ਏਜੰਸੀਆਂ ਵੱਲੋਂ ਪੁੱਛਗਿੱਛ ਕੀਤੀ ਗਈ। ਏਜੰਸੀਆਂ ਦੇ ਅਧਿਕਾਰੀਆਂ ਵੱਲੋਂ ਦੋਵੇਂ ਐੱਸਐੱਚਓ ਨੂੰ ਇੱਕਠੇ ਬਿਠਾ ਕੇ ਸਵਾਲ ਪੁੱਛੇ। ਏਜੰਸੀਆਂ ਨੂੰ ਗਗਨਦੀਪ ਦੇ ਜੇਲ੍ਹ ਵਿਚ ਰਹਿਣ ਵੇਲੇ ਦੋਵਾਂ ਐੱਸਐੱਚਓ ਅਧਿਕਾਰੀਆਂ ਨਾਲ ਫ਼ੋਨ ’ਤੇ ਗੱਲ ਹੋਣ ਦੇ ਸਬੂਤ ਮਿਲੇ ਸਨ। ਏਜੰਸੀਆਂ ਨੂੰ ਗਗਨਦੀਪ ਦੇ ਨੈੱਟਵਰਕ ਨੂੰ ਲੈ ਕੇ ਹੋਰ ਵੀ ਖੁਲਾਸੇ ਹੋਣ ਦੀ ਉਮੀਦ ਹੈ।
ਆਈਬੀ ਦੇ ਅਧਿਕਾਰੀਆਂ ਵੱਲੋਂ ਕਾਂਸਟੇਬਲ ਤੋਂ ਪੁੱਛ ਪੜਤਾਲ
ਸੂਤਰਾਂ ਮੁਤਾਬਕ ਕੇਂਦਰੀ ਇੰਟੈਲੀਜੈਂਸ ਬਿਓਰੋ ਆਈਬੀ ਦੇ ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਸਦਰ ਥਾਣਾ ਖੰਨਾ ਵਿਖੇ ਗਗਨਦੀਪ ਗੱਗੀ ਦੀ ਮਹਿਲਾ ਮਿੱਤਰ ਕਾਂਸਟੇਬਲ ਤੋਂ ਪੁੱਛਗਿੱਛ ਕੀਤੀ ਗਈ। ਦਿੱਲੀ ਤੋਂ ਆਈ ਟੀਮ ਵੱਲੋਂ ਲਗਭਗ ਪੰਜ ਘੰਟਿਆਂ ਤਕ ਕਮਲਪ੍ਰੀਤ ਤੋਂ ਗਗਨਦੀਪ ਤੇ ਬੰਬ ਧਮਾਕੇ ਸਬੰਧੀ ਪੁੱਛਗਿੱਛ ਕੀਤੀ। ਜਾਂਚ ’ਚ ਲੱਗੇ ਪੰਜਾਬ ਪੁਲਿਸ ਦੇ ਆਲ੍ਹਾ ਅਧਿਕਾਰੀ ਵੀ ਇਸਤਰੀ ਕਾਂਸਟੇਬਲ ਨੂੰ ਮਿਲੇ। ਮਾਮਲੇ ’ਚ ਹਾਲੇ ਤਕ ਕਾਂਸਟੇਬਲ ਦੀ ਗ੍ਰਿਫ਼ਤਾਰੀ ਨਹੀਂ ਪਾਈ ਗਈ ਪਰ ਉਸ ਤੋਂ ਲਗਾਤਾਰ ਪੁੱਛਗਿੱਛ ਪੰਜਾਬ ਤੋਂ ਲੈ ਕੇ ਕੇਂਦਰੀ ਜਾਂਚ ਏਜੰਸੀਆਂ ਵੱਲੋਂ ਕੀਤੀ ਜਾ ਰਹੀ ਹੈ।