ਲਾਦੇਨ ਦੀ ਤਸਵੀਰ ਯੂ ਪੀ ਦੇ ਬਿਜਲੀ ਵਿਭਾਗ ਦੇ ਇੱਕ ਦਫਤਰ ਚ ਲਾਈ!!

ਲਖਨਊ-ਦੁਨੀਆ ਭਰ ਵਿੱਚ ਤਰਥੱਲੀ ਮਚਾਉਣ ਵਾਲੇ ਉਸਾਮਾ ਬਿਨ ਲਾਦੇਨ ਦੀ ਤਸਵੀਰ ਭਾਰਤ ਦੇ ਕਿਸੇ ਸਰਕਾਰੀ ਦਫਤਰ ਵਿੱਚ ਲੱਗੀ ਮਿਲੇ ਤਾਂ ਹੈਰਾਨੀ ਹੋਵੇਗੀ। ਮਾਮਲਾ ਉੱਤਰ ਪ੍ਰਦੇਸ਼ ਦੇ ਫਰੂਖਾਬਾਦ ਜ਼ਿਲ੍ਹੇ ਵਿੱਚ ਸਥਿਤ ਨਵਾਬਗੰਜ ਦਾ ਹੈ, ਜਿੱਥੇ ਦੇ ਬਿਜਲੀ ਵਿਭਾਗ ਦੇ ਸਬ-ਡਿਵੀਜ਼ਨ ਦਫ਼ਤਰ ਵਿੱਚ ਇੱਕ ਐਸਡੀਓ ਰਵਿੰਦਰ ਪ੍ਰਕਾਸ਼ ਗੌਤਮ ਨੇ ਖ਼ਤਰਨਾਕ ਅੱਤਵਾਦੀ ਓਸਾਮਾ ਬਿਨ ਲਾਦੇਨ  ਦੀ ਤਸਵੀਰ ਲਗਾਈ, ਅਤੇ ਉਸ ਨੇ ਲਾਦੇਨ ਨੂੰ ਦੁਨੀਆ ਦਾ ਸਭ ਤੋਂ ਵਧੀਆ ਇੰਜੀਨੀਅਰ ਵੀ ਦੱਸਿਆ ਸੀ। ਜਦੋਂ ਕਰਮਚਾਰੀ ਨਵਾਬਗੰਜ ਬਿਜਲੀ ਨਿਗਮ ਦੇ ਦਫਤਰ ਪਹੁੰਚੇ ਤਾਂ ਉਹ ਹੈਰਾਨ ਰਹਿ ਗਏ। ਵੇਟਿੰਗ ਰੂਮ ਦੀ ਕੰਧ ‘ਤੇ ਓਸਾਮਾ ਬਿਨ ਲਾਦੇਨ ਦੀ ਤਸਵੀਰ ਲੱਗੀ ਹੋਈ ਸੀ, ਜਿਸ ‘ਤੇ ਲਿਖਿਆ ਸੀ, ‘ਰਿਵਰੇਡ ਓਸਾਮਾ ਬਿਨ ਲਾਦੇਨ ਦੁਨੀਆ ਦਾ ਸਭ ਤੋਂ ਵਧੀਆ ਜੂਨੀਅਰ ਇੰਜੀਨੀਅਰ’… ਇਸ ਦੇ ਨਾਲ ਹੀ ਉਨ੍ਹਾਂ ਦਾ ਨਾਂ ਰਵਿੰਦਰ ਪ੍ਰਕਾਸ਼ ਗੌਤਮ ਵੀ ਲਿਖਿਆ ਹੋਇਆ ਸੀ। ਇਸ ਸਬੰਧੀ ਐਸਡੀਓ ਰਵਿੰਦਰ ਪ੍ਰਕਾਸ਼ ਗੌਤਮ ਨੇ ਪੱਤਰਕਾਰਾਂ ਨੂੰ ਕਿਹਾ ਕਿ ਓਸਾਮਾ ਬਿਨ ਲਾਦੇਨ ਉਸ ਦਾ ਗੁਰੂ ਹੈ। ਉਸ ਦਾ ਕਹਿਣਾ ਹੈ ਕਿ ਓਸਾਮਾ ਬਿਨ ਲਾਦੇਨ ਦੁਨੀਆ ਦਾ ਸਭ ਤੋਂ ਵਧੀਆ ਜੂਨੀਅਰ ਇੰਜੀਨੀਅਰ ਹੈ, ਇਸ ਲਈ ਉਸ ਨੇ ਉਸ ਦੀ ਫੋਟੋ ਲਗਾਈ ਹੈ।  ਖੌਫਨਾਕ ਅੱਤਵਾਦੀ ਦੀ ਤਸਵੀਰ ਸਰਕਾਰੀ ਦਫਤਰ ‘ਚ ਲੱਗਣ ਦੀ ਖਬਰ ਸੁਣ ਕੇ ਅਧਿਕਾਰੀ ਵੀ ਹੈਰਾਨ ਰਹਿ ਗਏ। ਇਹ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਣ ਤੋਂ ਬਾਅਦ ਇਸ ਨੂੰ ਉਥੋਂ ਹਟਾ ਦਿੱਤਾ ਗਿਆ ਸੀ, ਪਰ ਐੱਸਡੀਓ ਦੀ ਇਸ ਕਾਰਵਾਈ ‘ਤੇ ਕੋਈ ਅਧਿਕਾਰਤ ਪ੍ਰਤੀਕਿਰਿਆ ਨਹੀਂ ਆਈ ਹੈ। ਇਸ ਦੇ ਨਾਲ ਹੀ ਸੀਨੀਅਰ ਅਧਿਕਾਰੀਆਂ ਨੇ ਵੀ ਉਨ੍ਹਾਂ ਖ਼ਿਲਾਫ਼ ਕਾਰਵਾਈ ਨੂੰ ਲੈ ਕੇ ਚੁੱਪੀ ਧਾਰੀ ਹੋਈ ਹੈ।