ਯੁਕਰੇਨ ਭਾਰਤ ਦੇ ਸਟੈਂਡ ਤੋਂ ਅਸੰਤੁਸ਼ਟ

ਨਵੀਂ ਦਿੱਲੀ-ਦੇਸ਼ ‘ਤੇ ਹਮਲੇ ਦੇ ਕੁਝ ਘੰਟਿਆਂ ਬਾਅਦ , ਭਾਰਤ ਵਿੱਚ ਯੂਕਰੇਨ ਦੇ ਰਾਜਦੂਤ, ਇਗੋਰ ਪੋਲੀਖਾ ਨੇ ਕਿਹਾ ਕਿ ਕੀਵ ਰੂਸੀ ਹਮਲੇ ‘ਤੇ ਭਾਰਤ ਦੀ ਸਥਿਤੀ ਤੋਂ “ਬਹੁਤ ਹੀ ਅਸੰਤੁਸ਼ਟ” ਹੈ। ਭਾਰਤ ਦੇ ਸਮਰਥਨ ਲਈ “ਅਰਦਾਸ” ਕਰਦੇ ਹੋਏ, ਉਸਨੇ ਕਿਹਾ, “ਮੈਨੂੰ ਨਹੀਂ ਪਤਾ ਕਿ ਕਿੰਨੇ ਵਿਸ਼ਵ ਨੇਤਾ ਪੁਤਿਨ ਦੀ ਗੱਲ ਸੁਣ ਸਕਦੇ ਹਨ ਪਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜੀ ਦੀ ਸਥਿਤੀ ਮੈਨੂੰ ਆਸਵੰਦ ਕਰਦੀ ਹੈ”। ਯੂਕ੍ਰੇਨ ਦੇ ਰਾਜਦੂਤ ਇਗੋਰ ਪੋਲਿਖਾ ਨੇ ਹਾਲਾਤ ਨੂੰ ਸੁਲਝਾਉਣ ਲਈ ਭਾਰਤ ਤੋਂ ਸਮਰਥਨ ਦੀ ਮੰਗ ਕੀਤੀ। ਯੂਕ੍ਰੇਨ ਦੇ ਰਾਜਦੂਤ ਨੇ ਕਿਹਾ ਕਿ ਭਾਰਤ ਦੇ ਰੂਸ ਨਾਲ ਖ਼ਾਸ ਸਬੰਧ ਹਨ ਅਤੇ  ਰੂਸ ਨਾਲ ਜੋ ਸਾਡੇ ਹਾਲਾਤ ਬਣੇ ਹਨ, ਉਸ ਨੂੰ ਘੱਟ ਕਰਨ ਲਈ ਸਰਗਰਮ ਭੂਮਿਕਾ ਨਿਭਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਗਿਣੇ-ਚੁਣੇ ਨੇਤਾਵਾਂ ’ਚੋਂ  ਇਕ ਹਨ, ਜਿਨ੍ਹਾਂ ਦੀ ਗੱਲ ਰਾਸ਼ਟਰਪਤੀ ਵਲਾਦਿਮੀਰ ਪੁਤਿਨ ਸੁਣਦੇ ਹਨ ਅਤੇ ਸਥਿਤੀ ਨੂੰ ਕੰਟਰੋਲ ਕਰਨ ਲਈ ਮਾਸਕੋ ਨਾਲ ਆਪਣੇ ਨੇੜਲੇ ਸਬੰਧਾਂ ਦਾ ਇਸਤੇਮਾਲ ਕਰ ਸਕਦੇ ਹਨ। ਰਾਜਦੂਤ ਨੇ ਅੱਗੇ ਕਿਹਾ ਕਿ ਯੂਕ੍ਰੇਨ ਸੰਕਟ ’ਤੇ ਭਾਰਤ ਦੇ ਰਵੱਈਏ ਦਾ ਅਨੁਸਰਣ ਕਰ ਰਿਹਾ ਹੈ ਅਤੇ ਉਹ ਇਸ ਤੋਂ ਬੇਹੱਦ ਅਸੰਤੁਸ਼ਟ ਹਨ। ਉਨ੍ਹਾਂ ਦੀ ਇਸ ਟਿੱਪਣੀ ਦੇ ਇਕ ਦਿਨ ਰੂਸੀ ਮਿਸ਼ਨ ਦੇ ਉੱਪ ਮੁਖੀ ਰੋਮਨ ਬਾਬੁਸ਼ਿਕਨ ਨੇ ਕਿਹਾ ਕਿ ਭਾਰਤ ਇਕ ਜ਼ਿੰਮੇਵਾਰ ਗਲੋਬਲ ਸ਼ਕਤੀ ਦੇ ਰੂਪ ਵਿਚ ਇਕ ਮਹੱਤਵਪੂਰਨ ਭੂਮਿਕਾ ਨਿਭਾ ਰਿਹਾ ਹੈ ਅਤੇ ਇਹ ਗਲੋਬਲ ਮਾਮਲਿਆਂ ਲਈ ‘ਆਜ਼ਾਦ ਅਤੇ ਸੰਤੁਲਿਤ’ ਦ੍ਰਿਸ਼ਟੀਕੋਣ ਰੱਖਦਾ ਹੈ। ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਦੀ ਸੋਮਵਾਰ ਰਾਤ ਐਮਰਜੈਂਸੀ ਬੈਠਕ ’ਚ ਭਾਰਤ ਨੇ ਸਾਰੇ ਪੱਖਾਂ ’ਤੇ ਸੰਜਮ ਵਰਤਣ ਦੀ ਅਪੀਲ ਕੀਤੀ ਸੀ। ਇਸ ਬੈਠਕ ’ਚ ਤਣਾਅ ਘੱਟ ਕਰਨ ’ਤੇ ਗੱਲਬਾਤ ਕੀਤੀ ਗਈ ਸੀ। ਇਸ ਦਾ ਉਦੇਸ਼ ਖੇਤਰ ਅਤੇ ਇਸ ਤੋਂ ਬਾਹਰ ਲੰਬੇ ਸਮੇਂ ਦੀ ਸ਼ਾਂਤੀ ਅਤੇ ਸਥਿਰਤਾ ਨੂੰ ਸੁਰੱਖਿਅਤ ਕਰਨਾ ਹੈ।