ਮੁੜ ਖੁੱਲ੍ਹੇ ਅਫਗਾਨਿਸਤਾਨ ”ਚ ਕੁੜੀਆਂ ਲਈ ਸਕੂਲ

ਕਾਬੁਲ : ਸੱਤਾ ‘ਚ ਆਉਂਦੇ ਹੀ ਤਾਲਿਬਾਨ ਨੇ ਕੁੜੀਆਂ ਦੀ ਸਿੱਖਿਆ ‘ਤੇ ਪਾਬੰਧੀ ਲਗਾ ਦਿੱਤੀ ਸੀ, ਜਿਸ ਨੂੰ ਹੁਣ ਹਟਾ ਲਿਆ ਗਿਆ ਹੈ। ਬੀਤੇ ਦਿਨ ਰਾਜਧਾਨੀ ਕਾਬੁਲ ਵਿਚ ਕਈ ਕੁੜੀਆਂ ਸਕੂਲ ਵਿਚ ਵਾਪਸ ਜਾਂਦੀਆਂ ਦਿਖਾਈ ਦਿੱਤੀਆਂ। ਜ਼ਿਕਰਯੋਗ ਹੈ ਕਿ ਅਫਗਾਨਿਸਤਾਨ ਵਿਚ ਤਾਲਿਬਾਨ ਸਰਕਾਰ ਨੂੰ ਆਏ ਹੋਏ 7 ਮਹੀਨੇ ਤੋਂ ਜ਼ਿਆਦਾ ਸਮਾਂ ਹੋ ਚੁੱਕਾ ਹੈ  ਪਰ ਸੈਕੰਡਰੀ ਸਕੂਲਾਂ ਨੂੰ ਮੁੜ ਖੋਲ੍ਹਣ ਦਾ ਫ਼ੈਸਲਾ ਹੁਣ ਲਿਆ ਗਿਆ ਹੈ। ਪਿਛਲੇ ਸਾਲ ਕੋਵਿਡ-19 ਮਹਾਮਾਰੀ ਕਾਰਨ ਸਾਰੇ ਸਕੂਲ ਬੰਦ ਕਰ ਦਿੱਤੇ ਗਏ ਸਨ ਪਰ ਸਿਰਫ ਮੁੰਡਿਆਂ ਅਤੇ ਕੁਝ ਘੱਟ ਉਮਰ ਦੀਆਂ ਕੁੜੀਆਂ ਨੂੰ ਹੀ ਦੋ ਮਹੀਨੇ ਬਾਅਦ ਕਲਾਸਾਂ ਵਿਚ ਜਾਣ ਦੀ ਇਜਾਜ਼ਤ ਦਿੱਤੀ ਗਈ ਸੀ। ਅੰਤਰਰਾਸ਼ਟਰੀ ਭਾਈਚਾਰੇ ਨੇ ਸਿੱਖਿਆ ਦੇ ਅਧਿਕਾਰ ਨੂੰ ਨਵੇਂ ਸ਼ਾਸਨ ਦੀ ਸਹਾਇਤਾ ਅਤੇ ਮਾਨਤਾ ‘ਤੇ ਗੱਲਬਾਤ ਵਿਚ ਇਕ ਮਹੱਤਵਪੂਰਨ ਬਿੰਦੂ ਬਣਾ ਦਿੱਤਾ ਹੈ। ਕਈ ਦੇਸ਼ਾਂ ਅਤੇ ਸੰਗਠਨਾਂ ਨੇ ਅਧਿਆਪਕਾਂ ਨੂੰ ਭੁਗਤਾਨ ਕਰਨ ਦੀ ਪੇਸ਼ਕਸ਼ ਕੀਤੀ ਹੈ। ਸਿੱਖਿਆ ਮੰਤਰਾਲੇ  ਜਾਣਕਰੀ ਦਿੱਤੀ ਕਿ ਰਾਜਧਾਨੀ ਕਾਬੁਲ ਸਮੇਤ ਕਈ ਸੂਬਿਆਂ ਵਿਚ ਸਕੂਲ ਮੁੜ ਖੁੱਲ੍ਹਣਗੇ ਪਰ ਤਾਲਿਬਾਨ ਦੇ ਅਧਿਆਤਮਿਕ ਕੇਂਦਰ ਕੰਧਾਰ ਦੇ ਦੱਖਣੀ ਖੇਤਰ ਵਿਚ ਅਗਲੇ ਮਹੀਨੇ ਤੱਕ ਸਕੂਲ ਨਹੀਂ ਖੁੱਲ੍ਹਣਗੇ। ਸਮਾਚਾਰ ਏਜੰਸੀ ਏ.ਐੱਫ.ਪੀ. ਦੀਆਂ ਟੀਮਾਂ ਨੇ ਕੁਝ ਕੁੜੀਆਂ ਨੂੰ ਰਾਜਧਾਨੀ ਦੇ ਕਈ ਸਕੂਲਾਂ ਵਿਚ ਦਾਖਲ ਹੋਣ ਦੀ ਜਾਣਕਾਰੀ ਦਿੱਤੀ ਹੈ। ਏ.ਐੱਫ.ਪੀ. ਨੇ ਇਕ ਰਿਪੋਰਟ ਵਿਚ ਦੱਸਿਆ ਕਿ ਸੈਂਕੜੇ ਲੋਕ ਸਵੇਰੇ 7 ਵਜੇ ਜਰਘੋਨਾ ਹਾਈ ਸਕੂਲ ਵਿਚ ਪਹੁੰਚੇ, ਜੋ ਰਾਜਧਾਨੀ ਦੇ ਸਭ ਤੋਂ ਵੱਡੇ ਸਕੂਲਾਂ ਵਿਚੋਂ ਇਕ ਹੈ। ਰਾਜਧਾਨੀ ਦੇ ਰਾਬੀਆ ਬਾਲਖ਼ੀ ਸਕੂਲ ਵਿਚ ਵੀ ਦਰਜਨਾਂ ਕੁੜੀਆਂ ਗੇਟ ਦੇ ਬਾਹਰ ਇੰਤਜ਼ਾਰ ਕਰ ਰਹੀਆਂ ਸਨ। ਹੋਰ ਸੂਬਿਆਂ ਜਿਵੇਂ ਹੇਰਾਤ ਅਤੇ ਪੰਜਸ਼ੀਰ ਵਿਚ ਸਕੂਲ ਹਾਲੇ ਵੀ ਖੁੱਲ੍ਹਣੇ ਬਾਕੀ ਹਨ। ਮੰਤਰਾਲੇ ਨੇ ਕਿਹਾ ਕਿ ਸਕੂਲਾਂ ਨੂੰ ਮੁੜ ਖੋਲ੍ਹਣਾ ਹਮੇਸ਼ਾ ਇਕ ਸਰਕਾਰੀ ਉਦੇਸ਼ ਸੀ ਅਤੇ ਤਾਲਿਬਾਨ ਦਬਾਅ ਦੇ ਅੱਗੇ ਨਹੀਂ ਝੁੱਕ ਰਿਹਾ ਸੀ। ਮੰਤਰਾਲੇ ਦੇ ਬੁਲਾਰੇ ਅਜੀਜ਼ ਅਹਿਮਦ ਰਾਇਨ ਨੇ ਕਿਹਾ ਕਿ ਅਸੀਂ ਅੰਤਰਰਾਸ਼ਟਰੀ ਭਾਈਚਾਰੇ ਨੂੰ ਖੁਸ਼ ਕਰਨ ਲਈ ਸਕੂਲਾਂ ਨੂੰ ਮੁੜ ਤੋਂ ਨਹੀਂ ਖੋਲ੍ਹ ਰਹੇ ਹਾਂ ਅਤੇ ਨਾ ਹੀ ਦੁਨੀਆ ਤੋਂ ਪਛਾਣ ਹਾਸਲ ਕਰਨ ਲਈ ਅਜਿਹਾ ਕਰ ਰਹੇ ਹਾਂ। ਉਹਨਾਂ ਨੇ ਦੱਸਿਆ ਕਿ ਅਸੀਂ ਆਪਣੇ ਵਿਦਿਆਰਥੀਆਂ ਨੂੰ ਸਿੱਖਿਆ ਅਤੇ ਹੋਰ ਸਹੂਲਤਾਂ ਪ੍ਰਦਾਨ ਕਰਨ ਦੀ ਆਪਣੀ ਜ਼ਿੰਮੇਵਾਰੀ ਦੇ ਤਹਿਤ ਅਜਿਹਾ ਕਰ ਰਹੇ ਹਾਂ। ਤਾਲਿਬਾਨ ਨੇ ਜ਼ੋਰ ਦੇ ਕੇ ਕਿਹਾ ਕਿ ਉਹ ਇਹ ਯਕੀਨੀ ਕਰਨਾ ਚਾਹੁੰਦੇ ਹਨ ਕਿ 12 ਤੋਂ 18 ਸਾਲ ਦੀਆਂ ਕੁੜੀਆਂ ਲਈ ਸਕੂਲ ਵੱਖ-ਵੱਖ ਹੋਣ ਅਤੇ ਇਸਲਾਮੀ ਸਿਧਾਂਤਾਂ ਮੁਤਾਬਕ ਕੰਮ ਕਰਨ।