ਮਹਾਤਮਾ ਗਾਂਧੀ ਦੀ ਪੋਤੀ ਊਸ਼ਾ ਗੋਕਨੀ ਚਲ ਵਸੀ

ਮੁੰਬਈ-ਮਣੀ ਭਵਨ ਦੇ ਕਾਰਜਕਾਰੀ ਸਕੱਤਰ ਮੇਘਸ਼ਿਆਮ ਅਜਗਾਂਵਕਰ ਨੇ ਦੱਸਿਆ ਕਿ ਮਹਾਤਮਾ ਗਾਂਧੀ ਦੀ ਪੋਤੀ ਊਸ਼ਾ ਗੋਕਨੀ ਦਾ ਮੰਗਲਵਾਰ ਨੂੰ ਮੁੰਬਈ ’ਚ ਦਿਹਾਂਤ ਹੋ ਗਿਆ। 89 ਸਾਲਾ ਗੋਕਨੀ ਪਿਛਲੇ 5 ਸਾਲਾਂ ਤੋਂ ਬੀਮਾਰ ਸਨ। ਗੋਕਨੀ ਗਾਂਧੀ ਮੈਮੋਰੀਅਲ ਫੰਡ, ਮੁੰਬਈ ਦੇ ਸਾਬਕਾ ਚੇਅਰਪਰਸਨ ਸਨ, ਜੋ ਕਿ ਮਣੀ ਭਵਨ ’ਚ ਸਥਿਤ ਹੈ। ਮਣੀ ਭਵਨ ਦਾ ਭਾਰਤ ਦੇ ਸੁਤੰਤਰਤਾ ਸੰਗਰਾਮ ਦੇ ਇਤਿਹਾਸ ’ਚ ਵਿਸ਼ੇਸ਼ ਮਹੱਤਵ ਹੈ। ਗੋਕਨੀ ਨੇ ਆਪਣਾ ਬਚਪਨ ਵਰਧਾ ਦੇ ਸੇਵਾਗ੍ਰਾਮ ਆਸ਼ਰਮ ’ਚ ਬਿਤਾਇਆ, ਜਿਸ ਦੀ ਸਥਾਪਨਾ ਮਹਾਤਮਾ ਗਾਂਧੀ ਨੇ ਕੀਤੀ ਸੀ।
ਮਹਾਤਮਾ ਗਾਂਧੀ ਅਕਸਰ 1917 ਤੋਂ 1934 ਤੱਕ ਮਣੀ ਭਵਨ ਵਿੱਚ ਠਹਿਰੇ ਰਹੇ ਅਤੇ ਇਹ ਦੇਸ਼ ਦੇ ਆਜ਼ਾਦੀ ਸੰਘਰਸ਼ ਦੀ ਗਾਥਾ ਵਿੱਚ ਕੁਝ ਮਹੱਤਵਪੂਰਨ ਫ਼ੈਸਲਿਆਂ ਤੇ ਸ਼ਕਤੀਸ਼ਾਲੀ ਅੰਦੋਲਨਾਂ ਦਾ ਗਵਾਹ ਰਿਹਾ ਹੈ। ਗਾਂਧੀ ਮੈਮੋਰੀਅਲ ਫੰਡ ਮੁੰਬਈ ਅਤੇ ਮਣੀ ਭਵਨ ਗਾਂਧੀ ਮਿਊਜ਼ੀਅਮ ਮਣੀ ਭਵਨ ‘ਚ ਗਾਂਧੀਵਾਦੀ ਸਿੱਖਿਆਵਾਂ ਦੇ ਪ੍ਰਚਾਰ ਵਿੱਚ ਲੱਗੇ 2 ਸੰਗਠਨ ਹਨ। ਇਸ ਖਬਰ ਨਾਲ ਇਲਾਕੇ ਵਿੱਚ ਸੋਗ ਦੀ ਲਹਿਰ ਹੈ।