ਬੁਰਰਰਆਆਆਆਆ… ਵੋਟਾਂ ਕਾਹਦੀਆਂ ਆਈਆਂ ਸਾਡੀ ਤਾਂ ਹਵਾ ਵੀ ਸ਼ਰਾਬੀ ਹੋ ਗਈ

ਪਿੰਡਾਂ ਚ ਨਜੈਜ਼ ਵਿਕਦੀ…

ਦੁੱਧ ਵਾਲੇ ਡਰੰਮਾਂ ਚ ਢੋਈ ਜਾ ਰਹੀ ਹੈ ਲਾਲਪਰੀ

ਚੰਡੀਗੜ-ਚੋਣ ਕਮਿਸ਼ਨ ਜਿੰਨੀ ਮਰਜ਼ੀ ਸਖਤੀ ਕਰ ਲਵੇ, ਪੁਲਸ ਪ੍ਰਸ਼ਾਸਨ ਜਿੰਨੇ ਮਰਜ਼ੀ ਦਾਅਵੇ ਕਰ ਲਵੇ ਸਿਆਸੀ ਪਾਰਟੀਆਂ ਜੋ ਮਰਜ਼ੀ ਸਹੁੰਆਂ ਖਾਈ ਜਾਣ, ਪਰ ਇਹ ਕੌੜਾ ਸੱਚ ਹੈ ਕਿ ਪੰਜਾਬ ਚੋਣਾਂ ਭਾਵੇਂ ਮੁਹੱਲੇ ਦੇ ਪ੍ਰਧਾਨ ਦੀਆਂ ਹੋਣ, ਭਾਵੇਂ ਸੂਬਾ ਸਰਕਾਰ ਚੁਣਨ ਵਾਲੀਆਂ ਲਾਲਪਰੀ ਬਿਨਾ ਰੰਗ ਨਹੀਂ ਬੱਝਦਾ। ਹੁਣ ਵੀ ਜੋ ਰਿਪੋਰਟਾਂ ਆ ਰਹੀਆਂ ਹਨ, ਉਹਨਾਂ ਮੁਤਾਬਕ ਵਿਧਾਨ ਸਭਾ ਚੋਣਾਂ ’ਚ ਵੋਟਰਾਂ ਨੂੰ ਲਲਚਾਉਣ ਲਈ ਸਿਆਸੀ ਪਾਰਟੀਆਂ ਦੇ ਆਗੂ ਇਸ ਵਾਰ ਵੀ ਸ਼ਰਾਬ ਦਾ ਸਹਾਰਾ ਲੈਣ ਦੀ ਤਿਆਰੀ ਵਿਚ ਹਨ। ਪ੍ਰਸ਼ਾਸਨ ਦੇ ਸਖ਼ਤੀ ਦੇ ਦਾਅਵਿਆਂ ਦੇ ਬਾਵਜੂਦ ਪਿੰਡਾਂ ਵਿਚ ਦੇਸੀ ਸ਼ਰਾਬ ਬਣਾਉਣ ਦਾ ਦੌਰ ਵੀ ਸ਼ੁਰੂ ਹੋ ਚੁੱਕਾ ਹੈ। ਸ਼ਾਮ ਹੁੰਦੇ ਹੀ ਪਿੰਡਾਂ ਵਿਚ ਦੇਸੀ ਸ਼ਰਾਬ ਦੀਆਂ ਨਾਜਾਇਜ਼ ਭੱਠੀਆਂ ’ਚੋਂ ਉੱਠਦਾ ਧੂੰਆਂ ਆਮ ਦੇਖਿਆ ਜਾ ਸਕਦਾ ਹੈ। ਤਰਨਤਾਰਨ ਵਿੱਚ ਜੁਲਾਈ 2020 ’ਚ ਜ਼ਹਿਰੀਲੀ ਸ਼ਰਾਬ ਪੀਣ ਨਾਲ ਸੌ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਸੀ। ਇਸ ਦੇ ਬਾਵਜੂਦ ਨਾ ਤਾਂ ਸਰਕਾਰ ਜਾਗੀ ਹੈ ਅਤੇ ਨਾ ਹੀ ਲੋਕਾਂ ਦੀ ਅੱਖ ਖੁੱਲ੍ਹੀ ਹੈ। ਵਿਸ਼ੇਸ਼ ਗੱਲ ਇਹ ਹੈ ਕਿ ਜ਼ਹਿਰੀਲੀ ਸ਼ਰਾਬ ਪੀਣ ਨਾਲ ਵੀਹ ਦੇ ਲਗਪਗ ਲੋਕਾਂ ਦੀਆਂ ਅੱਖਾਂ ਦੀ ਰੋਸ਼ਨੀ ਵੀ ਚਲੀ ਗਈ ਸੀ। ਸਰਕਾਰ ਨੇ ਸਿਰਫ ਐੱਸਆਈਟੀ ਦਾ ਗਠਨ ਕਰਕੇ ਅਤੇ ਪੀਡ਼ਤ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇ ਕੇ ਆਪਣੇ ਕਰਤੱਵਾਂ ਦੀ ਪੂਰਤੀ ਕਰ ਲਈ। ਨਾਜਾਇਜ਼ ਸ਼ਰਾਬ ਦਾ ਧੰਦਾ ਰੋਕਣ ਲਈ ਕੋਈ ਠੋਸ ਯਤਨ ਨਹੀਂ ਕੀਤਾ ਗਿਆ। ਸਿੱਟੇ ਵਜੋਂ ਪਿੰਡਾਂ ਵਿਚ ਦੇਸੀ ਸ਼ਰਾਬ ਧਡ਼ੱਲੇ ਨਾਲ ਬਣਨ ਲੱਗੀ ਹੈ। ਇਹ ਬਣ ਰਹੀ ਦੇਸੀ ਸ਼ਰਾਬ ਹੁੰਦੀ ਵੀ ਘਟੀਆ ਕਿਸਮ ਦੀ ਹੈ, ਮੌਤ ਨੂੰ ਸੱਦਾ ਦੇਣ ਵਾਲੀ। ਥਿਨਰ ਤੇ ਅਲਕੋਹਲ ਮਿਲਾ ਕੇ ਨਾਜਾਇਜ਼ ਸ਼ਰਾਬ ਤਿਆਰ ਕੀਤੀ ਜਾਂਦੀ ਹੈ। 50 ਲੀਟਰ ਅਲਕੋਹਲ ਤੋਂ 200 ਤੋਂ ਵੱਧ ਬੋਤਲਾਂ ਸ਼ਰਾਬ ਤਿਆਰ ਕੀਤੀ ਜਾਂਦੀ ਹੈ। ਅਜਿਹੀ ਹੀ ਸ਼ਰਾਬ ਪੀਣ ਨਾਲ ਸਾਲ 2020 ਵਿਚ ਸੌ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਸੀ। ਇਸ ਮਾਮਲੇ ਵਿਚ ਲਗਪਗ 30 ਲੋਕਾਂ ਦੀ ਗ੍ਰਿਫਤਾਰੀ ਹੋਈ। ਕੇਸ ਹਾਲੇ ਅਦਾਲਤ ਵਿਚ ਚੱਲ ਰਿਹਾ ਹੈ। ਇਕ ਰਿਪੋਰਟ ਮੁਤਾਬਕ ਤਰਨਤਾਰਨ ਦੇ ਪਿੰਡ ਪੰਡੋਰੀ ਗੋਲਾ, ਕੰਗ, ਲੌਹਕਾ, ਘਰਿਆਲਾ, ਸ਼ਕਰੀ, ਸਰਹਾਲੀ ਕਲਾਂ, ਸ਼ੇਰੋਂ, ਸੰਘਰਕੋਟ, ਪੱਖੋਕੇ, ਢੋਟੀਆਂ, ਬੁੱਗਾ, ਪਲਾਸੌਰ, ਡਾਲੇਕੇ, ਸ਼ਾਹਬਾਜ਼ਪੁਰ, ਮਾਣਚੋਹਲ, ਘਡ਼ਕਾ, ਕੀਡ਼ੀਆਂ,ਹਰੀਕੇ ਪੱਤਣ, ਮਹਿੰਦੀਪੁਰ ਤੇ ਕਾਲੀਆਂ ਸਕੱਤਰਾਂ ਸਮੇਤ ਦੋ ਦਰਜਨ ਅਜਿਹੇ ਪਿੰਡ ਹਨ ਜਿੱਥੇ ਬਣੀ ਦੇਸੀ ਸ਼ਰਾਬ ਹੋਰਨਾਂ ਜ਼ਿਲ੍ਹਿਆਂ ਵਿਚ ਵੀ ਸਪਲਾਈ ਹੁੰਦੀ ਹੈ। ਰਾਤ ਨੂੰ ਤਿਆਰ ਕੀਤੀ ਗਈ ਸ਼ਰਾਬ ਦਿਨ ਦੇ ਉਜਾਲੇ ਵਿਚ ਦੁੱਧ ਦੀ ਸਪਲਾਈ ਦੇ ਬਹਾਨੇ ਕੇਨੀਆਂ ਜ਼ਰੀਏ ਗਾਹਕਾਂ ਤਕ ਪਹੁੰਚਾਈ ਜਾਂਦੀ ਹੈ। ਨਾਜਾਇਜ਼ ਸ਼ਰਾਬ ਦੇ ਧੰਦੇ ਨੂੰ ਰੋਕਣ ਲਈ ਕੀ ਕਦਮ ਚੁੱਕੇ ਜਾ ਰਹੇ ਹਨ। ਇਸ ਸਵਾਲ ’ਤੇ ਆਬਕਾਰੀ ਵਿਭਾਗ ਤੇ ਪੁਲਿਸ ਦਾ ਹਮੇਸ਼ਾ ਇਹੀ ਦਾਅਵਾ ਹੁੰਦਾ ਹੈ ਕਿ ਨਾਜਾਇਜ਼ ਸ਼ਰਾਬ ਬਣਾਉਣ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾ ਰਹੀ ਹੈ।  ਨਾਜਾਇਜ਼ ਸ਼ਰਾਬ ਦੇ ਵਪਾਰੀਆਂ ’ਤੇ ਸ਼ਿਕੰਜਾ ਕੱਸਣ ਲਈ ਹੋਰ ਟੀਮਾਂ ਤਾਇਨਾਤ ਕੀਤੀਆਂ ਜਾ ਰਹੀਆਂ ਹਨ। ਓਧਰ ਐੱਸਐੱਸਪੀ ਹਰਵਿੰਦਰ ਸਿੰਘ ਵਿਰਕ ਕਹਿੰਦੇ ਹਨ ਕਿ ਸਾਰੇ ਥਾਣਾ ਮੁਖੀਆਂ ਨੂੰ ਆਦੇਸ਼ ਦਿੱਤੇ ਗਏ ਹਨ ਕਿ ਨਾਜਾਇਜ਼ ਸ਼ਰਾਬ ਦੇ ਮਾਮਲੇ ਵਿਚ ਸਖ਼ਤ ਕਾਰਵਾਈ ਕੀਤੀ ਜਾਵੇ। ਕੋਈ ਲਾਪਰਵਾਹੀ ਨਾ ਵਰਤੀ ਜਾਵੇ। ਪਰ ਹਕੀਕਤ ਤਾਂ ਪਿੰਡਾਂ ਚ ਵੜ ਕੇ ਹੀ ਪਤਾ ਲੱਗ ਜਾਂਦੀ ਹੈ।