ਬੀ. ਐੱਸ. ਐੱਫ. ਨੇ ਅਫਗਾਨੀ ਟਰੱਕ ’ਚੋਂ ਮਿਲੇ ਡੈਟੋਨੇਟਰ ਨੂੰ ਕੀਤਾ ਡਿਫਿਊਜ਼

ਅੰਮ੍ਰਿਤਸਰ-ਅਟਾਰੀ ਬਾਰਡਰ ਉੱਤੇ ਅਫਗਾਨਿਸਤਾਨ ਤੋਂ ਆਉਣ ਵਾਲੇ ਗੰਢੇ ਦੇ ਟਰੱਕ ਵਿਚ ਕਸਟਮ ਵਿਭਾਗ ਨੂੰ ਵਿਦੇਸ਼ੀ ਪਟਾਕਿਆਂ ਦੀ ਖੇਪ ਅਤੇ ਡੈਟੋਨੇਟਰ ਬਰਾਮਦ ਹੋਏ ਹਨ। ਬਰਾਮਦ ਹੋਏ ਪਟਾਕੇ ਤੇ ਡੈਟੋਨੇਟਰ ਦੇਖਣ ਵਿਚ ਵਿਸਫੋਟਕ ਸਮੱਗਰੀ ਲੱਗ ਰਹੀ ਸੀ। ਇਸ ਤੋਂ ਕੁੱਝ ਸਮੇਂ ਲਈ ਤਾਂ ਆਈ. ਸੀ. ਪੀ. ਉੱਤੇ ਸਨਸਨੀ ਫੈਲ ਗਈ ਅਤੇ ਸਾਰੇ ਵਿਭਾਗਾਂ ਦੇ ਦਫ਼ਤਰ ਵੀ ਖਾਲੀ ਕਰਵਾ ਦਿੱਤੇ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ ਪੁਲਸ ਨੂੰ ਵੀ ਸੂਚਿਤ ਕੀਤਾ ਗਿਆ ਅਤੇ ਬੀ. ਐੱਸ. ਐੱਫ. ਦਾ ਬੰਬ ਸਕੁਐਡ ਵੀ ਬੁਲਾਇਆ ਗਿਆ। ਬੀ. ਐੱਸ. ਐੱਫ. ਦੇ ਬੰਬ ਸਕੁਐਡ ਨੇ ਸਾਰੀ ਜਾਂਚ ਕਰਨ ਤੋਂ ਬਾਅਦ ਵਿਦੇਸ਼ੀ ਪਟਾਕਿਆਂ ਅਤੇ ਡੈਟੋਨੇਟਰ ਨੂੰ ਡਿਫਿਊਜ ਕਰ ਦਿੱਤਾ।
ਅਧਿਕਾਰੀਆਂ ਅਨੁਸਾਰ ਪਾਕਿਸਤਾਨ ਜਾਂ ਅਫਗਾਨਿਸਤਾਨ ਦੇ ਅੱਤਵਾਦੀ ਸੰਗਠਨਾਂ ਨੇ ਆਈ. ਸੀ. ਪੀ. ਉੱਤੇ ਖੌਫ ਪੈਦਾ ਕਰਨ ਲਈ ਇਹ ਹਰਕਤ ਕੀਤੀ ਹੈ। ਡੈਟੋਨੇਟਰ ਨਾਲ ਹੋਣ ਕਾਰਨ ਵੇਖਣ ਵਾਲਿਆਂ ਨੂੰ ਇਹੀ ਲੱਗਾ ਕਿ ਕੋਈ ਭਾਰੀ ਵਿਸਫੋਟਕ ਸਮੱਗਰੀ ਟਰੱਕ ਵਿਚ ਰੱਖੀ ਗਈ ਹੈ ਅਤੇ ਆਈ. ਸੀ. ਪੀ. ਨੂੰ ਉਡਾਉਣ ਦੀ ਸਾਜ਼ਿਸ਼ ਕੀਤੀ ਗਈ ਹੈ। ਵਿਦੇਸ਼ੀ ਪਟਾਕੇ ਤਾਇਵਾਨ ਦੇ ਨਿਰਮਿਤ ਸਨ ਅਤੇ ਹਵਾ ਵਿਚ ਉੱਡ ਕੇ ਫਟਦੇ ਸਨ, ਜਿਵੇਂ ਭਾਰਤੀ ਪਟਾਕਿਆਂ ਵਿਚ ਸ਼ਾਟਸ ਹਵਾ ਵਿਚ ਜਾ ਕੇ ਫਟਦਾ ਹੈ ਅਤੇ ਰੰਗ ਬਿਖੇਰਦਾ ਹੈ।