ਪੱਛਮੀ ਦੇਸ਼ਾਂ ਦੀਆਂ ਨੀਤੀਆਂ ਨੂੰ ਜੁਆਬ ਹੈ ਯੂਕਰੇਨ ਚ ਕਾਰਵਾਈ-ਪੁਤਿਨ

ਮਾਸਕੋ- ਹਾਲ ਹੀ ਵਿੱਚ ਰੂਸ ਨੇ ਵਿਜੈ ਦਿਵਸ ਮਨਾਇਆ। ਇਸ ਮੌਕੇ ਯੂਕਰੇਨ ਯੂੱਧ ਨੂੰ ਪੁਤਿਨ ਨੇ ਜਾਇਜ਼ ਦੱਸਿਆ ਹੈ। ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਯੂਕ੍ਰੇਨ ਵਿੱਚ ਰੂਸ ਦੀ ਫ਼ੌਜੀ ਕਾਰਵਾਈ ਨੂੰ ਪੱਛਮੀ ਨੀਤੀਆਂ ਦਾ ਜਵਾਬ ਦੱਸਿਆ ਹੈ। ਅਸਲ ਵਿੱਚ ਰੂਸ ਦੂਜੇ ਵਿਸ਼ਵ ਯੁੱਧ ਵਿੱਚ ਨਾਜ਼ੀਆਂ ‘ਤੇ ਪੁਰਾਣੇ ਸੋਵੀਅਤ ਯੂਨੀਅਨ ਦੀ ਜਿੱਤ ਦੀ ਯਾਦ ਵਿੱਚ ‘ਵਿਜੈ ਦਿਵਸ’ ਮਨਾਉਂਦਾ ਹੈ। ਇਹ ਜਿੱਤ 9 ਮਈ ਨੂੰ ਮਿਲੀ ਸੀ। ਪੁਤਿਨ ਨੇ ਨਾਜ਼ੀ ਫ਼ੌਜਾਂ ਵਿਰੁੱਧ ‘ਰੈੱਡ ਆਰਮੀ’ ਦੀ ਲੜਾਈ ਦੀ ਤੁਲਨਾ ਯੂਕ੍ਰੇਨ ਵਿੱਚ ਰੂਸੀ ਫ਼ੌਜ ਦੀਆਂ ਕਾਰਵਾਈਆਂ ਨਾਲ ਕੀਤੀ। ਉਹਨਾਂ ਨੇ ਕਿਹਾ ਕਿ ਯੂਕ੍ਰੇਨ ਵਿੱਚ ਸੰਭਾਵੀ ਹਮਲੇ ਨੂੰ ਰੋਕਣ ਲਈ ਸਹੀ ਸਮੇਂ ‘ਤੇ ਕੀਤੀ ਗਈ ਕਾਰਵਾਈ ਢੁਕਵੀਂ ਹੈ। ਪੁਤਿਨ ਨੇ ਕਿਹਾ ਕਿ ਰੂਸੀ ਫ਼ੌਜੀ ਯੂਕ੍ਰੇਨ ਵਿੱਚ ਦੇਸ਼ ਦੀ ਸੁਰੱਖਿਆ ਲਈ ਲੜ ਰਹੇ ਹਨ। ਇਸ ਤੋਂ ਬਾਅਦ ਜੰਗ ਵਿੱਚ ਸ਼ਹੀਦ ਹੋਏ ਜਵਾਨਾਂ ਨੂੰ ਸ਼ਰਧਾਂਜਲੀ ਦਿੰਦਿਆਂ ਇੱਕ ਮਿੰਟ ਦਾ ਮੌਨ ਰੱਖਿਆ ਗਿਆ। ਹਰ ਸਾਲ ਦੀ ਤਰ੍ਹਾਂ ‘ਵਿਜੈ ਦਿਵਸ’ ਮੌਕੇ ਰੈੱਡ ਸਕੁਏਅਰ ਤੋਂ ਮਿਲਟਰੀ ਪਰੇਡ ਦਾ ਆਯੋਜਨ ਕੀਤਾ ਗਿਆ। ਟੈਂਕ, ਬਖਤਰਬੰਦ ਵਾਹਨ, ਵਿਸ਼ਾਲ ਅੰਤਰ-ਮਹਾਂਦੀਪੀ ਬੈਲਿਸਟਿਕ ਮਿਜ਼ਾਈਲਾਂ ਲੈ ਕੇ ਜਾਣ ਵਾਲੇ ਵਾਹਨ ਫ਼ੌਜੀ ਪਰੇਡ ਵਿੱਚ ਦੇਖੇ ਗਏ। ਇਸ ਸਾਲ ‘ਜਿੱਤ ਦਿਵਸ’ ‘ਤੇ ਫ਼ੌਜ ਅਤੇ ਹਥਿਆਰ ਘੱਟ ਦਿਖਾਈ ਦਿੱਤੇ ਕਿਉਂਕਿ ਇਸ ਸਮੇਂ ਯੂਕ੍ਰੇਨ ਵਿਚ ਰੂਸ ਦੀ ਫ਼ੌਜੀ ਕਾਰਵਾਈ ਚੱਲ ਰਹੀ ਹੈ ਅਤੇ ਇਸ ਦੀਆਂ ਜ਼ਿਆਦਾਤਰ ਫ਼ੌਜਾਂ ਅਤੇ ਹਥਿਆਰ ਯੂਕ੍ਰੇਨ ਅਤੇ ਇਸ ਦੀਆਂ ਸਰਹੱਦਾਂ ‘ਤੇ ਤਾਇਨਾਤ ਹਨ। ਇਸ ਖ਼ਾਸ ਮੌਕੇ ਪੁਤਿਨ ਨੇ 15 ਦੇਸ਼ਾਂ ਨੂੰ ਵਧਾਈ ਸੰਦੇਸ਼ ਭੇਜੇ ਹਨ। ਇਸ ਵਿੱਚ ਯੂਕ੍ਰੇਨ, ਅਜ਼ਰਬਾਈਜਾਨ, ਅਰਮੇਨੀਆ, ਬੇਲਾਰੂਸ, ਕਜ਼ਾਕਿਸਤਾਨ, ਕਿਰਗਿਸਤਾਨ, ਮੋਲਡੋਵਾ, ਤਜ਼ਾਕਿਸਤਾਨ, ਤੁਰਕਮੇਨਿਸਤਾਨ, ਉਜ਼ਬੇਕਿਸਤਾਨ, ਅਬਖਾਜ਼ੀਆ, ਦੱਖਣੀ ਓਸੇਟੀਆ, ਡੀਪੀਆਰ, ਐਲਪੀਆਰ ਅਤੇ ਜਾਰਜੀਆ ਸ਼ਾਮਲ ਹਨ।ਪੁਤਿਨ ਦੇ ਸੰਦੇਸ਼ ਵਿਚ ਕਿਹਾ ਗਿਆ ਹੈ ਕਿ – ‘ 1945 ਦੀ ਤਰ੍ਹਾਂ ਹੀ ਸਾਡੀ ਜਿੱਤ ਹੋਵੇਗੀ। ਸਾਡੇ ਪੂਰਵਜਾਂ ਵਾਂਗ, ਸਾਡੇ ਸਿਪਾਹੀ ਮਾਤ ਭੂਮੀ ਨੂੰ ਨਾਜ਼ੀਆਂ ਤੋਂ ਆਜ਼ਾਦ ਕਰਵਾਉਣ ਲਈ ਲੜ ਰਹੇ ਹਨ। ਅੱਜ ਸਾਡਾ ਫਰਜ਼ ਨਾਜ਼ੀਵਾਦ ਨੂੰ ਰੋਕਣਾ ਹੈ, ਜਿਸ ਕਾਰਨ ਵੱਖ-ਵੱਖ ਦੇਸ਼ਾਂ ਦੇ ਲੋਕਾਂ ਨੂੰ ਬਹੁਤ ਦੁੱਖ ਹੋਇਆ। ਮੈਨੂੰ ਉਮੀਦ ਹੈ ਕਿ ਨਵੀਂ ਪੀੜ੍ਹੀ ਆਪਣੇ ਪਿਤਾ ਅਤੇ ਦਾਦੇ ਦੀ ਯਾਦ ਦੇ ਯੋਗ ਹੋ ਸਕਦੀ ਹੈ।