ਪੰਨੂੰ ਨੇ ਸਿੱਧੂ ਤੇ ਡੀ ਜੀ ਪੀ ਪੰਜਾਬ ਨੂੰ ਦਿੱਤੀ ਧਮਕੀ!!

ਚੰਡੀਗੜ-ਪਾਬੰਦੀਸ਼ੁਦਾ ਸਿਖਸ ਫਾਰ ਜਸਟਿਸ ਦੇ ਗੁਰਪਤਵੰਤ ਸਿੰਘ ਪੰਨੂੰ ਦੀ ਇਕ ਕਥਿਤ ਧਮਕੀ ਵਾਲੀ ਆਡੀਓ ਵਾਇਰਲ ਹੋਈ ਹੈ।  ਆਡੀਓ ਵਿਚ ਕਥਿਤ ਤੌਰ ’ਤੇ ਪੰਨੂ ਡੀ. ਜੀ. ਪੀ. ਚੱਟੋਪਾਧਿਆਏ ਲਈ ਇਤਰਾਜ਼ਯੋਗ ਭਾਸ਼ਾ ਦੀ ਵਰਤੋਂ ਕਰ ਰਿਹਾ ਹੈ ਅਤੇ ਨਵਜੋਤ ਸਿੰਘ ਸਿੱਧੂ ਨੂੰ ਆਖ ਰਿਹਾ ਹੈ ਕਿ ਤੂੰ ਤਿਰੰਗੇ ਨਾਲ ਵਫਾਦਾਰੀ ਕਰ ਕੇ ਸਿੱਖ ਕੌਮ ਦੇ ਨੌਜਵਾਨਾਂ ਦਾ ਖ਼ਾਤਮਾ ਕਰਨ ਵਾਲੇ ਅਫਸਰ ਚੱਟੋਪਾਧਿਆਏ ਨੂੰ ਡੀ. ਜੀ. ਪੀ. ਲਗਵਾਇਆ ਹੈ। ਤਿਰੰਗੇ ਨਾਲ ਵਫਾਦਾਰੀ ਕਰਨ ਵਾਲਿਆਂ ਦੀਆਂ ਲਾਸ਼ਾਂ ਤਿਰੰਗੇ ਵਿਚ ਲਪੇਟੀਆਂ ਜਾਂਦੀਆਂ ਹਨ। ਇਤਿਹਾਸ ਦੇਖਦਾ ਹੈ ਕਿ ਸਾਬਕਾ ਮੁੱਖ ਮੰਤਰੀ ਦੀ ਲਾਸ਼ ਇਸੇ ਤਿਰੰਗੇ ਵਿਚ ਗਈ ਸੀ। ਅੱਗੇ ਨਵਜੋਤ ਸਿੰਘ ਸਿੱਧੂ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਹੈ ਕਿ ਤੂੰ ਸਿੱਖ ਕੌਮ ਨਾਲ ਦੁਸ਼ਮਣੀ ਮੁੱਲ ਲਈ ਹੈ। ਤੇਨੂੰ ਪੰਜਾਬ ਵਿਚ ਪਾਕਿਸਤਾਨ ਦੇ ਜਨਰਲ ਬਾਜਵਾ ਅਤੇ ਇਮਰਾਨ ਨੇ ਨਹੀਂ ਬਚਾਉਣਾ ਹੈ। ਸ਼ਹੀਦ ਦਿਲਾਵਰ ਦੇ ਕਦਮਾਂ ’ਤੇ ਚੱਲਣ ਵਾਲੇ ਤੇਰੇ ਨੇੜੇ-ਤੜੇ ਘੁੰਮਦੇ ਹਨ। ਤੇਰਾ ਖਾਤਮਾ ਜਲਦੀ ਹੋਵੇਗਾ।’’ ਅਜਿਹਾ ਪਹਿਲੀ ਵਾਰ ਨਹੀਂ ਜਦੋਂ ਇਸ ਤਰ੍ਹਾਂ ਦਾ ਆਡੀਓ ਜਾਰੀ ਹੋਇਆ ਹੋਵੇ, ਪੰਨੂ ਨੇ ਹਿਮਾਚਲ ਦੇ ਮੁੱਖ ਮੰਤਰੀ ਜੈਰਾਮ ਠਾਕੁਰ ਨੂੰ ਧਮਕੀ ਦਿੱਤੀ ਸੀ ਕਿ ਉਹ ਉਨ੍ਹਾਂ ਨੂੰ 15 ਅਗਸਤ ਨੂੰ ਤਿਰੰਗਾ ਨਹੀਂ ਲਹਿਰਾਉਣ ਦੇਣਗੇ। ਇਸ ਸੰਗਠਨ ’ਤੇ ਭਾਰਤ ਵਿਚ ਦੇਸ਼ ਵਿਰੋਧੀ ਸਰਗਰਮੀਆਂ ਚਲਾਉਣ ਦੇ ਦੋਸ਼ ਵਿਚ 10 ਜੁਲਾਈ, 2019 ਤੋਂ ਪਾਬੰਦੀ ਲੱਗੀ ਹੋਈ ਹੈ। ਦੋਸ਼ੀ ਨੇ ਸ਼ਿਮਲਾ ਦੇ ਪੱਤਰਕਾਰਾਂ ਤੇ ਹਿਮਾਚਲ ਦੇ ਕਈ ਨਾਗਰਿਕਾਂ ਨੂੰ ਧਮਕੀ ਭਰੇ ਆਡੀਓ ਸੰਦੇਸ਼ ਭੇਜੇ ਸਨ। ਜਿਸ ਵਿਚ ਕਿਹਾ ਗਿਆ ਸੀ ਕਿ ਐੱਸ. ਐੱਫ. ਜੇ. ਮੁੱਖ ਮੰਤਰੀ ਨੂੰ ਤਿਰੰਗਾ ਨਹੀਂ ਲਹਿਰਾਉਣ ਦੇਵੇਗਾ। ਇਸ ਵਿਚ ਕਿਹਾ ਗਿਆ ਸੀ ਕਿ ਪੰਜਾਬ ਤੋਂ ਬਾਅਦ ਹਿਮਾਚਲ ਵਿਚ ਵੀ ਕਬਜ਼ਾ ਕਰਨਗੇ, ਕਿਉਂਕਿ ਹਿਮਾਚਲ ਦਾ ਕੁਝ ਖੇਤਰ ਪੰਜਾਬ ਦਾ ਹਿੱਸਾ ਸੀ। ਐੱਸ. ਐੱਫ. ਜੇ. ਦੇ ਕਰਤਾ-ਧਰਤਾ ਗੁਰਪਤਵੰਤ ਸਿੰਘ ਪੰਨੂ ਦੇ ਖ਼ਿਲਾਫ਼ ਸ਼ਿਮਲਾ ਦੇ ਸਾਈਬਰ ਥਾਣੇ ਵਿਚ ਰਾਜਦ੍ਰੋਹ (ਸੇਡੀਸ਼ਨ ਅਗੇਂਸਟ ਸਟੇਟ) ਦਾ ਮਾਮਲਾ ਦਰਜ ਹੈ। ਇਸ ਵਿਚ ਆਈ. ਟੀ. ਐਕਟ ਸਮੇਤ ਕਈ ਹੋਰ ਧਾਰਾਵਾਂ ਵੀ ਜੋੜੀਆਂ ਗਈਆਂ ਹਨ। ਕੇਂਦਰੀ ਜਾਂਚ ਏਜੰਸੀ ਐੱਨ. ਆਈ. ਨੇ ਬੀਤੇ ਸਾਲ ਪੰਜਾਬ ਵਿਚ ਅੱਤਵਾਦੀ ਸਰਗਰਮੀਆਂ ਦੇ ਮਾਮਲੇ ਗੁਰਪਤਵੰਤ ਸਿੰਘ ਪੰਨੂ ਸਮੇਤ 10 ਖਾਲਿਸਤਾਨੀ ਅੱਤਵਾਦੀਆਂ ਖ਼ਿਲਾਫ਼ ਮੋਹਾਲੀ ਦੀ ਵਿਸ਼ੇਸ਼ ਅਦਾਲਤ ਵਿਚ ਇਹ ਚਾਰਜਸ਼ੀਟ ਦਾਇਰ ਕੀਤੀ ਸੀ। ਐੱਨ. ਆਈ. ਏ. ਨੇ ਖਾਲਿਸਤਾਨੀ ਅੱਤਵਾਦੀ ਗੁਰਪਤਵੰਤ ਸਿੰਘ ਪੰਨੂ ਸਮੇਤ 10 ਦੋਸ਼ੀਆਂ ਦੇ ਖ਼ਿਲਾਫ਼ ਇੰਡੀਅਨ ਪੈਨਲ ਕੋਡ 120ਬੀ, 124ਏ ਤੇ ਯੂ. ਏ. (ਪੀ) ਐਕਟ 1967 ਦੀ ਧਾਰਾ 13, 16, 17, 19 ਤੇ 20 ਦੇ ਦਰਜ ਮਾਮਲੇ ਵਿਚ ਚਾਰਜਸ਼ੀਟ ਦਾਖਲ ਕੀਤੀ ਸੀ। ਇਹ ਮਾਮਲਾ ਸਾਲ 2017-18 ਦੌਰਾਨ ਪੰਜਾਬ ਵਿਚ ਅਸ਼ਾਂਤੀ ਫੈਲਾਉਣ ਦੀ ਸਾਜਿਸ਼ ਸਮੇਤ ਹਿੰਸਾ ਦੀਆਂ ਘਟਨਾਵਾਂ ਨਾਲ ਜੁੜਿਆ ਹੋਇਆ ਹੈ। ਐੱਸ. ਐੱਫ. ਜੇ. ਤੇ ਰੈਫਰੈਂਡਮ-2020 ਦਾ ਆਨਲਾਈਨ ਮਾਧਿਅਮ ਤੋਂ ਪ੍ਰਚਾਰ ਕਰ ਸੂਬੇ ਦੇ ਨੌਜਵਾਨਾਂ ਨੂੰ ਗੁੰਮਰਾਹ ਕਰ ਭੜਕਾਇਆ ਗਿਆ। ਇਹ ਹਿੰਸਕ ਘਟਨਾਵਾਂ ਵਿਦੇਸ਼ ਵਿਚ ਬੈਠੇ ਐੱਸ. ਐੱਫ. ਜੇ. ਦੇ ਹੈਂਡਲਰਾਂ ਦੇ ਨਿਰਦੇਸ਼ਾਂ ’ਤੇ ਕਰਵਾਈ ਗਈ ਸੀ। ਐੱਨ. ਆਈ. ਏ. ਨੇ ਜਿਨ੍ਹਾਂ 10 ਦੋਸ਼ੀਆਂ ਦੇ ਖ਼ਿਲਾਫ਼ ਚਾਰਜਸ਼ੀਟ ਦਾਇਰ ਕੀਤੀ ਹੈ ਉਨ੍ਹਾਂ ਵਿਚ ਗੁਰਪਤਵੰਤ ਸਿੰਘ ਪੰਨੂ (ਨਿਵਾਸੀ ਨਿਊਯਾਰਕ, ਯੂ. ਐੱਸ. ਏ.), ਪਰਗਟ ਸਿੰਘ, ਸੁਖਰਾਜ ਸਿੰਘ ਉਰਫ ਰਾਜੂ, ਬਿਕਰਮਜੀਤ ਸਿੰਘ ਉਰਫ ਵਿੱਕੀ, ਮਨਜੀਤ ਸਿੰਘ ਉਰਫ ਮੰਗਾ, ਜਤਿੰਦਰ ਸਿੰਘ ਉਰਫ ਗੋਲਡੀ, ਗੁਰਵਿੰਦਰ ਸਿੰਘ, ਗੁਰਪ੍ਰੀਤ ਸਿੰਘ ਉਰਫ ਗੋਪੀ, ਹਰਪ੍ਰੀਤ ਸਿੰਘ ਉਰਫ ਹੈੱਪੀ, ਕੁਲਦੀਪ ਸਿੰਘ ਉਰਫ ਕੀਪਾਂਡ ਅਤੇ ਹਰਮੀਤ ਸਿੰਘ ਉਰਫ ਰਾਜੂ ਦੇ ਨਾਂ ਸ਼ਾਮਲ ਹਨ।