ਪੁਲਾੜ ਜਹਾਜ਼ਾਂ ਨਾਲ ਧਰਤੀ ’ਤੇ ਵਾਪਸ ਆ ਸਕਦੈ ਏਲੀਅਨਜ਼ : ਖੋਜ

ਨਵੀਂ ਦਿੱਲੀ-ਬਾਇਓ ਸਾਇੰਸ ਜਰਨਲ ਵਿੱਚ ਪ੍ਰਕਾਸ਼ਿਤ ਖੋਜ ਪੱਤਰ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਮਨੁੱਖ ਜਿੰਨਾ ਜ਼ਿਆਦਾ ਪੁਲਾੜ ਦੀ ਯਾਤਰਾ ਕਰੇਗਾ, ਓਨਾ ਹੀ ਉਹ ਉੱਥੋਂ ਦੇ ਰਾਜ਼ਾਂ ਨੂੰ ਖੋਜਣ ਦੀ ਕੋਸ਼ਿਸ਼ ਕਰੇਗਾ, ਧਰਤੀ ਉੱਤੇ ਏਲੀਅਨਜ਼ ਦੇ ਆਉਣ ਦਾ ਖ਼ਤਰਾ ਓਨਾ ਹੀ ਵੱਧ ਜਾਵੇਗਾ। ਏਲੀਅਨ ਜੀਵਾਂ ਦੇ ਪੁਲਾੜ ਜਹਾਜ਼ਾਂ ਨਾਲ ਧਰਤੀ ’ਤੇ ਵਾਪਸ ਆਉਣ ਦੀ ਸੰਭਾਵਨਾ ਹੈ। ਮਨੁੱਖ ਲਈ ਪੁਲਾੜ ਤੋਂ ਆਈ ਹਰ ਚੀਜ਼ ਨੂੰ ਦੇਖਣਾ ਸੰਭਵ ਨਹੀਂ ਹੈ। ਪਰ ਧਰਤੀ ਦੇ ਜੀਵਾਂ ਵਿਚਕਾਰ ਪੁਲਾੜ ਦੇ ਇਨ੍ਹਾਂ ਜੀਵਾਂ ਦੀ ਹੋਂਦ ਇੱਕ ਵੱਡਾ ਖ਼ਤਰਾ ਬਣ ਸਕਦੀ ਹੈ।
ਖੋਜ ਪੱਤਰ ਮੁਤਾਬਕ ਮੈਕਗਿਲ ਯੂਨੀਵਰਸਿਟੀ ਦੇ ਇਨਵੈਂਸ਼ਨ ਬਾਇਓਲੋਜੀ ਦੇ ਪ੍ਰੋਫ਼ੈਸਰ ਐਂਥਨੀ ਰਿਕਿਯਾਰਡੀ ਨੇ ਧਰਤੀ ’ਤੇ ਏਲੀਅਨਜ਼ ਦੇ ਆਉਣ ਬਾਰੇ ਕਿਹਾ ਕਿ ਜਿੰਨਾ ਜ਼ਿਆਦਾ ਇਨਸਾਨ ਪੁਲਾੜ ’ਚ ਜਾ ਕੇ ਉੱਥੋਂ ਦੇ ਰਾਜ਼ਾਂ ਦਾ ਪਤਾ ਲਗਾਉਣਗੇ, ਓਨੇ ਹੀ ਜ਼ਿਆਦਾ ਏਲੀਅਨ ਧਰਤੀ ’ਤੇ ਆਉਣ ਲਈ ਮਜਬੂਰ ਹੋਣਗੇ। ਉਨ੍ਹਾਂ ਕਿਹਾ ਕਿ ਏਲੀਅਨ ਬਹੁਤ ਛੋਟੇ ਜੀਵ ਹੋ ਸਕਦੇ ਹਨ, ਪਰ ਪੁਲਾੜ ਯਾਨ ਨਾਲ ਧਰਤੀ ’ਤੇ ਆ ਸਕਦੇ ਹਨ। ਅਜਿਹੀ ਸਥਿਤੀ ਵਿੱਚ ਜੇਕਰ ਇਹ ਜੀਵ-ਜੰਤੂ ਆਪਣੇ ਆਪ ਨੂੰ ਧਰਤੀ ਦੇ ਵਾਤਾਵਰਨ ਅਨੁਸਾਰ ਢਾਲ ਲੈਣ ਤਾਂ ਇਹ ਧਰਤੀ ਉੱਤੇ ਰਹਿਣ ਵਾਲੇ ਜੀਵਾਂ ਨੂੰ ਪ੍ਰਭਾਵਿਤ ਕਰ ਸਕਦੇ ਹਨ। ਜਿਵੇਂ ਮਨੁੱਖ ਪੁਲਾੜ ਵਿੱਚ ਜਾ ਕੇ ਕਿਸੇ ਹੋਰ ਗ੍ਰਹਿ ਉੱਤੇ ਆਪਣਾ ਘਰ ਬਣਾ ਸਕਦਾ ਹੈ। ਐਂਥਨੀ ਨੇ ਕਿਹਾ ਕਿ ਇਸ ਲਈ ਮਿਲ ਕੇ ਕੰਮ ਕਰਨ ਦੀ ਲੋੜ ਹੈ ਤਾਂ ਜੋ ਭਵਿੱਖ ਵਿੱਚ ਧਰਤੀ ਨੂੰ ਅਜਿਹੀ ਕਿਸੇ ਸਮੱਸਿਆ ਦਾ ਸਾਹਮਣਾ ਨਾ ਕਰਨਾ ਪਵੇ।