ਪਾਕਿ ਚ ਧਮਾਕੇ ਚ ਨਾਗਰਿਕਾਂ ਦੀ ਮੌਤ ਦੇ ਸੱਲ ਕਾਰਨ ਚੀਨ ਦਾ ਪਣਬਿਜਲੀ ਪ੍ਰੋਜੈਕਟ ਰੁਕਿਆ

ਇਸਲਾਮਾਬਾਦ-ਪਾਕਿਸਤਾਨ ਵਿੱਚ ਲੰਘੀ 13 ਜੁਲਾਈ ਨੂੰ ਇਕ ਬੱਸ ਧਮਾਕੇ ਦੌਰਾਨ ਨੌ ਚੀਨੀ ਮਜ਼ਦੂਰਾਂ ਸਮੇਤ 13 ਲੋਕਾਂ ਦੀ ਮੌਤ ਹੋ ਗਈ ਸੀ, ਇਸ ਘਟਨਾ ਨੇ ਚੀਨ ਨੂੰ ਪਾਕਿਸਤਾਨ ਨਾਲ ਨਰਾਜ਼ ਕਰ ਦਿੱਤਾ ਸੀ, ਘਟਨਾ ਦੀ ਜਾਂਚ ਵਾਸਤੇ ਚੀਨ ਆਪਣੀ ਟੀਮ ਭੇਜਣ ਤੱਕ ਦੀ ਘੂਰੀ ਵੱਟ ਚੁੱਕਿਆ ਸੀ, ਇਸ ਨਾਲ ਦੋਵਾਂ ਮੁਲਕਾਂ ਦੇ ਰਿਸ਼ਤਿਆਂ ਚ ਆਈ ਖਟਾਸ ਦਾ ਅਸਰ ਚੀਨ ਵੱਲੋਂ ਚਲਾਏ ਜਾ ਰਹੇ ਪ੍ਰੋਜੈਕਟਾਂ ਤੇ ਵੀ ਪਿਆ। ਹਾਲਤ ਇਹ ਹੈ ਕਿ ਹੁਣ ਵੀ ਚੀਨੀ ਮਜ਼ਦੂਰ ਪਾਕਿਸਤਾਨ ਦੀ ਦਾਸੂ ਪ੍ਰਾਜੈਕਟ ’ਚ ਕੰਮ ਕਰਨ ਤੋਂ ਝਿੱਜਕ ਰਹੇ ਹਨ। ਇਸਲਾਮਾਬਾਦ ’ਚ ਦਾਸੂੂ ਪਣਬਿਜਲੀ ਪ੍ਰਾਜੈਕਟ ’ਤੇ ਕੰਮ ਸ਼ੁਰੂ ਕਰਨ ’ਤੇ ਜਲ ਅਤੇ ਬਿਜਲੀ ਵਿਕਾਸ ਅਥਾਰਿਟੀ ਅਤੇ ਚੀਨ ਦੀ ਗੇਝੌਬਾ ਸਮੂਹ ਕੰਪਨੀ ਦੇ ਵਿਚਕਾਰ ਪਿਛਲੇ ਹਫਤੇ ਹੋਈ ਗੱਲਬਾਤ ਬੇਨਤੀਜਾ ਰਹੀ। ਇਸ ਗੱਲਬਾਤ ’ਚ ਚੀਨੀ ਰਾਜਦੂਤ ਨੇ ਵੀ ਹਿੱਸਾ ਲਿਆ। ਪਾਕਿਸਤਾਨੀ ਬੁਲਾਰੇ ਨੇ ਡਾਨ ਨੂੰ ਦੱਸਿਆ ਕਿ ਚੀਨੀ ਕੰਪਨੀ ਸੁਰੱਖਿਆ ਅਤੇ ਹੋਰ ਕਾਰਨਾਂ ਕਰਕੇ ਪ੍ਰਾਜੈਕਟ ’ਤੇ ਕੰਮ ਫਿਰ ਤੋਂ ਸ਼ੁਰੂ ਕਰਨ ਵਿੱਚ ਝਿਜਕ ਰਹੀ ਹੈ, ਪਰ ਦੋਵਾਂ ਪੱਖਾਂ ਨੇ ਕੰਮ ਦੀ ਜਲਦ ਬਹਾਲੀ ਸੁਨਿਸ਼ਚਿਤ ਕਰਨ ਲਈ ਇਕ ਹੋਰ ਦੌਰ ਦੀ ਗੱਲਬਾਤ ਕਰਨ ਦਾ ਫੈਸਲਾ ਕੀਤਾ ਹੈ। ਸੂਤਰ ਨੇ ਦੱਸਿਆ ਕਿ ਵਾਪਡਾ ਦੇ ਪ੍ਰਧਾਨ ਨੇ ਚੀਨੀ ਕੰਪਨੀ ਦੇ ਪ੍ਰਤੀਨਿਧੀਆਂ ਅਤੇ ਰਾਜਦੂਤ ਨੂੰ ਉੱਪਰੀ ਅਤੇ ਹੇਠਲੇ ਕੋਹੀਸਤਾਨ ਅਤੇ ਕੋਲਾਈ-ਪਲਾਸ ਜ਼ਿਲਿਆਂ ’ਚ ਪਾਕਿਸਤਾਨੀ ਸੈਨਾ ਦੀ ਤਾਇਨਾਤੀ ਦੇ ਬਾਰੇ ’ਚ ਸੂਚਿਤ ਕੀਤਾ। ਉਨ੍ਹਾਂ ਨੇ ਕਿਹਾ ਕਿ ਕੋਹੀਸਤਾਨ ਜ਼ਿਲੇ ’ਚ ਪਾਕਿਸਤਾਨੀ ਸੈਨਾ ਦੀ ਬਿ੍ਰਗੇਡ ਚੀਨੀ ਨਾਗਰਿਕਾਂ ਨੂੰ ਕਾਰਾਕੋਰਮ ਰਾਜਮਾਰਗ ਦੇ ਰਸਤੇ ਕੰਮ ਕਰਨ ਅਤੇ ਸਬੰਧਿਤ ਕੈਂਪਾਂ ਤੱਕ ਲੈ ਜਾਵੇਗੀ। ਸੂਤਰਾਂ ਨੇ ਕਿਹਾ ਕਿ ਦੋਵਾਂ ਪੱਖਾਂ ਨੇ ਚੀਨੀ ਏਜੰਸੀਆਂ ਅਤੇ ਅੱਤਵਾਦ ਨਿਰੋਧੀ ਵਿਭਾਗ ਵਲੋਂ ਬੰਬ ਧਮਾਕੇ ਦੀ ਜਾਂਚ ਦੇ ਵਾਧੇ ’ਤੇ ਵੀ ਚਰਚਾ ਕੀਤੀ। ਸਾਰੀ ਸਥਿਤੀ ਆਮ ਵਰਗੀ ਹੋਣ ਮਗਰੋਂ ਹੀ ਚੀਨੀ ਕੰਪਨੀ ਆਪਣੇ ਕੰਮ ਅੱਗੇ ਵਧਾਵੇਗੀ, ਅਜਿਹਾ ਮੰਨਿਆ ਜਾ ਰਿਹਾ ਹੈ।