ਪਾਕਿਸਤਾਨ ਚ ਤੀਸਰੀ ਵਾਰ ਮਦਰੱਸੇ ਉੱਤੇ ਤਾਲਿਬਾਨੀ ਝੰਡੇ ਲਹਿਰਾਏ ਗਏ

ਇਸਲਾਮਾਬਾਦ- ਅਫਗਾਨਿਸਤਾਨ ਵਿੱਚ ਤਾਲਿਬਾਨ ਦੇ ਰਾਜ ਦਾ ਜਸ਼ਨ ਮਨਾਉਣ ਵਾਲਾ ਪਾਕਿਸਤਾਨ ਹੁਣ ਆਪਣੇ ਹੀ ਜਾਲ ਵਿੱਚ ਫਸਿਆ ਜਾਪਦਾ ਹੈ। ਪੁਲਿਸ ਨੇ ਇੱਕ ਮਸ਼ਹੂਰ ਕੱਟੜਪੰਥੀ ਮੌਲਵੀ ਅਤੇ ਕਈ ਹੋਰਾਂ ਦੇ ਖਿਲਾਫ ਇੱਕ ਮਹਿਲਾ ਮਦਰੱਸੇ ਉੱਤੇ ਅਫਗਾਨ ਤਾਲਿਬਾਨ ਦੇ ਝੰਡੇ ਲਹਿਰਾਉਣ ਦੇ ਲਈ ਮਾਮਲਾ ਦਰਜ ਕੀਤਾ ਹੈ। 21 ਅਗਸਤ ਤੋਂ ਬਾਅਦ ਇਹ ਤੀਜੀ ਵਾਰ ਹੈ ਜਦੋਂ ਤਾਲਿਬਾਨ ਦੇ ਕਬਜ਼ੇ ਵਿੱਚ ਆਉਣ ਤੋਂ ਬਾਅਦ ਪਾਕਿਸਤਾਨ ਦੇ ਮਦਰੱਸੇ ‘ਤੇ ਅਫਗਾਨ ਤਾਲਿਬਾਨ ਦੇ ਝੰਡੇ ਲਹਿਰਾਏ ਗਏ। ਪਾਕਿਸਤਾਨ ਦੇ ਪ੍ਰਮੁੱਖ ਅਖ਼ਬਾਰ ਡਾਨ ਦੀ ਖਬਰ ਮੁਤਾਬਕ ਸ਼ਨੀਵਾਰ ਨੂੰ ਰਾਜਧਾਨੀ ਇਸਲਾਮਾਬਾਦ ਵਿੱਚ ਜਾਮੀਆ ਹਾਫਸਾ, ਇੱਕ ਮਹਿਲਾ ਸੈਮੀਨਰੀ ਦੀ ਛੱਤ ਉੱਤੇ ਅਫਗਾਨ ਤਾਲਿਬਾਨ ਦੇ ਚਿੱਟੇ ਝੰਡੇ ਦਿਖਾਈ ਦਿੱਤੇ। ਇਸ ਬਾਰੇ ਜਾਣਕਾਰੀ ਮਿਲਣ ਤੋਂ ਬਾਅਦ, ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਦੰਗਾ ਵਿਰੋਧੀ ਇਕਾਈ ਸਮੇਤ ਪੁਲਿਸ ਦੀ ਇੱਕ ਟੁਕੜੀ ਭੇਜੀ, ਜਿਸ ਨੇ ਮਦਰਸੇ ਨੂੰ ਘੇਰਾ ਪਾ ਲਿਆ। ਮੌਲਾਨਾ ਅਬਦੁਲ ਅਜ਼ੀਜ਼, ਉਸਦੇ ਸਾਥੀਆਂ ਦੇ ਨਾਲ ਨਾਲ ਮਦਰਸੇ ਦੇ ਵਿਦਿਆਰਥੀਆਂ ਦੇ ਖਿਲਾਫ ਅੱਤਵਾਦ ਵਿਰੋਧੀ ਐਕਟ (ਏਟੀਏ) ਅਤੇ ਪਾਕਿਸਤਾਨ ਦੰਡ ਸੰਹਿਤਾ ਦੀਆਂ ਵੱਖ-ਵੱਖ ਧਾਰਾਵਾਂ ਦੇ ਤਹਿਤ ਇੱਕ ਮਾਮਲਾ ਦਰਜ ਕੀਤਾ ਗਿਆ ਹੈ। ਮੌਲਾਨਾ ਅਬਦੁਲ ਅਜ਼ੀਜ਼ ਇਸਲਾਮਾਬਾਦ ਦੀ ਮਸ਼ਹੂਰ ਲਾਲ ਮਸਜਿਦ ਦੇ ਮੌਲਵੀ ਹਨ। ਅਧਿਕਾਰੀਆਂ ਦੇ ਅਨੁਸਾਰ, ਮੌਲਾਨਾ ਅਜ਼ੀਜ਼ ਨੇ ਪੁਲਿਸ ਨੂੰ ਅਫਗਾਨ ਤਾਲਿਬਾਨ ਦਾ ਨਾਮ ਵਰਤਦੇ ਹੋਏ ਗੰਭੀਰ ਨਤੀਜਿਆਂ ਦੀ ਧਮਕੀ ਦਿੱਤੀ। ਅਧਿਕਾਰੀਆਂ ਦੇ ਅਨੁਸਾਰ ਮੌਲਾਨਾ ਅਜ਼ੀਜ਼ ਸਮੇਤ ਮਦਰਸੇ ਨਾਲ ਜੁੜੇ ਕੁਝ ਲੋਕਾਂ ਨੇ ਹਥਿਆਰਾਂ ਦਾ ਪ੍ਰਦਰਸ਼ਨ ਵੀ ਕੀਤਾ। ਮਦਰੱਸੇ ਦੇ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੇ ਵੀ ਪੁਲਿਸ ਨੂੰ ਚੁਣੌਤੀ ਦਿੱਤੀ ਅਤੇ ਧਮਕੀਆਂ ਦਿੱਤੀਆਂ। ਨਤੀਜੇ ਵਜੋਂ ਇਲਾਕੇ ਵਿੱਚ ਤਣਾਅ ਫੈਲ ਗਿਆ।