ਨੌਸਰਬਾਜ ਵਟਸਐਪ ’ਤੇ ਡੀਸੀ ਦੀ ਤਸਵੀਰ ਲਗਾ ਕੇ ਮਾਰਨ ਲੱਗੇ ਠੱਗੀ

ਕਪੂਰਥਲਾ-ਠੱਗਾਂ ਨੇ ਠੱਗੀ ਦਾ ਨਵਾਂ ਤਰੀਕਾ ਲੱਭ ਲਿਆ ਹੈ। ਕਪੂਰਥਲਾ ਦੇ ਡਿਪਟੀ ਕਮਿਸ਼ਨਰ ਵਿਸ਼ੇਸ਼ ਸਾਰੰਗਲ ਦਾ ਵਟਸਐਪ ਅਕਾਊਂਟ ’ਤੇ ਤਸਵੀਰ ਲਗਾ ਕੇ ਨੌਸਰਬਾਜ ਲੋਕਾਂ ਨੂੰ ਮੈਸੇਜ ਕਰ ਰਹੇ ਹਨ। ਠੱਗਾਂ ਵੱਲੋਂ ਲੋਕਾਂ ਨੂੰ ਮੈਸੇਜ ਕੀਤਾ ਜਾ ਰਿਹਾ ਹੈ, ‘ਵੈਰੀ ਗੁੱਡ, ਦੇਅਰ ਇਜ਼ ਸਮਥਿੰਗਦ ਆਈ ਨੀਡ ਯੂ ਟੂ ਪਲੀਜ਼ ਡੂ ਫਾਰ ਮੀ ਅਰਜੈਂਟਲੀ, ਆਈ ਐਮ ਅਟੈਂਡਿੰਗ ਟੂ ਏਰ ਵੈਰੀ ਕਰੂਸ਼ਲ ਮੀਟਿੰਗ ਵਿਦ ਲਿਮਡਿਟ ਫੋਨ ਕਾਲ।’ ਡਿਪਟੀ ਕਮਿਸ਼ਨਰ ਦੀ ਤਸਵੀਰ ਵੇਖ ਦੂਜੇ ਪਾਸੇ ਤੋਂ ਜਦੋਂ ਤੱਕ ਇਕ ਵਿਅਕਤੀ ਨੇ ਲਿਖਿਆ, ‘ਵ੍ਹਟ ਕੈਨ ਆਈ ਡੂ ਫਾਰ ਯੂ ਸਰ’ ਤਾਂ ਠੱਗ ਰੁਪਏ ਦੀ ਮੰਗ ਕਰਦੇ ਹੋਏ ਗੂਗਲ ਪੇਅ ਕਰਨ ਨੂੰ ਕਹਿਣ ਲੱਗੇ।
ਅਜਿਹੇ ਕਈ ਮੈਸੇਜ ਪ੍ਰਦੇਸ਼ ਦੇ ਉੱਚ ਅਧਿਕਾਰੀਆਂ ਨੂੰ ਕੀਤੇ ਗਏ ਹਨ। ਇਸ ਦੇ ਚਲਦਿਆਂ ਡੀ. ਸੀ. ਕਪੂਰਥਲਾ ਨੂੰ ਕਈ ਲੋਕਾਂ ਦੇ ਫੋਨ ਆਉਣੇ ਸ਼ੁਰੂ ਹੋ ਗਏ ਹਨ। ਡਿਪਟੀ ਕਮਿਸ਼ਨਰ ਵਿਸ਼ੇਸ਼ ਸਾਰੰਗਲ ਦੀ ਵਟਸਐਪ ’ਤੇ ਤਸਵੀਰ ਲਗਾ ਕੇ ਇਕ ਠੱਗ ਨੇ ਕਈ ਅਫ਼ਸਰਾਂ ਸਮੇਤ ਹੋਰ ਲੋਕਾਂ ਨੂੰ ਮੈਸੇਜ ਕਰ ਦਿੱਤਾ। ਲੋਕਾਂ ਨੇ ਡਿਪਟੀ ਕਮਿਸ਼ਨਰ ਤੋਂ ਇਸ ਸਬੰਧੀ ਜਦੋਂ ਪੁੱਛਿਆ ਤਾਂ ਡਿਪਟੀ ਕਮਿਸ਼ਨਰ ਨੇ ਕਿਹਾ ਕਿ ਜਿਹੜੇ ਨੰਬਰ ਤੋਂ ਮੈਸੇਜ ਆ ਰਹੇ ਹਨ, ਉਹ ਨੰਬਰ ਉਨ੍ਹਾਂ ਦਾ ਨਹੀਂ ਹੈ।
ਸ਼ਹਿਰ ਦੇ ਜਾਮਾ ਮਸਜਿਦ ਚੌਂਕ ’ਚ ਕੰਮ ਕਰਨ ਵਾਲੇ ਅਤੇ ਇਕ ਆਈਲੈਟਸ ਅਕੈਡਮੀ ਚਲਾਉਣ ਵਾਲੇ ਸੰਚਾਲਕ ਨੂੰ ਵੀ ਮੈਸੇਜ ਗਿਆ, ਜਿਸ ’ਚ ਡੀ.ਸੀ. ਵਿਸ਼ੇਸ਼ ਸਾਰੰਗਲ ਵੱਲੋਂ ਜ਼ਰੂਰੀ ਮੀਟਿੰਗ ਦਾ ਮੁੱਦਾ ਦੱਸਦੇ ਹੋਏ ਕੁਝ ਕਰਨ ਲਈ ਕਿਹਾ ਜਾਂਦਾ ਹੈ। ਡੀ. ਸੀ. ਨੇ ਕਿਹਾ ਕਿ ਇਸ ਸਬੰਧੀ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਉਹ ਇਕੱਲੇ ਟਾਰਗੇਟ ’ਤੇ ਨਹੀਂ ਹੈ।