ਨਿਊ ਮੈਕਸੀਕੋ ਚ ਭਾਰਤੀ ਰੈਸਤਰਾਂ ’ਤੇ ਹਮਲੇ ਦਾ ਮਾਮਲਾ-ਐਫਬੀਆਈ ਕਰੇਗੀ ਜਾਂਚ

ਵਾਸ਼ਿੰਗਟਨ- ਅਮਰੀਕਾ ਦੇ  ਸੂਬੇ ਨਿਊ ਮੈਕਸੀਕੋ ਦੀ ਰਾਜਧਾਨੀ ਸਾਂਤਾ ਫੇਅ ਵਿਚ ਪਿਛਲੇ ਸਾਲ ਇਕ ਮਸ਼ਹੂਰ ਭਾਰਤੀ ਰੈਸਤਰਾਂ ’ਤੇ  ਹਮਲਾ ਹੋਇਆ ਸੀ। ਜੂਨ 2020 ਵਿਚ ਇਕ ਸਿੱਖ ਵਿਅਕਤੀ ਦੇ ‘ਇੰਡੀਆ ਪੈਲੇਸ’ ਨਾਮ ਦੇ ਰੈਸਤਰਾਂ ਵਿਚ ਅਣਪਛਾਤੇ ਦੰਗਈਆਂ ਨੇ ਭੰਨਤੋੜ ਕੀਤੀ ਸੀ ਅਤੇ ਰਸੋਈ, ਭੋਜਨ ਅਹਾਤੇ ਅਤੇ ਭੰਡਾਰ ਨੂੰ ਨੁਕਸਾਨ ਪਹੁੰਚਾਇਆ ਸੀ ਅਤੇ ਰੈਸਤਰਾਂ ਦੀਆਂ ਕੰਧਾਂ ’ਤੇ ਸਪਰੇਅ ਪੇਂਟ ਨਾਲ ‘ਟਰੰਪ-2020’ ਅਤੇ ਨਸਲੀ ਟਿੱਪਣੀਆਂ ਨਾਲ ਨਫ਼ਰਤੀ ਸੁਨੇਹੇ ਲਿਖੇ ਸਨ। ਇਸ ਨਾਲ ਰੈਸਤਰਾਂ ਮਾਲਕ ਨੂੰ ਕਰੀਬ ਇਕ ਲੱਖ ਅਮਰੀਕੀ ਡਾਲਰ ਦਾ ਨੁਕਸਾਨ ਹੋਇਆ ਸੀ। ਇਕ ਸਥਾਨ ਵੈਬਸਾਈਟ ਅਨੁਸਾਰ ਇਸ ਰੈਸਤਰਾਂ ਨੂੰ 2013 ਵਿਚ ਬਲਜੀਤ ਸਿੰਘ ਨੇ ਖ਼ਰੀਦਿਆ ਸੀ ਅਤੇ ਇਸ ਦਾ ਸੰਚਾਲਨ ਉਸ ਦਾ ਪੁੱਤਰ ਬਲਜੋਤ ਸਿੰਘ ਕਰਦਾ ਹੈ। ਸਾਂਤਾ ਫ਼ੇਅ ਪੁਲਿਸ ਨੇ ਇਸ ਘਟਨਾ ਨੂੰ ਨਫ਼ਰਤੀ ਅਪਰਾਧ ਕਰਾਰ ਦਿਤਾ ਸੀ। ਘਟਨਾ ਦੇ 16 ਮਹੀਨੇ ਬੀਤ ਜਾਣ ਦੇ ਬਾਵਜੂਦ ਹੁਣ ਤਕ ਦੋਸ਼ ਤੈਅ ਨਹੀਂ ਹੋਏ। ਹੁਣ ਇਸ ਹਮਲੇ ਦੇ ਮਾਮਲੇ ਦੀ ਜਾਂਚ ਐਫ ਬੀ ਆਈ ਕਰੇਗੀ।