ਨਿਊਜ਼ੀਲੈਂਡ ‘ਚ ਮਹਿਲਾ ਸੰਸਦ ਮੈਂਬਰਾਂ ਦੀ ਗਿਣਤੀ ਪੁਰਸ਼ ਮੈਂਬਰਾਂ ਤੋਂ ਟੱਪੀ

ਆਕਲੈਂਡ-ਨਿਊਜ਼ੀਲੈਂਡ ਦੇ ਲਿਬਰਲ ਲੇਬਰ ਪਾਰਟੀ ਦੀ ਨੇਤਾ ਸੋਰਾਇਆ ਪੇਕੇ ਮੇਸਨ ਨੇ ਸੰਸਦ ਦੇ ਮੈਂਬਰ ਵਜੋਂ ਸਹੁੰ ਚੁੱਕੀ। ਉਸਨੇ ਸੰਸਦ ਦੇ ਸਾਬਕਾ ਸਪੀਕਰ ਟ੍ਰੇਵਰ ਮੈਲਾਰਡ ਦੀ ਥਾਂ ਲੈ ਲਈ। ਮੈਲਾਰਡ ਨੂੰ ਆਇਰਲੈਂਡ ਦਾ ਰਾਜਦੂਤ ਨਿਯੁਕਤ ਕੀਤਾ ਗਿਆ ਹੈ। ਇੱਕ ਹੋਰ ਪੁਰਸ਼ ਸੰਸਦ ਮੈਂਬਰ ਦੇ ਅਸਤੀਫੇ ਨਾਲ ਸੰਸਦ ਵਿੱਚ ਔਰਤਾਂ ਦੀ ਗਿਣਤੀ 60 ਅਤੇ ਪੁਰਸ਼ਾਂ ਦੀ ਗਿਣਤੀ 59 ਹੋ ਗਈ ਹੈ। ਪੇਕੇ ਮੇਸਨ ਨੇ ਪੱਤਰਕਾਰਾਂ ਨੂੰ ਕਿਹਾ, ”ਮੇਰੇ ਲਈ ਇਹ ਬਹੁਤ ਖਾਸ ਦਿਨ ਹੈ। ਮੈਨੂੰ ਲਗਦਾ ਹੈ ਕਿ ਇਹ ਨਿਊਜ਼ੀਲੈਂਡ ਲਈ ਇਤਿਹਾਸਕ ਦਿਨ ਹੈ।
ਇੰਟਰ-ਪਾਰਲੀਮੈਂਟਰੀ ਯੂਨੀਅਨ ਦੇ ਅਨੁਸਾਰ, ਇਸ ਮਹੱਤਵਪੂਰਨ ਪ੍ਰਾਪਤੀ ਨੇ ਨਿਊਜ਼ੀਲੈਂਡ ਨੂੰ ਦੁਨੀਆ ਦੇ ਅੱਧੀ ਦਰਜਨ ਦੇਸ਼ਾਂ ਵਿੱਚ ਸ਼ਾਮਲ ਕੀਤਾ ਹੈ ਜੋ ਇਸ ਸਾਲ ਆਪਣੀਆਂ ਸੰਸਦਾਂ ਵਿੱਚ ਔਰਤਾਂ ਦੀ ਘੱਟੋ ਘੱਟ 50 ਪ੍ਰਤੀਸ਼ਤ ਪ੍ਰਤੀਨਿਧਤਾ ਦਾ ਦਾਅਵਾ ਕਰ ਸਕਦੇ ਹਨ। ਅਜਿਹੇ ਹੋਰ ਦੇਸ਼ਾਂ ਵਿੱਚ ਕਿਊਬਾ, ਮੈਕਸੀਕੋ, ਨਿਕਾਰਾਗੁਆ, ਰਵਾਂਡਾ ਅਤੇ ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਸ਼ਾਮਲ ਹਨ। ਯੂਨੀਅਨ ਦੇ ਅਨੁਸਾਰ, ਵਿਸ਼ਵ ਪੱਧਰ ‘ਤੇ 26 ਪ੍ਰਤੀਸ਼ਤ ਸੰਸਦ ਮੈਂਬਰ ਔਰਤਾਂ ਹਨ। ਨਿਊਜ਼ੀਲੈਂਡ ਵਿੱਚ ਔਰਤਾਂ ਦੀ ਮਜ਼ਬੂਤ ਪ੍ਰਤੀਨਿਧਤਾ ਦਾ ਇਤਿਹਾਸ ਰਿਹਾ ਹੈ। ਨਿਊਜ਼ੀਲੈਂਡ 1893 ਵਿੱਚ ਔਰਤਾਂ ਨੂੰ ਵੋਟ ਦਾ ਅਧਿਕਾਰ ਦੇਣ ਵਾਲਾ ਪਹਿਲਾ ਦੇਸ਼ ਬਣਿਆ।
ਮੌਜੂਦਾ ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਰਨ ਦੇਸ਼ ਦੀ ਤੀਜੀ ਮਹਿਲਾ ਪ੍ਰਧਾਨ ਮੰਤਰੀ ਹੈ। ਇਸ ਤੋਂ ਇਲਾਵਾ ਚੀਫ਼ ਜਸਟਿਸ ਅਤੇ ਗਵਰਨਰ ਜਨਰਲ ਸਮੇਤ ਦੇਸ਼ ਦੇ ਕਈ ਹੋਰ ਉੱਚ ਅਹੁਦਿਆਂ ‘ਤੇ ਔਰਤਾਂ ਹਨ। ਨੈਸ਼ਨਲ ਪਾਰਟੀ ਦੀ ਡਿਪਟੀ ਲੀਡਰ ਨਿਕੋਲਾ ਵਿਲਿਸ ਨੇ ਕਿਹਾ, ”ਮੈਂ ਸੱਚਮੁੱਚ ਖੁਸ਼ ਹਾਂ ਕਿ ਮੇਰੀਆਂ ਧੀਆਂ ਅਜਿਹੇ ਦੇਸ਼ ‘ਚ ਵੱਡੀਆਂ ਹੋ ਰਹੀਆਂ ਹਨ, ਜਿੱਥੇ ਜਨਤਕ ਜੀਵਨ ‘ਚ ਔਰਤਾਂ ਨੂੰ ਬਰਾਬਰ ਦੀ ਨੁਮਾਇੰਦਗੀ ਦਿੱਤੀ ਜਾਂਦੀ ਹੈ।”