ਦੇਸ਼ ਦਾ ਗੌਰਵ ਪਰੇਡ ਚ ਦਿਸਿਆ, ਪੀ ਐੱਮ ਨੇ ਸੂਰਵੀਰਾਂ ਨੂੰ ਕੀਤਾ ਨਮਨ

ਨਵੀਂ ਦਿੱਲੀ- ਅੱਜ ਦੇਸ਼ ਅੱਜ ਆਪਣਾ 73ਵਾਂ ਗਣਤੰਤਰ ਦਿਵਸ ਮਨਾ ਰਿਹਾ ਹੈ। ਪਹਾੜਾਂ ਤੋਂ ਲੈ ਕੇ ਮੈਦਾਨ ਤਕ ਦੇਸ਼ ਵਾਸੀਆਂ ਦਾ ਜੋਸ਼ ਨਜ਼ਰ ਆ ਰਿਹਾ ਹੈ। ਜਸ਼ਨਾਂ ਚ ਸ਼ਾਮਲ ਹੋਣ ਲਈ ਸਵੇਰੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੈਸ਼ਨਲ ਵਾਰ ਮੈਮੋਰੀਅਲ ਪਹੁੰਚੇ। ਇਥੇ ਪੀ.ਐੱਮ. ਮੋਦੀ ਨੇ ਦੇਸ਼ ਲਈ ਵੱਖ-ਵੱਖ ਜੰਗਾਂ ਅਤੇ ਆਪਰੇਸ਼ਨਾਂ ’ਚ ਸ਼ਹੀਦ ਹੋਏ ਕਰੀਬ 26,000 ਜਵਾਨਾਂ ਨੂੰ ਸ਼ਰਧਾਂਜਲੀ ਦਿੱਤੀ। ਇਸਤੋਂ ਬਾਅਦ ਪੀ.ਐੱਮ. ਮੋਦੀ ਨੇ ਵਿਜ਼ੀਟਰ ਬੁੱਕ ’ਚ ਸਾਈਨ ਕੀਤਾ। ਗਣਤੰਤਰ ਦਿਵਸ ਅਤੇ ਆਜ਼ਾਦੀ ਦਿਵਸ ਮੌਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਹਮੇਸ਼ਾ ਖ਼ਾਸ ਅੰਦਾਜ ‘ਚ ਨਜ਼ਰ ਆਉਂਦੇ ਹਨ। ਇਸ ਵਾਰ 73ਵੇਂ ਗਣਤੰਤਰ ਦਿਵਸ ‘ਤੇ ਪੀ.ਐੱਮ. ਮੋਦੀ ਦੇ ਸਿਰ ‘ਤੇ ਸਾਫ਼ਾ ਨਹੀਂ ਸਗੋਂ ਖ਼ਾਸ ਟੋਪੀ ਸੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਗਮਛਾ ਪਾਇਆ ਹੋਇਆ ਸੀ। ਇਹ ਖ਼ਾਸ ਟੋਪੀ ਉਤਰਾਖੰਡ ਦੀ ਹੈ ਅਤੇ ਗਮਛਾ ਮਣੀਪੁਰ ਦਾ। ਇਸ ਟੋਪੀ ‘ਤੇ ਬ੍ਰਹਮਾਕਮਲ ਦਾ ਫੁੱਲ ਬਣਿਆ ਹੈ, ਜੋ ਕਿ ਉਤਰਾਖੰਡ ਦਾ ਸਟੇਟ ਫੁੱਲ ਹੈ।  ਪੀ.ਐੱਮ. ਮੋਦੀ ਨੇ ਇਸ ਟੋਪੀ ਉਨ੍ਹਾਂ ਸ਼ਹੀਦਾਂ ਨੂੰ ਸਨਮਾਨ ਦੇਣ ਲਈ ਪਹਿਨੀ ਹੈ, ਜਿਨ੍ਹਾਂ ਨੇ ਆਪਣੀ ਭਾਰਤ ਮਾਂ ਦੀ ਰੱਖਿਆ ‘ਚ ਆਪਣਾ ਬਲੀਦਾਨ ਦਿੱਤਾ, ਜੋ ਸਰਦੀ-ਗਰਮੀ, ਮੀਂਹ ਦੀ ਪਰਵਾਹ ਨਾ ਕਰਦੇ ਹੋਏ ਸਰਹੱਦ ‘ਤੇ 24 ਘੰਟੇ ਸਾਡੇ ਦੇਸ਼ ਦੀ ਰੱਖਿਆ ਕਰਦੇ ਹਨ ਅਤੇ ਜਿਨ੍ਹਾਂ ਦੀ ਬਦੌਲਤ ਅਸੀਂ ਆਪਣੇ ਘਰਾਂ ‘ਚ ਸੁਕੂਨ ਦਾ ਸਾਹ ਲੈ ਪਾਉਂਦੇ ਹਾਂ।

ਰਾਜਪਥ ਚ ਸ਼ਾਨਦਾਰ ਪਰੇਡ

ਇਸ ਸਾਲ ਦੀ ਗਣਤੰਤਰ ਦਿਵਸ ਪਰੇਡ ਕੋਰੋਨਾ ਪ੍ਰੋਟੋਕੋਲ ਦੇ ਨਾਲ ਆਯੋਜਿਤ ਕੀਤੀ ਗਈ ਹੈ। ਇਸ ਮੌਕੇ ਦੇਸ਼ ਦੇ ਰਾਸ਼ਟਰਪਤੀ ਰਾਮਨਾਥ ਕੋਵਿੰਡ ਨੇ ਦੇਸ਼ ਦੀਆਂ ਤਿੰਨੋਂ ਫੌਜਾਂ-ਦਾ ਸੈਲਿਊਟ ਸਵਿਕਾਰ ਕੀਤਾ। ਦੱਸ ਦੇਈਏ ਕਿ ਦੇਸ਼ ਦੀਆਂ ਤਿੰਨੋਂ ਫੌਜਾਂ- ਥਲ ਸੈਨਾ, ਹਵਾਈ ਸੈਨਾ ਅਤੇ ਜਲ ਸੈਨਾ ਦਾ ਸੈਲਿਊਟ ਕਰਨ ਦਾ ਤਰੀਕਾ ਵੱਖ-ਵੱਖ ਹੈ। ਇਸ ਦੀ ਇਕ ਖਾਸ ਵਜ੍ਹਾ ਹੈ। ਆਓ ਜਾਣਦੇ ਹਾਂ ਕਿਹੜੀ ਫੌਜ ਕਿਸ ਤਰ੍ਹਾਂ ਕਰਦੀ ਹੈ ਸੈਲਿਊਟ ਅਤੇ ਕੀ ਹੈ ਤਿੰਨਾਂ ’ਚ ਫਰਕ। ਇੰਡੀਅਨ ਆਰਮੀ ਯਾਨੀ ਥਲ ਸੈਨਾ ਦਾ ਸੈਲਿਊਟ ਪੂਰੇ ਹੱਥ ਦੀ ਤਲੀ ਵਿਖਾ ਕੇ ਕੀਤਾ ਜਾਂਦਾ ਹੈ। ਸੈਲਿਊਟ ਕਰਦੇ ਸਮੇਂ ਹੱਥ ਦਾ ਪੂਰਾ ਪੰਜਾ ਸਾਹਮਣੇ ਵਿਖਾਇਆ ਜਾਂਦਾ ਹੈ। ਇਸ ਵਿਚ ਸਾਰੀਆਂ ਊਂਗਲੀਆਂ ਖੁੱਲ੍ਹੀਆਂ ਰਹਿੰਦੀਆਂ ਹਨ ਅਤੇ ਅੰਗੂਠਾ ਸਿਰ ਅਤੇ ਭਰਵੱਟੇ ਦੇ ਵਿਚਕਾਰ ਰਹਿੰਦਾ ਹੈ। ਇੰਡੀਅਨ ਨੇਵੀ ਯਾਨੀ ਜਲ ਸੈਨਾ ਦਾ ਸੈਲਿਊਟ ਆਰਮੀ ਦੇ ਸੈਲਿਊਟ ਤੋਂ ਵੱਖਰਾ ਹੁੰਦਾ ਹੈ। ਇਸ ਵਿਚ ਹੱਥ ਦੀ ਤਲੀ ਵਿਖਾਈ ਨਹੀਂ ਦਿੰਦੀ। ਹੱਥ ਪੂਰੀ ਤਰ੍ਹਾਂ ਹੇਠਾਂ ਵਲ ਮੁੜਿਆ ਹੁੰਦਾ ਹੈ। ਅੰਗੂਠੇ ਦੀ ਸਥਿਤੀ ਮੱਥੇ ’ਤੇ ਸਿਰ ਅਤੇ ਭਰਵੱਟੇ ਦੇ ਵਿਚਕਾਰ ਹੀ ਰਹਿੰਦੀ ਹੈ। ਇੰਡੀਅਨ ਏਅਰ ਫੋਰਸ ਯਾਨੀ ਹਵਾਈ ਫੌਜ ਦਾ ਸੈਲਿਊਟ ਪਹਿਲਾਂ ਆਰਮੀ ਦੀ ਤਰ੍ਹਾਂ ਹੀ ਹੁੰਦਾ ਸੀ ਪਰ 2006 ’ਚ ਹਵਾਈ ਫੌਜ ਨੇ ਆਪਣੇ ਜਵਾਨਾਂ ਦੇ ਸੈਲਿਊਟ ਦੇ ਨਵੇਂ ਫਾਰਮ ਤੈਅ ਕੀਤੇ ਸਨ। ਸੈਲਿਊਟ ਦੌਰਾਨ ਹੱਥ ਅਤੇ ਜ਼ਮੀਨ ਦੇ ਵਿਚਕਾਰ 45 ਡਿਗਰੀ ਦਾ ਕੋਣ ਬਣਦਾ ਹੈ। ਸੈਲਿਊਟ ਕਰਦੇ ਹੋਏ ਹਵਾਈ ਫੌਜ ਆਸਮਾਨ ਵਲ ਆਪਣੇ ਕਦਮ ਨੂੰ ਦਰਸ਼ਾਉਂਦੀ ਹੈ।

ਰਾਫੇਲ ਦੀ ਪਹਿਲੀ ਮਹਿਲਾ ਫਾਈਟਰ ਪਾਇਲਟ ਨੇ ਦਿੱਤੀ ਸਲਾਮੀ

ਗਣਤੰਤਰ ਦਿਵਸ ਮੌਕੇ ਰਾਜਪਥ ’ਤੇ  ਪਰੇਡ ’ਚ ਭਾਰਤ ਦੀ ਬਹਾਦਰੀ ਅਤੇ ਸੱਭਿਆਚਾਰ ਦੀਆਂ ਅਦਭੁਤ ਝਾਂਕੀਆਂ ਵੇਖਣ ਨੂੰ ਮਿਲੀਆਂ। ਇਸ ਦੌਰਾਨ ‘ਨਾਰੀ ਸ਼ਕਤੀ’ ਦੀ ਵੀ ਝਲਕ ਵੇਖਣ ਨੂੰ ਮਿਲੀ। ਏਅਰ ਫੋਰਸ ਦੀ ਝਾਂਕੀ ’ਤੇ ਰਾਫੇਲ ਜੈੱਟ ਦੀ ਪਹਿਲੀ ਮਹਿਲਾ ਫਾਈਟਰ ਪਾਇਲਟ ਲੈਫਟੀਨੈਂਟ ਸ਼ਿਵਾਂਗੀ ਸਿੰਘ ਨਜ਼ਰ ਆਈ ਅਤੇ ਉਨ੍ਹਾਂ ਨੇ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਨੂੰ ਸਲਾਮੀ ਵੀ ਦਿੱਤੀ।

ਪੰਜਾਬ ਦੀ ਝਾਕੀ ਚ ਸ਼ਹੀਦ ਭਗਤ ਸਿੰਘ ਤੇ ਸਾਥੀ

ਗਣਤੰਤਰ ਦਿਵਸ ਪਰੇਡ ਦੌਰਾਨ ਪੰਜਾਬ ਦੀ ਝਾਂਕੀ ਦੀ ਥੀਮ ‘ਸੁਤੰਤਰਤਾ ਸੰਗ੍ਰਾਮ ‘ਚ ਪੰਜਾਬ ਦੇ ਯੋਗਦਾਨ’ ਸੀ, ਜਿਸ ‘ਚ ਆਜ਼ਾਦੀ ਅੰਦੋਲਨ ਦੇ ਸ਼ਹੀਦਾਂ ਭਗਤ ਸਿੰਘ ਅਤੇ ਊਧਮ ਸਿੰਘ ਨੂੰ ਪ੍ਰਮੁੱਖਤਾ ਨਾਲ ਦਿਖਾਇਆ ਗਿਆ। ਦੋਵੇਂ ਸੁਤੰਤਰਤਾ ਸੈਨਾਨੀ ਪੰਜਾਬ ਤੋਂ ਸਨ। ਝਾਂਕੀ ਦੇ ਬਿਲਕੁੱਲ ਸਾਹਮਣੇ ਬ੍ਰਿਟਿਸ਼ ਸ਼ਾਸਨ ਦੇ ਵਿਰੋਧ ‘ਚ ਹੱਥ ਉਠਾਏ ਹੋਏ ਸ਼ਹੀਦ ਭਗਤ ਸਿੰਘ ਦੀ ਆਦਮਕਦ ਮੂਰਤੀ ਨੂੰ ਉਨ੍ਹਾਂ ਦੇ ਸਾਥੀਆਂ ਰਾਜਗੁਰੂ ਅਤੇ ਸੁਖਦੇਵ ਨਾਲ ਦਰਸਾਇਆ ਗਿਆ। ਝਾਂਕੀ ਦੇ ਮੱਧ ਹਿੱਸੇ ‘ਚ ਪੰਜਾਬ ਦੇ ਇਕ ਹੋਰ ਸੁਤੰਤਰਤਾ ਸੈਨਾਨੀ ਲਾਲ ਲਾਜਪੱਤ ਰਾਏ ਦੇ ਸਾਈਮਨ ਕਮੀਸ਼ਨ ਦਾ ਵਿਰੋਧ ਕਰਨ ਅਤੇ ਜ਼ਖਮੀ ਹੋਣ ਦੇ ਦ੍ਰਿਸ਼ ਨੂੰ ਦਰਸਾਇਆ ਗਿਆ। ਝਾਂਕੀ ‘ਚ ਊਧਮ ਸਿੰਘ ਦਾ ਵੱਡੇ ਆਕਾਰ ਦਾ ਚਿੱਤਰ ਵੀ ਦਿਖਾਇਆ ਗਿਆ, ਜਿਨ੍ਹਾਂ ਨੇ ਮਾਈਕਲ ਓ ‘ਡਾਇਰ ਨੂੰ ਗੋਲੀ ਮਾਰ ਕੇ ਜਲਿਆਂਵਾਲਾ ਬਾਗ ਕਤਲਕਾਂਡ ਦਾ ਬਦਲਾ ਲਿਆ ਸੀ, ਜਦੋਂ ਕਿ ਝਾਂਕੀ ਦੇ ਪਿਛਲੇ ਹਿੱਸੇ ‘ਚ ਪੰਜਾਬ ਦੇ ਕਰਤਾਰਪੁਰ ਦੇ ‘ਜੰਗ-ਏ-ਆਜ਼ਾਦੀ ਸਮਾਰਕ’ ਨੂੰ ਦਿਖਾਇਆ ਗਿਆ ਹੈ।