ਤਿਰੂਪਤੀ ਮੰਦਰ ਨੇ ਵ੍ਹਾਈਟ ਪੇਪਰ ਕੀਤਾ ਜਾਰੀ

* ਮੰਦਰ ਕੋਲ 10 ਟਨ ਸੋਨਾ, 2.26 ਲੱਖ ਕਰੋੜ ਰੁਪਏ ਦੀ ਜਾਇਦਾਦ
ਆਂਧਰਾ ਪ੍ਰਦੇਸ਼-ਤਿਰੁਮਾਲਾ ਤਿਰੂਪਤੀ ਦੇਵ ਸਥਾਨਮ ਟਰੱਸਟ ਨੇ ਸੋਸ਼ਲ ਮੀਡੀਆ ’ਤੇ ਫੈਲ ਰਹੀਆਂ ਰਿਪੋਰਟਾਂ ਦਾ ਖੰਡਨ ਕਰਦਿਆਂ ਆਪਣੀ ਸੰਪਤੀਆਂ ਨੂੰ ਸੂਚੀਬੱਧ ਕਰਨ ਵਾਲਾ ਇਕ ਵ੍ਹਾਈਟ ਪੇਪਰ ਜਾਰੀ ਕੀਤਾ। ਇਸ ’ਚ ਫ਼ਿਕਸਡ ਡਿਪਾਜ਼ਿਟ ਅਤੇ ਸੋਨਾ ਜਮ੍ਹਾ ਕਰਨ ਦਾ ਵੇਰਵਾ ਵੀ ਹੈ। ਟੀ.ਟੀ.ਡੀ. ਨੇ ਘੋਸ਼ਣਾ ਕੀਤੀ ਕਿ ਮੌਜੂਦਾ ਟਰੱਸਟ ਬੋਰਡ ਨੇ 2019 ਤੋਂ ਆਪਣੇ ਨਿਵੇਸ਼ ਦਿਸ਼ਾ-ਨਿਰਦੇਸ਼ਾਂ ਨੂੰ ਮਜ਼ਬੂਤ ਕੀਤਾ ਹੈ।
ਟਰੱਸਟ ਨੇ ਸੋਸ਼ਲ ਮੀਡੀਆ ’ਤੇ ਫੈਲ ਰਹੀਆਂ ਰਿਪੋਰਟਾਂ ਦਾ ਵੀ ਖੰਡਨ ਕੀਤਾ ਕਿ ਟੀ.ਟੀ.ਡੀ. ਦੇ ਪ੍ਰਧਾਨ ਅਤੇ ਬੋਰਡ ਨੇ ਵਾਧੂ ਪੈਸੇ ਨੂੰ ਆਂਧਰਾ ਪ੍ਰਦੇਸ਼ ਸਰਕਾਰ ਦੀਆਂ ਪ੍ਰਤੀਭੂਤੀਆਂ ’ਚ ਵਾਧੂ ਧਨ ਨਿਵੇਸ਼ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਟਰੱਸਟ ਦਾ ਕਹਿਣਾ ਹੈ ਕਿ ਵਾਧੂ ਰਕਮ ਅਨੁਸੂਚਿਤ ਬੈਂਕਾਂ ’ਚ ਨਿਵੇਸ਼ ਕੀਤੀ ਜਾਂਦੀ ਹੈ। ਇਕ ਪ੍ਰੈਸ ਰਿਲੀਜ਼ ’ਚ ਟੀ.ਟੀ.ਡੀ. ਨੇ ਕਿਹਾ ਕਿ ਸ਼੍ਰੀਵਰੀ ਦੇ ਸ਼ਰਧਾਲੂਆਂ ਨੂੰ ਬੇਨਤੀ ਕੀਤੀ ਜਾਂਦੀ ਹੈ ਕਿ ਉਹ ਅਜਿਹੇ ਸਾਜ਼ਿਸ਼ ਭਰੇ ਝੂਠੇ ਪ੍ਰਚਾਰ ’ਚ ਵਿਸ਼ਵਾਸ ਨਾ ਕਰਨ। ਟੀ.ਟੀ.ਡੀ ਵੱਲੋਂ ਬੈਂਕਾਂ ’ਚ ਨਕਦ ਪੈਸਾ ਅਤੇ ਸੋਨਾ ਬਹੁਤ ਹੀ ਪਾਰਦਰਸ਼ੀ ਢੰਗ ਨਾਲ ਜਮ੍ਹਾ ਕੀਤਾ ਜਾਂਦਾ ਹੈ।
ਮੰਦਰ ਟਰੱਸਟ ਨੇ ਕਿਹਾ ਕਿ ਉਨ੍ਹਾਂ ਕੋਲ ਰਾਸ਼ਟਰੀਕ੍ਰਿਤ ਬੈਂਕਾਂ 5,300 ਕਰੋੜ ਰੁਪਏ ਤੋਂ ਵੱਧ ਦੀ ਕੀਮਤ ਵਾਲਾ 10.3 ਟਨ ਦੇ ਲਗਭਗ ਸੋਨਾ ਜਮ੍ਹਾਂ ਹੈ। ਇਸ ਤੋਂ ਇਲਾਵਾ ਮੰਦਰ ਕੋਲ 15,938 ਕਰੋੜ ਰੁਪਏ ਦੀ ਨਕਦੀ ਵੀ ਜਮ੍ਹਾਂ ਹੈ। ਟਾਈਮਜ਼ ਆਫ਼ ਇੰਡੀਆ ਦੀ ਰਿਪੋਰਟ ਦੇ ਅਨੁਸਾਰ ਟੀ.ਟੀ.ਡੀ ਨੇ ਆਪਣੀ ਕੁੱਲ ਜਾਇਦਾਦ 2.26 ਲੱਖ ਕਰੋੜ ਰੁਪਏ ਹੋਣ ਦਾ ਅਨੁਮਾਨ ਲਗਾਇਆ ਹੈ। ਟੀ.ਟੀ.ਡੀ ਦੇ ਕਾਰਜਕਾਰੀ ਅਧਿਕਾਰੀ ਏ.ਵੀ ਧਰਮਾ ਰੈੱਡੀ ਨੇ ਕਿਹਾ ਕਿ ਮੰਦਰ ਟਰੱਸਟ ਦੀ ਕੁੱਲ ਜਾਇਦਾਦ 2.26 ਲੱਖ ਕਰੋੜ ਰੁਪਏ ਹੋ ਗਈ ਹੈ।
ਰੈੱਡੀ ਨੇ ਮੀਡੀਆ ਨਾਲ ਗੱਲ ਕਰਦੇ ਦੱਸਿਆ ਕਿ 2019 ’ਚ ਵੱਖ-ਵੱਖ ਬੈਂਕਾਂ ’ਚ ਫਿਕਸਡ ਡਿਪਾਜ਼ਿਟ ਦੇ ਰੂਪ ’ਚ ਟੀ.ਟੀ.ਡੀ ਨਿਵੇਸ਼ 13,025 ਕਰੋੜ ਰੁਪਏ ਸੀ, ਜੋ ਹੁਣ ਵਧ ਕੇ 15,938 ਕਰੋੜ ਰੁਪਏ ਹੋ ਗਿਆ ਹੈ। ਪਿਛਲੇ ਤਿੰਨ ਸਾਲਾਂ ’ਚ ਨਿਵੇਸ਼ ’ਚ 2,900 ਕਰੋੜ ਰੁਪਏ ਦਾ ਵਾਧਾ ਹੋਇਆ ਹੈ। ਇਹ ਵੀ ਕਿਹਾ ਕਿ ਇਸਦੀ ਜਾਇਦਾਦ ’ਚ ਭਾਰਤ ਭਰ ’ਚ 7,123 ਏਕੜ ਫੈਲੀਆਂ 960 ਜਾਇਦਾਦਾਂ ਵੀ ਸ਼ਾਮਲ ਹਨ।