ਤਾਲਿਬਾਨ ਸਰਕਾਰ ਬਣਨ ਪਿੱਛੋਂ ਸਿੱਖਾਂ ਤੇ ਹਿੰਦੂਆਂ ਨਾਲ ਵਿਤਕਰੇ ਵਧੇ

ਅਫ਼ਗਾਨੀ ਸਿੱਖਾਂ ਸਾਹਮਣੇ ਧਰਮ ਸੰਕਟ- ਇਸਲਾਮ ਕਬੂਲੋ ਜਾਂ ਦੇਸ਼ ਛੱਡੋ
ਕਾਬੁਲ-ਇੰਟਰਨੈਸ਼ਨਲ ਫੋਰਮ ਫਾਰ ਰਾਈਟਸ ਐਂਡ ਸਕਿਓਰਿਟੀ (ਆਈ.ਐੱਫ.ਐੱਫ.ਆਰ.ਏ.ਐੱਸ.) ਨੇ ਕਿਹਾ ਕਿ ਸਿੱਖ ਭਾਈਚਾਰਾ, ਜਿਸ ਦੇ ਮੈਂਬਰ ਕਿਸੇ ਸਮੇਂ ਹਜ਼ਾਰਾਂ ਦੀ ਗਿਣਤੀ ’ਚ ਹੁੰਦੇ ਸਨ, ਹੁਣ ਤਬਾਹ ਹੋ ਗਿਆ ਹੈ। ਤਾਲਿਬਾਨ ਦੇ ਆਉਣ ਪਿੱਛੋਂ ਸਿੱਖਾਂ ਅਤੇ ਹਿੰਦੂਆਂ ਨਾਲ ਵਿਤਕਰੇ ਦੀ ਭਾਵਨਾ ਬਹੁਤ ਵੱਧ ਗਈ ਹੈ। ਨਾਲ ਹੀ ਕੱਟੜ ਹਿੰਸਾ ਵੀ ਵੱਧ ਗਈ ਹੈ। ਇਸ ਸਮੇਂ ਕੁਝ ਸਿੱਖ ਵੀ ਕਾਬੁਲ ’ਚ ਰਹਿੰਦੇ ਹਨ। ਗਜ਼ਨੀ ਅਤੇ ਨੰਗਰਹਾਰ ਸੂਬਿਆਂ ’ਚ ਵੀ ਸਿੱਖਾਂ ਨੇ ਸ਼ਰਨ ਲਈ ਹੋਈ ਹੈ।
5 ਅਕਤੂਬਰ ਨੂੰ 15 ਤੋਂ 20 ਅਤੱਵਾਦੀਆਂ ਨੇ ਕਰਤੇ ਪ੍ਰਵਾਨ ਜ਼ਿਲ੍ਹੇ ਦੇ ਇਕ ਗੁਰਦੁਆਰੇ ’ਚ ਦਾਖ਼ਲ ਹੋ ਕੇ ਗਾਰਡਾਂ ਨੂੰ ਬੰਨ੍ਹ ਦਿੱਤਾ ਸੀ ਅਤੇ ਗੁਰਦੁਆਰੇ ’ਚ ਤੋੜ-ਭੰਨ ਕੀਤੀ ਸੀ। ਸਿੱਖਾਂ ਨੂੰ ਕੁੱਟਿਆ ਵੀ ਗਿਆ ਸੀ। ਕੁੱਝ ਦਿਨ ਪਹਿਲਾਂ ਇਕ ਸਿੱਖ ਹਕੀਮ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਫੋਰਮ ਮੰਨਦੀ ਹੈ ਕਿ ਕਿਉਂਕਿ ਸਿੱਖ ਭਾਈਚਾਰਾ ਇਸਲਾਮ ਦੇ ਸੁੰਨੀ ਭਾਈਚਾਰੇ ਦੀ ਮੁੱਖ ਧਾਰਾ ਅਧੀਨ ਨਹੀਂ ਆਉਂਦਾ, ਇਸ ਲਈ ਉਨ੍ਹਾਂ ਨੂੰ ਜਾਂ ਤਾਂ ਜ਼ਬਰੀ ਸੁੰਨੀ ਮੁਸਲਮਾਨਾਂ ਵਜੋਂ ਤਬਦੀਲ ਕਰ ਦਿੱਤਾ ਜਾਂਦਾ ਹੈ ਜਾਂ ਫਿਰ ਉਨ੍ਹਾਂ ਨੂੰ ਜਾਨ ਤੋਂ ਮਾਰ ਦਿੱਤਾ ਜਾਂਦਾ ਹੈ। ਤਾਲਿਬਾਨ ਦੀ ਸਰਕਾਰ ਕਦੇ ਵੀ ਅਫ਼ਗਾਨ ਸੂਬੇ ’ਚ ਸਮਾਜ ਅੰਦਰ ਵੰਨ-ਸੁਵੰਨਤਾ ਪੈਦਾ ਨਹੀਂ ਹੋਣ ਦੇਵੇਗੀ।