ਤਾਲਿਬਾਨ ਨੇ ਇਸ਼ਤਿਹਾਰਾਂ ’ਚ ਔਰਤਾਂ ਦੀਆਂ ਫੋਟੋਆਂ ’ਤੇ ਲਗਾਈ ਪਾਬੰਦੀ

ਕਾਬੁਲ-ਤਾਲਿਬਾਨ ਨੇ ਕਾਬੁਲ ਸ਼ਹਿਰ ਵਿੱਚ ਸਟੋਰਫਰੰਟ ’ਤੇ ਔਰਤਾਂ ਦੀਆਂ ਫੋਟੋਆਂ ਦੀ ਵਰਤੋਂ ’ਤੇ ਪਾਬੰਦੀ ਲਗਾ ਦਿੱਤੀ ਹੈ। ਟੋਲੋ ਨਿਊਜ਼ ਦੀ ਰਿਪੋਰਟ ਮੁਤਾਬਕ ਕਾਬੁਲ ਨਗਰਪਾਲਿਕਾ ਦੇ ਬੁਲਾਰੇ ਨੇਮਤੁੱਲਾ ਬਰਾਕਜ਼ਈ ਨੇ ਕਿਹਾ ਕਿ ਸਰਕਾਰ ਨੇ ਨਗਰਪਾਲਿਕਾ ਦੇ ਅਧਿਕਾਰੀਆਂ ਨੂੰ ਹੁਕਮ ਦਿੱਤਾ ਹੈ ਕਿ ਉਹ ਕਾਬੁਲ ਦੀਆਂ ਦੁਕਾਨਾਂ ਅਤੇ ਵਪਾਰਕ ਕੇਂਦਰਾਂ ਦੇ ਸਾਈਨ ਬੋਰਡਾਂ ਤੋਂ ਔਰਤਾਂ ਦੀਆਂ ਸਾਰੀਆਂ ਫੋਟੋਆਂ ਹਟਾਉਣ।
ਬਰਾਕਜ਼ਈ ਨੇ ਕਿਹਾ ਕਿ ਸਰਕਾਰ ਦੇ ਫ਼ੈਸਲੇ ਦੇ ਆਧਾਰ ’ਤੇ ਜਿਹੜੀਆਂ ਫੋਟੋਆਂ ਇਸਲਾਮੀ ਨਿਯਮਾਂ ਦੇ ਵਿਰੁੱਧ ਹਨ, ਉਨ੍ਹਾਂ ਨੂੰ ਇਕੱਠਾ ਕੀਤਾ ਜਾਵੇਗਾ ਜਾਂ ਬਿਲਬੋਰਡਾਂ ਤੋਂ ਹਟਾ ਦਿੱਤਾ ਜਾਵੇਗਾ। ਟੋਲੋ ਨਿਊਜ਼ ਦੀ ਰਿਪੋਰਟ ਮੁਤਾਬਕ ਕਾਬੁਲ ਵਿੱਚ ਸੁੰਦਰਤਾ ਸੈਲੂਨ ਦੇ ਮਾਲਕਾਂ ਨੇ ਇਸਲਾਮਿਕ ਅਮੀਰਾਤ ਦੇ ਫ਼ੈਸਲੇ ਦੀ ਆਲੋਚਨਾ ਕੀਤੀ ਅਤੇ ਸਰਕਾਰ ਨੂੰ ਉਨ੍ਹਾਂ ਦੇ ਕਾਰੋਬਾਰ ’ਤੇ ਪਾਬੰਦੀਆਂ ਨਾ ਲਗਾਉਣ ਲਈ ਕਿਹਾ। ਮੇਕਅੱਪ ਆਰਟਿਸਟ ਸ਼ਾਇਸਤਾ ਸੈਫੀ ਨੇ ਸੱਤ ਸਾਲ ਤੱਕ ਬਿਊਟੀ ਸੈਲੂਨ ਵਿੱਚ ਕੰਮ ਕੀਤਾ ਹੈ। ਸ਼ਾਇਸਤਾ ਨੇ ਟੋਲੋ ਨਿਊਜ਼ ਨੂੰ ਦੱਸਿਆ ਕਿ ਇਸ ਕੰਮ ਨਾਲ ਉਹ ਆਪਣੇ 10 ਮੈਂਬਰੀ ਪਰਿਵਾਰ ਦੀ ਆਰਥਿਕ ਮਦਦ ਕਰ ਰਹੀ ਹੈ। ਇਹ ਫਰਮਾਨ ਔਰਤਾਂ ਦੇ ਕੰਮ ’ਤੇ ਪਾਬੰਦੀ ਲਗਾ ਰਿਹਾ ਹੈ। ਡਰ ਹੈ ਕਿ ਉਹ ਅਗਲੇ ਕੁਝ ਦਿਨਾਂ ਵਿੱਚ ਸਾਡੀ ਦੁਕਾਨ ਨੂੰ ਤਾਲਾ ਲਗਾ ਦੇਣਗੇ।
ਇੱਕ ਮਹਿਲਾ ਅਧਿਕਾਰ ਕਾਰਕੁਨ ਪਰਵਾਨਾ ਨੇ ਕਿਹਾ ਕਿ ਸਰਕਾਰ ਨੂੰ ਔਰਤਾਂ ਦੀਆਂ ਫੋਟੋਆਂ ਹਟਾਉਣ ਦਾ ਕੀ ਫਾਇਦਾ? ਤਾਲਿਬਾਨ ਦਾ ਇਹ ਫਰਮਾਨ ਉਦੋਂ ਹੋਇਆ ਹੈ ਜਦੋਂ ਅੰਤਰਰਾਸ਼ਟਰੀ ਸੰਗਠਨਾਂ ਨੇ ਵਾਰ-ਵਾਰ ਤਾਲਿਬਾਨ ਨੂੰ ਔਰਤਾਂ ਦੇ ਅਧਿਕਾਰਾਂ ਨੂੰ ਨਜ਼ਰਅੰਦਾਜ਼ ਨਾ ਕਰਨ ਅਤੇ ਸਮਾਜ ਤੋਂ ਔਰਤਾਂ ਨੂੰ ਹਾਸ਼ੀਏ ’ਤੇ ਨਾ ਰੱਖਣ ਦੀ ਅਪੀਲ ਕੀਤੀ ਹੈ।