ਜਦੋਂ ਲੋਕਾਂ ਨੇ ਸੜਕ ‘ਤੇ ਰੁੜਦੀ ਵੇਖੀ 22 ਲੱਖ ਲੀਟਰ ਵਾਈਨ !

ਨਵੀਂ ਦਿੱਲੀ-ਸੋਸ਼ਲ ਮੀਡੀਆ ‘ਤੇ ਪੁਰਤਗਾਲ ਦੇ ਸਾਓ ਲੋਰੇਨੋ ਡੀ ਬਾਇਰੋ ਵਿੱਚ ਸੜਕਾਂ ‘ਤੇ ਰੈੱਡ ਵਾਈਨ ਦੀ ਨਦੀ ਵਹਿਣ ਦੀ ਵੀਡੀਓ ਵਾਇਰਲ ਹੋ ਰਹੀ ਹੈ, ਜਿੱਥੇ ਲੱਖਾਂ ਲੀਟਰ ਰੈੱਡ ਵਾਈਨ ਸੜਕਾਂ ‘ਤੇ ਵਹਿ ਰਹੀ ਹੈ। ਵਹਾਅ ਇੰਨਾ ਤੇਜ਼ ਸੀ ਕਿ ਕਈ ਘਰਾਂ ਦੇ ਬੇਸਮੈਂਟ ਵੀ ਰੈੱਡ ਵਾਈਨ ਨਾਲ ਭਰ ਗਏ। ਪੁਰਤਗਾਲ ਦੇ ਸਾਓ ਲੋਰੇਨੋ ਡੀ ਬਾਇਰੋ ਦੀਆਂ ਗਲੀਆਂ ‘ਚ ਐਤਵਾਰ ਨੂੰ ਲੱਖਾਂ ਲੀਟਰ ਰੈੱਡ ਵਾਈਨ ਵਹਿਣ ਲੱਗੀ। ਇਹ ਸ਼ਰਾਬ ਕਸਬੇ ਦੀ ਇਕ ਪਹਾੜੀ ਤੋਂ ਸੜਕਾਂ ‘ਤੇ ਵਹਿਣ ਲੱਗੀ, ਜਿਸ ਨੂੰ ਦੇਖ ਕੇ ਹਰ ਕੋਈ ਹੈਰਾਨ ਰਹਿ ਗਿਆ।
ਅਮਰੀਕੀ ਮੀਡੀਆ ਮੁਤਾਬਕ 22 ਲੱਖ ਲੀਟਰ ਤੋਂ ਜ਼ਿਆਦਾ ਰੈੱਡ ਵਾਈਨ ਵਾਲੇ ਟੈਂਕ ਦੇ ਫਟਣ ਕਾਰਨ ਗਲੀਆਂ ‘ਚ ਰੈੱਡ ਵਾਈਨ ਦੀ ਨਦੀ ਵਹਿਣ ਲੱਗੀ। ਇਸ ਵਹਾਅ ਨੇ ਮੁਸੀਬਤ ਖੜ੍ਹੀ ਕਰ ਦਿੱਤੀ ਕਿਉਂਕਿ ਇਹ ਨੇੜੇ ਦੀ ਨਦੀ ਵੱਲ ਤੇਜ਼ੀ ਨਾਲ ਵਧਣ ਲੱਗਾ। ਰੈੱਡ ਵਾਈਨ ਦਾ ਵਹਾਅ ਇੰਨਾ ਸੀ ਕਿ ਘਰਾਂ ਦੇ ਤਹਿਖਾਨੇ ਵੀ ਭਰ ਗਏ। ਲੇਵੀਰਾ ਡਿਸਟਿਲਰੀ ਨੇ ਇਸ ਘਟਨਾ ਲਈ ਮੁਆਫ਼ੀ ਮੰਗੀ ਹੈ ਅਤੇ ਨੁਕਸਾਨ ਅਤੇ ਮੁਰੰਮਤ ਦੇ ਖਰਚੇ ਦੀ ਪੂਰੀ ਜ਼ਿੰਮੇਵਾਰੀ ਲਈ ਹੈ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਫਾਇਰ ਬ੍ਰਿਗੇਡ ਨੇ ਕਾਰਵਾਈ ਸ਼ੁਰੂ ਕਰ ਦਿੱਤੀ, ਇਸ ਤੋਂ ਪਹਿਲਾਂ ਕਿ ਸ਼ੁਰਤਿਮਾ ਨਦੀ ਸ਼ਰਾਬ ਦੀ ਨਦੀ ਵਿੱਚ ਤਬਦੀਲ ਹੋ ਜਾਵੇ। ਰੈੱਡ ਵਾਈਨ ਦੀ ਇੱਕ ਧਾਰਾ ਨੂੰ ਇੱਕ ਨੇੜਲੇ ਖੇਤ ਵੱਲ ਮੋੜ ਦਿੱਤਾ ਗਿਆ।