ਜਗਦੀਪ ਧਨਖੜ ਉਪ ਰਾਸ਼ਟਰਪਤੀ ਲਈ ਐਨਡੀਏ ਦੇ ਉਮੀਦਵਾਰ          

ਕੈਪਟਨ ਨੂੰ ਪਛਾੜ ਧਨਖੜ ਨੇ ਮਾਰੀ ਬਾਜੀ
ਉਪ ਰਾਸ਼ਟਰਪਤੀ ਦੇ ਨਾਂ ਲਈ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਂ ਦੀ ਚਰਚਾ ਹੋ ਰਹੀ ਸੀ। ਚਰਚਾ ਚੱਲ ਰਹੀ ਸੀ ਕਿ ਭਾਜਪਾ ਕੈਪਟਨ ਨੂੰ ਕਿਸੇ ਬਿਹਤਰ ਅਹੁਦੇ ’ਤੇ ਬਿਠਾ ਸਕਦੀ ਹੈ। ਬੀਤੀ ਸ਼ਾਮ ਤੱਕ ਇਹੀ ਚਰਚਾ ਰਹੀ ਅਤੇ ਕੈਪਟਨ ਦੇ ਬਚੇ ਹੋਏ ਕਰੀਬੀ ਇੱਕਾ-ਦੁੱਕਾ ਲੋਕ ਇਸ ਖ਼ਬਰ ਤੋਂ ਕਾਫੀ ਖੁਸ਼ ਸਨ। ਇਸ ਤੋਂ ਬਾਅਦ ਦੇਰ ਸ਼ਾਮ ਐੱਨ.ਡੀ.ਏ. ਵੱਲੋਂ ਜਗਦੀਪ ਧਨਖੜ ਨੂੰ ਉਪ ਰਾਸ਼ਟਰਪਤੀ ਅਹੁਦੇ ਦਾ ਉਮੀਦਵਾਰ ਬਣਾ ਦਿੱਤਾ ਗਿਆ, ਜਿਸ ਤੋਂ ਬਾਅਦ ਕੈਪਟਨ ਅਤੇ ਉਨ੍ਹਾਂ ਦੇ ਕਰੀਬੀਆਂ ਦੇ ਚਿਹਰਿਆਂ ’ਤੇ ਖੁਸ਼ੀ ਦੀ ਲਹਿਰ ਇਕ ਵਾਰ ਫਿਰ ਤੋਂ ‘ਧਰੀ-ਧਰਾਈ’ ਰਹਿ ਗਈ।
ਸੋਸ਼ਲ ਮੀਡੀਆ ’ਤੇ ਕੈਪਟਨ ਨੂੰ ਲੈ ਕੇ ਕਈ ਤਰ੍ਹਾਂ ਦੀਆਂ ਚਰਚਾਵਾਂ ਚੱਲ ਰਹੀਆਂ ਹਨ। ਲੋਕ ਤਾਂ ਇਥੋਂ ਤੱਕ ਕਹਿ ਰਹੇ ਹਨ ਕਿ ‘ਨਹਾਤੀ ਧੋਤੀ ਰਹਿ ਗਈ ਤੇ…’। ਜ਼ਿਕਰਯੋਗ ਹੈ ਕਿ ਕੈਪਟਨ ਸਿਹਤ ਦੇ ਮਾਮਲੇ ’ਚ ਪਿਛਲੇ ਕੁਝ ਸਮੇਂ ਤੋਂ ਬੀਮਾਰ ਚੱਲ ਰਹੇ ਸਨ, ਜਿਸ ਕਾਰਨ ਉਹ ਸਿਆਸੀ ਹਲਕਿਆਂ ਤੋਂ ਗਾਇਬ ਸਨ। ਹਾਲ ਹੀ ’ਚ ਉਨ੍ਹਾਂ ਦਾ ਇੰਗਲੈਂਡ ’ਚ ਇਲਾਜ ਹੋਇਆ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਮੁੜ ਤੋਂ ਰਾਜਨੀਤੀ ’ਚ ਨਵੀਂ ਪਾਰੀ ਸ਼ੁਰੂ ਕਰਨ ਦੀ ਚਰਚਾ ਸੀ।