ਚੀਨ ਨੇ ਹਾਂਗਕਾਂਗ ਤੋਂ ਗੈਰ-ਕਾਨੂੰਨੀ ਆਮਦ ਬਾਰੇ ਮੰਗੀ ਜਾਣਕਾਰੀ

ਬੀਜਿੰਗ- ਚੀਨ ਦੇ ਕਈ ਸ਼ਹਿਰਾਂ ਨੇ ਕੋਵਿਡ-19 ਮਹਾਮਾਰੀ ਦੀ ਪੰਜਵੀਂ ਲਹਿਰ ਨਾਲ ਜੂਝ ਰਹੇ ਹਾਂਗਕਾਂਗ ਤੋਂ ਗੈਰ-ਕਾਨੂੰਨੀ ਰੂਪ ਨਾਲ ਮੁੱਖ ਭੂਮੀ ਵਿੱਚ ਦਾਖਲ ਹੋਣ ਵਾਲੇ ਲੋਕਾਂ ਬਾਰੇ ਜਾਣਕਾਰੀ ਦੇਣ ਲਈ ਨਕਦ ਇਨਾਮਾਂ ਦਾ ਐਲਾਨ ਕੀਤਾ ਹੈ। ਸਰਕਾਰੀ ਮੀਡੀਆ ਨੇ ਸ਼ਨੀਵਾਰ ਨੂੰ ਇਹ ਖਬਰ ਦਿੱਤੀ। ਰਾਜ-ਸੰਚਾਲਿਤ ਗਲੋਬਲ ਟਾਈਮਜ਼ ਦੀ ਰਿਪੋਰਟ ਅਨੁਸਾਰ, ਦੱਖਣੀ ਚੀਨ ਦੇ ਗੁਆਂਗਡੋਂਗ ਸੂਬੇ ਵਿੱਚ ਹਾਂਗਕਾਂਗ ਦੇ ਨੇੜੇ ਜ਼ੂਹਾਈ, ਹੁਈਝੋ ਅਤੇ ਡੋਂਗਗੁਆਨ ਸ਼ਹਿਰਾਂ ਨੇ ਹਾਂਗਕਾਂਗ ਸਪੈਸ਼ਲ ਟੈਰੀਟਰੀ ਤੋਂ ਗੈਰ-ਕਾਨੂੰਨੀ ਤੌਰ ‘ਤੇ ਆਉਣ ਵਾਲੇ ਸ਼ੱਕੀਆਂ ਬਾਰੇ ਜਾਣਕਾਰੀ ਦੇਣ ਵਾਲੇ ਕਿਸੇ ਵੀ ਵਿਅਕਤੀ ਲਈ ਨਕਦ ਇਨਾਮ ਦਾ ਐਲਾਨ ਕੀਤਾ ਹੈ। ਅਖਬਾਰ ਮੁਤਾਬਕ, ਹਾਂਗਕਾਂਗ ‘ਚ ਲਗਾਈਆਂ ਗਈਆਂ ਪਾਬੰਦੀਆਂ ਤੋਂ ਬਚਣ ਲਈ ਲੋਕਾਂ ਦੇ ਸੜਕ ਅਤੇ ਜਲ ਮਾਰਗਾਂ ਨੂੰ ਛੱਡ ਕੇ ਮੁੱਖ ਭੂਮੀ ਵੱਲ ਭੱਜਣ ਦੀਆਂ ਖਬਰਾਂ ਤੋਂ ਬਾਅਦ ਇਹ ਐਲਾਨ ਕੀਤਾ ਗਿਆ ਹੈ। ‘ਸਾਊਥ ਚਾਈਨਾ ਮਾਰਨਿੰਗ ਪੋਸਟ’ ਅਖਬਾਰ ਮੁਤਾਬਕ ਸ਼ਨੀਵਾਰ ਨੂੰ ਹਾਂਗਕਾਂਗ ‘ਚ ਕੋਵਿਡ-19 ਦੇ 6,063 ਮਾਮਲੇ ਸਾਹਮਣੇ ਆਏ। ਇਸ ਦੇ ਨਾਲ ਹੀ 15 ਹੋਰ ਮਰੀਜ਼ਾਂ ਦੀ ਮੌਤ ਦੇ ਨਾਲ ਹੀ ਹਾਂਗਕਾਂਗ ‘ਚ ਕੋਰੋਨਾ ਵਾਇਰਸ ਨਾਲ ਮਰਨ ਵਾਲਿਆਂ ਦੀ ਗਿਣਤੀ 280 ਹੋ ਗਈ ਹੈ। ਹਾਂਗਕਾਂਗ ਵਿੱਚ ਹੁਣ ਤੱਕ ਸੰਕਰਮਣ ਦੇ 46,763 ਮਾਮਲੇ ਸਾਹਮਣੇ ਆਏ ਹਨ।ਅਧਿਕਾਰਤ ਨੋਟੀਫਿਕੇਸ਼ਨ ਦੇ ਅਨੁਸਾਰ, ਚੀਨ ਦੇ ਜ਼ੁਹਾਈ ਅਤੇ ਡੋਂਗਗੁਆਨ ਸ਼ਹਿਰਾਂ ਨੇ ਹਾਂਗਕਾਂਗ ਨਿਵਾਸੀ ਨੂੰ ਗੈਰ-ਕਾਨੂੰਨੀ ਤੌਰ ‘ਤੇ ਵਾਹਨ ਜਾਂ ਕਿਸ਼ਤੀ ਰਾਹੀਂ ਤਸਕਰੀ ਕਰਨ ਵਾਲੇ ਵਿਅਕਤੀ ਦੀ ਸੂਚਨਾ ਦੇਣ ਲਈ ਇੱਕ ਲੱਖ ਯੂਆਨ ਤੱਕ ਦੇ ਇਨਾਮ ਦਾ ਐਲਾਨ ਕੀਤਾ ਹੈ। ਨੋਟੀਫਿਕੇਸ਼ਨ ਮੁਤਾਬਕ ਤਸਕਰੀ ਕਰਨ ਵਾਲੇ ਗਰੁੱਪ ਬਾਰੇ ਜਾਣਕਾਰੀ ਦੇਣ ਲਈ 30 ਹਜ਼ਾਰ ਯੁਆਨ ਅਤੇ ਗੈਰ-ਕਾਨੂੰਨੀ ਢੰਗ ਨਾਲ ਸਰਹੱਦ ਪਾਰ ਕਰਨ ਦੀ ਸੂਚਨਾ ਦੇਣ ਲਈ 10 ਹਜ਼ਾਰ ਯੂਆਨ ਦੇਣ ਦਾ ਐਲਾਨ ਕੀਤਾ ਗਿਆ ਹੈ। ਚੇਂਗਜ਼ੂ ਅਤੇ ਨਾਨ ਸ਼ਹਿਰਾਂ ਨੇ ਵੀ ਇਸੇ ਤਰ੍ਹਾਂ ਦੇ ਐਲਾਨ ਕੀਤੇ ਹਨ।