ਸਿਆਸਤਖਬਰਾਂਦੁਨੀਆ

ਚੀਨ ਦੀ ਸੀ. ਪੀ. ਸੀ. ਨੇ ਸ਼ੀ ਜਿਨਪਿੰਗ ਨੂੰ ਦੱਸਿਆ ਦੇਸ ਦਾ ‘ਖੇਵਨਹਾਰ’

ਇਸਲਾਮਾਬਾਦ-ਹੁੁਣੇ ਜਿਹੇ ਚੀਨ ਦੀ ਸੀ. ਪੀ. ਸੀ. ਨੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੂੰ ਆਪਣਾ ‘ਖੇਵਨਹਾਰ’ ਕਰਾਰ ਦਿੱਤਾ ਅਤੇ ਕਿਹਾ ਕਿ ਉਹ ਅਜਿਹੇ ਆਗੂ ਵਜੋਂ ਉਭਰੇ ਹਨ, ਜਿਸ ਨੇ ਪਾਰਟੀ ਨੂੰ ਮਜ਼ਬੂਤ ਲੀਡਰਸ਼ਿਪ ਦਿੱਤੀ ਹੈ ਅਤੇ ਉਹ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਹੈ। ਸ਼ੀ ਆਪਣੇ ਅਹੁਦੇ ’ਤੇ ਰਿਕਾਰਡ ਤੀਜੇ ਕਾਰਜਕਾਲ ਦੀ ਤਿਆਰੀ ਕਰ ਰਹੇ ਹਨ। ਦੱਸ ਦਈਏ ਕਿ ਹੁਣ ਤੱਕ ‘ਖੇਵਨਹਾਰ’ ਦਾ ਦਰਜਾ ਪਾਰਟੀ ਦੇ ਸੰਸਥਾਪਕ ਮਾਓਤਸੇ ਤੁੰਗ ਨੂੰ ਹੀ ਮਿਲਿਆ ਸੀ। ਸੀ. ਪੀ. ਸੀ. ਨੇ ਅਮਰੀਕੀ ਰਾਸ਼ਟਰਪਤੀ ਜੋ ਬਿਡੇਨ ’ਤੇ ਵੀ ਨਿਸ਼ਾਨਾ ਸਾਧਦੇ ਹੋਏ ਕਿਹਾ ਕਿ ਲੋਕਤੰਤਰ ਕੋਲ ਅਮਰੀਕਾ ਜਾਂ ਪੱਛਮੀ ਦੇਸ਼ਾਂ ਦਾ ‘‘ਵਿਸ਼ੇਸ਼ ਪੇਟੈਂਟ” ਨਹੀਂ ਹੈ।
ਮੁੱਖ ਨੇਤਾ ਦੇ ਤੌਰ ’ਤੇ ਸ਼ੀ ਦਾ ਦਰਜਾ ਵਧਾਉਣ ਦੇ ਪਾਰਟੀ ਦੇ ਫ਼ੈਸਲੇ ਦਾ ਬਚਾਅ ਕਰਦੇ ਹੋਏ ਸੀ. ਪੀ. ਸੀ. ਦੇ ਨੀਤੀ ਖੋਜ ਦੇ ਨਿਰਦੇਸ਼ਕ ਜਿਆਨ ਜਿਨਕੁਆਨ ਨੇ ਇੱਕ ਨਿਊਜ਼ ਕਾਨਫਰੰਸ ਨੂੰ ਕਿਹਾ ਕਿ, ‘‘1.4 ਅਰਬ ਦੀ ਆਬਾਦੀ ਵਾਲੇ ਦੇਸ਼ ’ਚ ਜੇਕਰ ਪਾਰਟੀ ਦਾ ਇਕ ਮੁੱਖ ਨੇਤਾ ਨਹੀਂ ਹੈ ਤਾਂ ਇਹ ਕਲਪਨਾ ਤੋਂ ਬਾਹਰ ਹੁੰਦਾ। ਰਾਸ਼ਟਰਪਤੀ ਸ਼ੀ (68) ਸੀ. ਪੀ. ਸੀ. ਦੇ ਜਨਰਲ ਸਕੱਤਰ ਅਤੇ ਕੇਂਦਰੀ ਮਿਲਟਰੀ ਕਮਿਸ਼ਨ ਦੇ ਚੇਅਰਮੈਨ ਵੀ ਹਨ। ਚੀਨ ਦੀ ਕਮਿਊਨਿਸਟ ਪਾਰਟੀ ਦੀ ਬੀਤੇ ਵੀਰਵਾਰ ਨੂੰ ਸਮਾਪਤ ਹੋਈ ਚਾਰ-ਰੋਜ਼ਾ ਪੂਰਨ ਮੀਟਿੰਗ ’ਚ ਇੱਕ ਇਤਿਹਾਸਕ ਮਤਾ ਪਾਸ ਕੀਤਾ ਗਿਆ, ਜਿਸ ਨੇ ਦੇਸ਼ ਦੇ ਰਾਜਨੀਤਿਕ ਇਤਿਹਾਸ ’ਚ ਜਿਨਪਿੰਗ ਦੇ ਮੁੱਖ ਨੇਤਾ ਦੀ ਸਥਿਤੀ ਨੂੰ ਮਜ਼ਬੂਤ ਕੀਤਾ। ਇਸ ਦੇ ਨਾਲ ਹੀ ਅਗਲੇ ਸਾਲ ਰਾਸ਼ਟਰਪਤੀ ਜਿਨਪਿੰਗ ਦੇ ਰਿਕਾਰਡ ਤੀਜੇ ਕਾਰਜਕਾਲ ਲਈ ਵੀ ਰਸਤਾ ਸਾਫ਼ ਹੋ ਗਿਆ ਹੈ।
ਜਿਆਨ ਨੇ ਕਿਹਾ ਕਿ ਜਿਨਪਿੰਗ, ‘‘ਪਾਰਟੀ ਦੇ ਮੁਖੀ ਲੋਕਾਂ ਦੇ ਨੇਤਾ ਅਤੇ ਸੈਨਾ ਕਮਾਂਡਰ ਦੇ ਤੌਰ ’ਤੇ ਉੱਚ ਯੋਗਤਾ ਰੱਖਦੇ ਹਨ। ਉਸ ਦੀ ਅਗਵਾਈ ਸਮੇਂ ਦੀ ਮੰਗ, ਇਤਿਹਾਸ ਦੀ ਚੋਣ ਅਤੇ ਲੋਕਾਂ ਦੀ ਇੱਛਾ ਹੈ। ਉਨ੍ਹਾਂ ਪਾਰਟੀ ਨੂੰ ਮਜ਼ਬੂਤੀ ਨਾਲ ਫੜਿਆ ਹੋਇਆ ਹੈ। ਉਹ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਹਨ। ਜਿਆਨ ਨੇ ਅੱਗੇ ਕਿਹਾ, ਪੱਛਮੀ ਦੇਸ਼ਾਂ ਦਾ ਲੋਕਤੰਤਰ ’ਤੇ ਕੋਈ ਵਿਸ਼ੇਸ਼ ਏਕਾਧਿਕਾਰ ਨਹੀਂ ਹੈ। ਸਿਰਫ਼ ਪੱਛਮੀ ਦੇਸ਼ ਹੀ ਇਸ ਨੂੰ ਪਰਿਭਾਸ਼ਤ ਜਾਂ ਨਿਰਧਾਰਿਤ ਨਹੀਂ ਕਰ ਸਕਦੇ। ਪੱਛਮ ਦਾ ਚੁਣਾਵੀ ਲੋਕਤੰਤਰ ਅਸਲ ’ਚ ਪੂੰਜੀ ਦੁਆਰਾ ਚਲਾਇਆ ਜਾਂਦਾ ਹੈ ਅਤੇ ਅਸਲ ’ਚ ਲੋਕਤੰਤਰ ਨਹੀਂ ਸਗੋਂ ਅਮੀਰਾਂ ਦੀ ਖੇਡ ਹੈ।’’

Comment here