ਚੀਨ ‘ਚ ਟੀਵੀ ਕਲਾਕਾਰ ਹੁਣ ਨਹੀਂ ਕਰ ਸਕਣਗੇ ਮਨ-ਮਾਨੀਆਂ

ਬੀਜਿੰਗ: ਚੀਨ ਨੇ ਹੁਣ ਟੀਵੀ ਅਦਾਕਾਰਾਂ ਦੀ ਮਨਮਾਨੀ ਅਤੇ ਸੈਲੀਬ੍ਰਿਟੀ ਕਲਚਰ ‘ਤੇ ਸ਼ਿਕੰਜਾ ਕੱਸਣਾ ਸ਼ੁਰੂ ਕਰ ਦਿੱਤਾ ਹੈ। ਦਰਅਸਲ, ਹਾਲ ਹੀ ਵਿੱਚ ਇੱਕ ਟੀਵੀ ਅਦਾਕਾਰਾ ਨੇ ਅਦਾਕਾਰੀ ਲਈ 25 ਮਿਲੀਅਨ ਅਮਰੀਕੀ ਡਾਲਰ ਦੀ ਵੱਡੀ ਰਕਮ ਮੰਗੀ ਸੀ। ਇਸ ਤੋਂ ਬਾਅਦ ਚੀਨ ਸਰਕਾਰ ਨੇ ਠੋਸ ਕਦਮ ਚੁੱਕਦੇ ਹੋਏ ਸਖ਼ਤ ਨਿਯਮ ਲਾਗੂ ਕੀਤੇ ਹਨ। ਇਸ ਤੋਂ ਬਾਅਦ ਹੁਣ ਕੋਈ ਵੀ ਟੀਵੀ ਐਕਟਰ ਵਾਧੂ ਫੀਸ ਨਹੀਂ ਲੈ ਸਕੇਗਾ। ਇਸ ਤੋਂ ਪਹਿਲਾਂ, ਸਾਊਥ ਚਾਈਨਾ ਮਾਰਨਿੰਗ ਪੋਸਟ ਦੀ ਰਿਪੋਰਟ ਦੇ ਅਨੁਸਾਰ, ਚੀਨ ਦੇ ਨੈਸ਼ਨਲ ਰੇਡੀਓ ਅਤੇ ਟੈਲੀਵਿਜ਼ਨ ਪ੍ਰਸ਼ਾਸਨ ਨੇ ਅਗਲੇ 5 ਸਾਲਾਂ ਲਈ ਟੀਵੀ ਉਤਪਾਦਨ ਲਈ ਇੱਕ ਬਲੂ ਪ੍ਰਿੰਟ ਜਾਰੀ ਕੀਤਾ ਸੀ, ਜਿਸ ਵਿੱਚ ਕਲਾਕਾਰ ਵੱਧ ਤੋਂ ਵੱਧ ਰਕਮ ਲੈ ਸਕਦੇ ਹਨ। ਇਸ ਮੁਤਾਬਕ ਕਿਸੇ ਵੀ ਅਦਾਕਾਰ ਵੱਲੋਂ ਅਦਾਕਾਰੀ ਲਈ ਕੁੱਲ ਉਤਪਾਦਨ ਲਾਗਤ ਦਾ ਵੱਧ ਤੋਂ ਵੱਧ 40 ਫ਼ੀਸਦੀ ਤਜਵੀਜ਼ ਕੀਤਾ ਗਿਆ ਸੀ। ਯੋਜਨਾ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਮੁੱਖ ਕਲਾਕਾਰ ਲਈ ਰਕਮ ਦੀ ਇਹ ਸੀਮਾ ਕੁੱਲ ਪ੍ਰੋਡਕਸ਼ਨ ਕਾਸਟ ਦੇ 70 ਪ੍ਰਤੀਸ਼ਤ ਤੋਂ ਵੱਧ ਨਹੀਂ ਹੋਣੀ ਚਾਹੀਦੀ। ਹਾਲਾਂਕਿ ਇਹ ਨਿਯਮ ਪਹਿਲੀ ਵਾਰ 2017 ‘ਚ ਲਾਗੂ ਕੀਤਾ ਗਿਆ ਸੀ ਪਰ ਇਸ ਦਾ ਪਾਲਣ ਨਹੀਂ ਕੀਤਾ ਗਿਆ ਸੀ।  ਚੀਨ ਵਿੱਚ ਸੈਲੀਬ੍ਰਿਟੀ ਕਲਚਰ ‘ਤੇ ਸ਼ਿਕੰਜਾ ਕੱਸਣ ਦੀ ਲੋੜ ਉਦੋਂ ਆਈ ਜਦੋਂ ਪਿਛਲੇ ਸਾਲ ਅਪ੍ਰੈਲ ਵਿੱਚ ਇਹ ਸਾਹਮਣੇ ਆਇਆ ਕਿ ਮਸ਼ਹੂਰ ਚੀਨੀ ਅਭਿਨੇਤਰੀ ਜ਼ੇਂਗ ਸ਼ੁਆਂਗ ਨੂੰ ਸਿਰਫ਼ 77 ਦਿਨਾਂ ਲਈ ਇੱਕ ਟੀਵੀ ਸ਼ੋਅ ਵਿੱਚ ਕੰਮ ਕਰਨ ਲਈ 160 ਮਿਲੀਅਨ ਯੂਆਨ (25.1 ਮਿਲੀਅਨ ਡਾਲਰ) ਦਾ ਚਾਰਜ ਮਿਲਿਆ। ਇਸ ਖੁਲਾਸੇ ਤੋਂ ਬਾਅਦ ਲੋਕਾਂ ‘ਚ ਗੁੱਸਾ ਆ ਗਿਆ ਅਤੇ ਫਿਰ ਅਧਿਕਾਰੀਆਂ ਨੇ ਜਾਂਚ ਦੇ ਹੁਕਮ ਦਿੱਤੇ। ਇਕ ਸਥਾਨਕ ਖਬਰ ਮੁਤਾਬਕ ਮਾਮਲੇ ਦੀ ਜਾਂਚ ਦੌਰਾਨ ਪਤਾ ਲੱਗਾ ਕਿ ਟੀਵੀ ਪ੍ਰੋਡਕਸ਼ਨ ਟੀਮ ਨੇ ਨਿਯਮਾਂ ਦੀ ਅਣਦੇਖੀ ਕੀਤੀ ਹੈ। ਇਹ ਸਪੱਸ਼ਟ ਨਹੀਂ ਸੀ ਕਿ ਟੀਵੀ ਸ਼ੋਅ ਦਾ ਕੁੱਲ ਬਜਟ ਕਿੰਨਾ ਸੀ। ਇਸ ਦੇ ਨਾਲ ਹੀ ਬੀਜਿੰਗ ਦੇ ਅਧਿਕਾਰੀਆਂ ਨੇ 2019 ਤੋਂ 2020 ਦਰਮਿਆਨ ਟੈਕਸ ਚੋਰੀ ਲਈ ਸ਼ੁਆਂਗ ‘ਤੇ 45 ਮਿਲੀਅਨ ਅਮਰੀਕੀ ਡਾਲਰ ਦਾ ਜੁਰਮਾਨਾ ਲਗਾਇਆ ਹੈ। ਇਸ ਤੋਂ ਇਲਾਵਾ ਟੀਵੀ ਪ੍ਰੋਡਿਊਸਰ ਨੂੰ ਹੁਕਮ ਦਿੱਤਾ ਗਿਆ ਸੀ ਕਿ ਉਹ ਉਸ ਨੂੰ ਹੁਣ ਹੋਰ ਸ਼ੋਅਜ਼ ਵਿੱਚ ਨਾ ਰੱਖੇ।