ਚਰਨਜੀਤ ਚੰਨੀ ਵੱਲੋਂ ਲਏ ਫ਼ੈਸਲਿਆਂ ਦੀਆਂ ਫਾਈਲਾਂ ਦੀ ਘੋਖ ਸ਼ੁਰੂ

ਚੰਡੀਗੜ੍ਹ-ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੇ ਹੁਕਮਾਂ ’ਤੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਵੱਲੋਂ ਲਏ ਫ਼ੈਸਲਿਆਂ ਦੀਆਂ ਫਾਈਲਾਂ ਵੀ ਸਰਕਾਰ ਘੋਖਣ ’ਚ ਲੱਗੀ ਹੋਈ ਹੈ। ਪੰਜਾਬ ਵਿਜੀਲੈਂਸ ਵੱਲੋਂ ਕਾਂਗਰਸ ਦੇ ਸਾਬਕਾ ਮੰਤਰੀਆਂ, ਵਿਧਾਇਕਾਂ ਵੱਲੋਂ ਆਪਣੀ ਸਰਕਾਰ ਦੌਰਾਨ ਲਏ ਗਏ ਆਪ ਹੁਦਰੀ ਵਾਲੇ ਫੈਸਲਿਆਂ ਦੇ ਚੱਲਦੇ ਨਿੱਤ ਨਵੇਂ ਸਕੈਂਡਲ ਕੱਢੇ ਜਾ ਰਹੇ ਹਨ। ਇਸੇ ਤਹਿਤ ਵਿਜੀਲੈਂਸ ਹੁਣ ਤੱਕ ਤਤਕਾਲੀ ਕਾਂਗਰਸ ਸਰਕਾਰ ਦੇ ਤਿੰਨ ਕੈਬਨਿਟ ਮੰਤਰੀਆਂ iਖ਼ਲਾਫ ਕੇਸ ਦਰਜ ਕਰ ਚੁੱਕੀ ਹੈ ਅਤੇ ਆਉਣ ਵਾਲੇ ਦਿਨਾਂ ’ਚ ਕਾਂਗਰਸ ਸਰਕਾਰ ’ਚ ਰਹੇ ਮੰਤਰੀ ਅਤੇ ਹੋਰ ਆਗੂ ਵੀ ਵੱਖ-ਵੱਖ ਕੇਸਾਂ ਵਿਚ ਫਸ ਸਕਦੇ ਹਨ। ਕਿੱਟ ਖਰੀਦਣ ਦੇ ਮਾਮਲੇ ’ਚ ਹੋਈ ਕਥਿਤ ਹੇਰਾਫੇਰੀ ਨੂੰ ਲੈ ਕੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ, ਖੇਡ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੂੰ ਸ਼ਿਕਾਇਤਾਂ ਪੁੱਜ ਚੁੱਕੀਆਂ ਹਨ।
ਜਲੰਧਰ ਜ਼ਿਲ੍ਹੇ ਨਾਲ ਸਬੰਧਤ ਕਈ ਖਿਡਾਰੀਆਂ ਨੇ ਮੁੱਖ ਮੰਤਰੀ ਅਤੇ ਖੇਡ ਵਿਭਾਗ ਦੇ ਉੱਚ-ਅਧਿਕਾਰੀਆਂ ਨੂੰ ਸ਼ਿਕਾਇਤ ਭੇਜ ਕੇ ਕਿੱਟ ਘਪਲੇ ਦੀ ਜਾਂਚ ਦੀ ਮੰਗ ਕੀਤੀ ਹੈ। ਤਤਕਾਲੀ ਸਰਕਾਰ ਨੇ ਖਿਡਾਰੀਆਂ ਨੂੰ ਕਿੱਟਾਂ ਦੇਣ ਲਈ ਰਾਸ਼ੀ ਸਿੱਧੀ ਖਿਡਾਰੀਆਂ, ਨੌਜਵਾਨਾਂ ਦੇ ਖਾਤਿਆਂ ’ਚ ਤਬਦੀਲ ਕਰ ਦਿੱਤੀ ਪਰ ਕੁੱਝ ਦਿਨ ਬਾਅਦ ਇਹ ਰਾਸ਼ੀ ਵਾਪਸ ਲੈ ਲਈ ਗਈ ਅਤੇ ਕਈਆਂ ਨੂੰ ਇਹ ਰਾਸ਼ੀ ਇਕ ਵਿਸ਼ੇਸ਼ ਫਰਮ ਨੂੰ ਦੇਣ ਲਈ ਕਿਹਾ ਗਿਆ। ਦੱਸਿਆ ਜਾਂਦਾ ਹੈ ਕਿ ਜਿਸ ਕੰਪਨੀ, ਫਰਮ ਤੋਂ ਖਿਡਾਰੀਆਂ ਲਈ ਕਿੱਟ ਜਿਸ ’ਚ ਨਿੱਕਰ, ਟੀ-ਸ਼ਰਟ ਅਤੇ ਹੋਰ ਸਮਾਨ ਸੀ, ਉਹ ਕੁਆਲਿਟੀ ਪੱਖੋਂ ਵੀ ਚੰਗੀ ਨਹੀਂ ਸੀ। ਇਕ ਉੱਚ ਅਧਿਕਾਰੀ ਨੇ ਕਿੱਟ ਘੁਟਾਲੇ ਸਬੰਧੀ ਕੁੱਝ ਖਿਡਾਰੀਆਂ ਵੱਲੋਂ ਸ਼ਿਕਾਇਤ ਦੇਣ ਦੀ ਪੁਸ਼ਟੀ ਕੀਤੀ ਹੈ। ਪੁਲਸ ਨੇ ਪਹਿਲਾਂ ਚੰਨੀ ਦੇ ਇਕ ਨਜ਼ਦੀਕੀ iਖ਼ਲਾਫ ਦਰਿਆ ’ਚੋਂ ਮਾਈਨਿੰਗ ਕਰਨ ਦੇ ਮਾਮਲੇ ’ਚ ਅਤੇ ਈ. ਡੀ. ਨੇ ਚੰਨੀ ਦੇ ਭਾਣਜੇ ਹਨੀ iਖ਼ਲਾਫ਼ ਕੇਸ ਦਰਜ ਕੀਤਾ ਹੋਇਆ ਹੈ।