ਗਾਜ਼ੀਆਬਾਦ ਦੁਨੀਆ ਦਾ ਦੂਜਾ ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰ

ਨਵੀਂ ਦਿੱਲੀ- ਵਾਤਾਵਰਣ ਬਾਰੇ ਅਤੇ ਪ੍ਰਦੂਸ਼ਣ ਬਾਰੇ ਆਈ ਇਕ ਕੌਮਾਂਤਰੀ ਰਿਪੋਰਟ ਮੁਤਾਬਕ 2020 ਵਿਚ ਬੰਗਲਾਦੇਸ਼ ਸਭ ਤੋਂ ਪ੍ਰਦੂਸ਼ਤ ਦੇਸ਼ ਰਿਹਾ। ਉਸ ਤੋਂ ਬਾਅਦ ਪਾਕਿਸਤਾਨ, ਭਾਰਤ ਤੇ ਮੰਗੋਲੀਆ ਦਾ ਨੰਬਰ ਰਿਹਾ। ਬ੍ਰਿਟਿਸ਼ ਕੰਪਨੀ ਹਾਊਸਫ੍ਰੈੱਸ਼ ਵੱਲੋਂ ਤਿਆਰ ਕੀਤੀ ਗਈ ਇੱਕ ਰਿਪੋਰਟ ਵਿੱਚ ਚੀਨ ਦੇ ਝਿੰਜਿਆਂਗ ਸੂਬੇ ਦੇ ਹੋਟਨ ਸ਼ਹਿਰ ਨੂੰ ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰ ਦੱਸਿਆ ਗਿਆ ਹੈ। ਦੁਨੀਆ ਭਰ ਦੇ 50 ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰਾਂ ’ਚ 49 ਸ਼ਹਿਰ ਸਿਰਫ ਬੰਗਲਾਦੇਸ਼, ਚੀਨ, ਪਾਕਿਸਤਾਨ ਤੇ ਭਾਰਤ ਤੋਂ ਹਨ। ਇਸ ਸੂਚੀ ਭਾਰਤ ਦੇ ਉੱਤਰ ਪ੍ਰਦੇਸ਼ ਸੂਬੇ ਦਾ ਗਾਜ਼ੀਆਬਾਦ ਸ਼ਹਿਰ ਦੂਜੇ ਨੰਬਰ ’ਤੇ ਹੈ। ਗਾਜ਼ੀਆਬਾਦ ’ਚ ਪੀ. ਐੱਮ. 2.5 ਦਾ ਲੈਵਲ 106.6 ਮਾਈਕ੍ਰੋਗ੍ਰਾਮ/ਐੱਮ. 3 ਤਕ ਪਾਇਆ ਗਿਆ ਹੈ। ਪੀ. ਐੱਮ. 2.5 ਪੀ. ਐੱਮ. ਕਣ ਬਾਰੇ ਦੱਸਦਾ ਹੈ। ਪੀ. ਐੱਮ. 2.5 ਸਭ ਤੋਂ ਛੋਟੇ ਹਵਾ ਦੇ ਕਣਾਂ ’ਚੋਂ ਹੁੰਦੇ ਹਨ  ਅਤੇ ਇਨ੍ਹਾਂ ਦਾ ਆਕਾਰ 2.5 ਮਾਈਕ੍ਰੋਮੀਟਰ ਦੇ ਨੇੜੇ-ਤੇੜੇ ਹੁੰਦਾ ਹੈ। ਉਥੇ ਹੀ ਆਸਟ੍ਰੇਲੀਆ ’ਚ ਕਸਮਾਨੀਆਈ ਸ਼ਹਿਰ ਜੁਡਬਰੀ ਸਭ ਤੋਂ ਸਾਫ਼ ਸ਼ਹਿਰ ਹੈ। ਇਥੇ ਪੀ. ਐੱਮ. 2.5 ਦਾ ਪੱਧਰ 2.4μg/m3 ’ਤੇ ਪਾਇਆ ਗਿਆ। ਇਸ ਤੋਂ ਬਾਅਦ ਅਮਰੀਕਾ ਦੇ ਹਵਾਈ ’ਚ ਕੈਲੁਆ ਕੋਨਾ ਅਤੇ ਫਿਨਲੈਂਡ ’ਚ ਮੁਓਨੀਯੋ 2020 ’ਚ ਸਾਫ਼ ਹਵਾ ਦੇ ਮਾਮਲੇ ’ਚ ਕ੍ਰਮਵਾਰ ਦੂਜੇ ਅਤੇ ਤੀਜੇ ਨੰਬਰ ’ਤੇ ਰਹੇ।