ਸਿਆਸਤਖਬਰਾਂਦੁਨੀਆ

ਗਲੋਬਮਾਸਟਰ ਸੀ-17 ਜਹਾਜ਼ 12 ਚੀਤਿਆਂ ਨੂੰ ਲੈ ਕੇ ਭਾਰਤ ਪਹੁੰਚਿਆ

ਗਵਾਲੀਅਰ-ਭਾਰਤ ‘ਚ ਆਖ਼ਰੀ ਚੀਤਾ 1948 ‘ਚ ਛੱਤੀਸਗੜ੍ਹ ਦੇ ਕੋਰੀਆ ਜ਼ਿਲ੍ਹੇ ਦੇ ਸਾਲ ਵਨ ‘ਚ ਮ੍ਰਿਤਕ ਪਾਇਆ ਗਿਆ ਸੀ। ਦੁਨੀਆ ਦੇ ਜ਼ਿਆਦਾਤਰ 7,000 ਚੀਤੇ ਦੱਖਣੀ ਅਫ਼ਰੀਕਾ, ਨਾਮੀਬੀਆ ਅਤੇ ਬੋਤਸਵਾਨਾ ‘ਚ ਰਹਿੰਦੇ ਹਨ। ਨਾਮੀਬੀਆ ‘ਚ ਚੀਤਿਆਂ ਦੀ ਸਭ ਤੋਂ ਵੱਧ ਆਬਾਦੀ ਹੈ। ਦੱਖਣੀ ਅਫ਼ਰੀਕਾ ਤੋਂ 12 ਚੀਤਿਆਂ ਨੂੰ ਲੈ ਕੇ ਭਾਰਤੀ ਹਵਾਈ ਫ਼ੌਜ ਦਾ ਜਹਾਜ਼ ‘C-17 ਗਲੋਬਮਾਸਟਰ’ ਮੱਧ ਪ੍ਰਦੇਸ਼ ਦੇ ਗਵਾਲੀਅਰ ਹਵਾਈ ਅੱਡੇ ਪਹੁੰਚਿਆ ਹੈ। ਮੱਧ ਪ੍ਰਦੇਸ਼ ਦੇ ਸ਼ਯੋਪੁਰ ਜ਼ਿਲ੍ਹੇ ਸਥਿਤ ਕੁਨੋ ਨੈਸ਼ਨਲ ਪਾਰਕ ਇਨ੍ਹਾਂ 12 ਚੀਤਿਆਂ ਨੂੰ ਛੱਡਿਆ ਜਾਵੇਗਾ। ਇਨ੍ਹਾਂ ਚੀਤਿਆਂ ਦੇ ਪਹੁੰਚਣ ਨਾਲ ਇਸ ਕੁਨੋ ਨੈਸ਼ਨਲ ਪਾਰਕ ‘ਚ ਚੀਤਿਆਂ ਦੀ ਗਿਣਤੀ ਵਧ ਕੇ 20 ਹੋ ਜਾਵੇਗੀ।
ਗਲੋਬਮਾਸਟਰ ਸੀ-17 ਜਹਾਜ਼ 12 ਚੀਤਿਆਂ ਨੂੰ ਲੈ ਕੇ ਭਾਰਤ ਪਹੁੰਚਿਆ ਹੈ। ਜਹਾਜ਼ ਨੇ ਗਵਾਲੀਅਰ ਹਵਾਈ ਅੱਡੇ ‘ਤੇ ਸਵੇਰੇ 10 ਵਜੇ ਲੈਂਡ ਕੀਤਾ। ਇਸ ਵਾਰ ਚੀਤਿਆਂ ਦੇ ਸਵਾਗਤ ਲਈ ਕੇਂਦਰੀ ਮੰਤਰੀ ਭੁਪਿੰਦਰ ਯਾਦਵ, ਨਰਿੰਦਰ ਸਿੰਘ ਤੋਮਰ ਅਤੇ ਮੁੱਖ ਮੰਤਰੀ ਸ਼ਿਵਰਾਜ ਚੌਹਾਨ ਪ੍ਰੋਗਰਾਮ ਵਿਚ ਹਿੱਸਾ ਲੈਣਗੇ। ਦੱਖਣੀ ਅਫ਼ਰੀਕਾ ਤੋਂ ਲਿਆਂਦੇ ਗਏ 12 ਚੀਤਿਆਂ ‘ਚ 7 ਨਰ ਅਤੇ 5 ਮਾਦਾ ਚੀਤੇ ਹਨ। ਇਸ ਤੋਂ ਪਹਿਲਾਂ ‘ਚੀਤਾ ਪੁਨਰਵਾਸ ਪ੍ਰੋਗਰਾਮ’ ਤਹਿਤ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਨਾਮੀਬੀਆ ਤੋਂ ਆਏ 8 ਚੀਤਿਆਂ ਨੂੰ ਪਿਛਲੇ ਸਾਲ 17 ਸਤੰਬਰ ਨੂੰ ਆਪਣੇ 72ਵੇਂ ਜਨਮ ਦਿਨ ਮੌਕੇ ਮੱਧ ਪ੍ਰਦੇਸ਼ ਦੇ ਕੁਨੋ ਨੈਸ਼ਨਲ ਪਾਰਕ ਦੇ ਇਕ ਬਾੜੇ ‘ਚ ਛੱਡਿਆ ਸੀ, ਜਿਨ੍ਹਾਂ ‘ਤ 5 ਮਾਦਾ ਅਤੇ 3 ਨਰ ਚੀਤੇ ਹਨ।
ਦਰਅਸਲ ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਨੇ ਜਨਵਰੀ ਵਿਚ ਅਫ਼ਰੀਕੀ ਦੇਸ਼ ਤੋਂ ਚੀਤਿਆਂ ਨੂੰ ਲਿਆਉਣ ਲਈ ਇਕ ਸਮਝੌਤਾ ਮੰਗ ਪੱਤਰ ‘ਤੇ ਦਸਤਖ਼ਤ ਕੀਤੇ ਸਨ। ਦੁਨੀਆ ਦੇ ਜ਼ਿਆਦਾਤਰ 7,000 ਚੀਤੇ ਦੱਖਣੀ ਅਫ਼ਰੀਕਾ, ਨਾਮੀਬੀਆ ਅਤੇ ਬੋਤਸਵਾਨਾ ‘ਚ ਰਹਿੰਦੇ ਹਨ। ਨਾਮੀਬੀਆ ‘ਚ ਚੀਤਿਆਂ ਦੀ ਸਭ ਤੋਂ ਵੱਧ ਆਬਾਦੀ ਹੈ। ਚੀਤਾ ਇਕਮਾਤਰ ਅਜਿਹਾ ਮਾਸਾਹਾਰੀ ਜੀਵ ਹੈ, ਜੋ ਕਿ ਵਧੇਰੇ ਸ਼ਿਕਾਰ ਅਤੇ ਆਵਾਸ ਦੀ ਕਮੀ ਕਾਰਨ ਭਾਰਤ ਤੋਂ ਪੂਰੀ ਤਰ੍ਹਾਂ ਲੁਪਤ ਹੋ ਗਿਆ ਹੈ।

Comment here