ਖਪਤਕਾਰਾਂ ਦੀ ਸਹੂਲਤ ਲਈ ਬਿੱਲ ਵੀ ਐਡਜਸਟ ਕਰੂ ਪਾਵਰਕਾਮ

ਪਟਿਆਲਾ-ਚੋਣ ਵਾਅਦਾ ਪੂਰਾ ਕਰਦਿਆਂ ਪੰਜਾਬ ਸਰਕਾਰ ਨੇ ਬੀਤੇ ਦਿਨ ਤੋਂ 300 ਯੂਨਿਟ ਮੁਫਤ ਬਿਜਲੀ ਸਕੀਮ ਲਾਗੂ ਕਰ ਦਿੱਤੀ ਹੈ। ਪਰ ਉਹ ਖਪਤਕਾਰ ਦੁਬਿਧਾ ਵਿੱਚ ਹਨ, ਜਿਨ੍ਹਾਂ ਦੇ ਬਿਜਲੀ ਮੀਟਰਾਂ ਦੀ ਰੀਡਿੰਗ 1 ਜੁਲਾਈ ਤੋਂ ਪਹਿਲਾਂ ਲਈ ਗਈ ਹੈ। ਉਦਾਹਰਨ ਵਜੋਂ, ਜਿਨ੍ਹਾਂ ਖਪਤਕਾਰਾਂ ਦੇ ਪਿਛਲੇ ਬਿੱਲ 17 ਜੂਨ ਦੀ ਮੀਟਰ ਰੀਡਿੰਗ ਦੇ ਆਧਾਰ ‘ਤੇ ਆਏ ਹਨ, ਉਨ੍ਹਾਂ ਦੇ ਨਵੇਂ ਬਿੱਲ ਹੁਣ 16 ਅਗਸਤ ਦੀ ਰੀਡਿੰਗ ਦੇ ਆਧਾਰ ‘ਤੇ ਬਣਾਏ ਜਾਣਗੇ। ਦੁਬਿਧਾ ਇਹ ਹੈ ਕਿ 17 ਜੂਨ ਤੋਂ 30 ਜੂਨ ਤਕ 14 ਦਿਨਾਂ ਦੀ ਮੀਟਰ ਰੀਡਿੰਗ ਨੂੰ ਨਵੇਂ ਬਿੱਲ ਤੋਂ ਕਿਵੇਂ ਵੱਖ ਕੀਤਾ ਜਾਵੇਗਾ। ਇਸ ਸਬੰਧੀ  ਪਾਵਰਕੌਮ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਇਸ ਸਬੰਧੀ ਪ੍ਰੋਰਾਟਾ ਫਾਰਮੂਲਾ ਅਪਣਾਇਆ ਜਾਵੇਗਾ। ਯਾਨੀ 60 ਦਿਨਾਂ ਦੀ ਬਿਜਲੀ ਦੀ ਖਪਤ ਦੀ ਔਸਤ ਇਕ ਦਿਨ ਦੀ ਖਪਤ ਤੈਅ ਹੋਵੇਗੀ। ਜੇਕਰ ਪੁਰਾਣਾ ਬਿੱਲ 17 ਜੂਨ ਦੀ ਰੀਡਿੰਗ ‘ਤੇ ਆਧਾਰਿਤ ਹੈ ਤਾਂ ਅਗਲੇ 60 ਦਿਨਾਂ ਲਈ ਵਰਤੀਆਂ ਜਾਣ ਵਾਲੀਆਂ ਕੁੱਲ ਯੂਨਿਟਾਂ ਨੂੰ 60 ਨਾਲ ਵੰਡ ਕੇ, ਇਕ ਦਿਨ ਲਈ ਬਿਜਲੀ ਦੀ ਔਸਤ ਖਪਤ ਕੱਢੀ ਜਾਵੇਗੀ। ਇਸ ਤੋਂ ਬਾਅਦ 17 ਤੋਂ 30 ਜੂਨ ਤਕ ਕੁੱਲ ਖਪਤ ਤੋਂ 14 ਦਿਨਾਂ ਲਈ ਬਿਜਲੀ ਦੀ ਖਪਤ ਨੂੰ ਕੱਟ ਕੇ 46 ਦਿਨਾਂ ਲਈ ਔਸਤ ਮੁਫ਼ਤ ਬਿਜਲੀ ਦੇ ਆਧਾਰ ‘ਤੇ ਨਵਾਂ ਬਿੱਲ ਬਣਾਇਆ ਜਾਵੇਗਾ। ਇਸ ਬਾਰੇ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਹੈ। ਜ਼ਿਕਰਯੋਗ ਹੈ ਕਿ ਪੰਜਾਬ ਵਿਧਾਨ ਸਭਾ ਚੋਣਾਂ ਦੇ ਪ੍ਰਚਾਰ ਦੌਰਾਨ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਸੱਤਾ ‘ਚ ਆਉਣ ‘ਤੇ ਪੰਜਾਬੀਆਂ ਨੂੰ ਮੁਫਤ ਬਿਜਲੀ ਦੇਣ ਦਾ ਐਲਾਨ ਕੀਤਾ ਸੀ। 1 ਜੁਲਾਈ 2022 ਤੋਂ ਇਸ ਐਲਾਨ ‘ਤੇ ਅਮਲ ਸ਼ੁਰੂ ਹੋ ਗਿਆ ਹੈ।