ਕੇਕੜੇ ਨੇ ਮਹਿਜ ਪੰਦਰਾਂ ਹਜ਼ਾਰ ਰੁਪਏ ਖਾਤਰ ਕੀਤੀ ਸੀ ਮੂਸੇਵਾਲਾ ਦੀ ਰੇਕੀ

ਮਾਨਸਾ-ਸਿੱਧੂ ਮੂਸੇਵਾਲਾ ਦੇ ਕਤਲ ਕੇਸ ਦੀਆਂ ਕੜੀਆਂ ਜੋੜਨ ਲੱਗੀ ਹੋਈ ਪੁਲਸ ਮੂਹਰੇ ਹਰ ਦਿਨ ਨਵੇਂ ਖੁਲਾਸੇ ਹੋ ਰਹੇ ਹਨ। ਇਕ ਹੈਰਾਨ ਕਰਨ ਵਾਲਾ ਖੁਲਾਸਾ ਹੋਇਆ ਹੈ ਕਿ ਸਿੱਧੂ ਮੂਸੇਵਾਲਾ ਦੇ ਕਤਲ ਤੋਂ ਪਹਿਲਾਂ ਕਰਵਾਈ ਰੇਕੀ ਲਈ ਸੰਦੀਪ ਕੇਕੜਾ ਨੇ ਸਿਰਫ 15 ਹਜ਼ਾਰ ਰੁਪਏ ਲਏ ਸਨ। ਸਿਰਸਾ ਜ਼ਿਲ੍ਹੇ ਦੇ ਪਿੰਡ ਕਾਲਾਂਵਾਲੀ ਦਾ ਮੁਲਜ਼ਮ ਸੰਦੀਪ ਸਿੰਘ ਉਰਫ਼ ਕੇਕੜਾ ਨਸ਼ੇ ਦਾ ਆਦੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਨਸ਼ੇ ਦੇ ਆਦੀ ਹੋਣ ਕਾਰਨ ਉਸ ਨੇ ਇਹ ਕੰਮ ਸਿਰਫ 15 ਹਜ਼ਾਰ ਰੁਪਏ ‘ਚ ਕੀਤਾ ਸੀ। ਉਸ ਦੇ ਪਰਿਵਾਰ ਅਤੇ ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਉਹ ਤਸਕਰੀ ਕਰਦਾ ਸੀ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਕੇਕੜੇ ਦਾ ਪਿਤਾ ਬਲਦੇਵ ਸਿੰਘ ਦਿਹਾੜੀਦਾਰ ਮਜ਼ਦੂਰ ਹੈ। ਬਲਦੇਵ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਉਸ ਦਾ ਲੜਕਾ ਨਸ਼ੇ ਦਾ ਆਦੀ ਸੀ ਅਤੇ ਉਸ ਦੀ ਕੁੱਟਮਾਰ ਵੀ ਕਰਦਾ ਸੀ ਅਤੇ ਇਕ ਵਾਰ ਉਸ ਨੂੰ ਘਰੋਂ ਕੱਢ ਦਿੱਤਾ ਸੀ। ਕੇਕੜੇ ਦਾ ਇੱਕ ਛੋਟਾ ਭਰਾ ਅਤੇ ਇੱਕ ਭੈਣ ਹੈ ਅਤੇ ਤਿੰਨੋਂ ਅਣਵਿਆਹੇ ਹਨ। ਪਿਤਾ ਨੇ ਦੱਸਿਆ ਕਿ ਉਨ੍ਹਾਂ ਦੇ ਰਿਸ਼ਤੇਦਾਰ ਮਾਨਸਾ ਦੇ ਪਿੰਡ ਮੂਸੇ ਵਿੱਚ ਸਨ ਅਤੇ ਇਸ ਲਈ ਕਦੇ-ਕਦਾਈਂ ਕੇਕੜਾ ਵੀ ਉੱਥੇ ਆ ਜਾਂਦਾ ਸੀ। ਪੁਲਿਸ ਸੂਤਰਾਂ ਨੇ ਪੁਸ਼ਟੀ ਕੀਤੀ ਕਿ ਕੇਕੜਾ ਮੂਸਾ ਪਿੰਡ ਗਿਆ ਸੀ ਅਤੇ ਉੱਥੇ ਆਪਣੀ ਮਾਸੀ ਦੇ ਘਰ ਠਹਿਰਿਆ ਸੀ। ਬਲਦੇਵ ਨੇ ਦੱਸਿਆ ਕਿ ਕੇਕੜਾ ਜ਼ਿਆਦਾਤਰ ਸਮਾਂ ਦੂਰ ਰਹਿੰਦਾ ਸੀ ਅਤੇ ਆਖਰੀ ਵਾਰ ਦੋ ਹਫ਼ਤੇ ਪਹਿਲਾਂ ਘਰੋਂ ਨਿਕਲਿਆ ਸੀ। ਸੂਤਰਾਂ ਨੇ ਦੱਸਿਆ ਕਿ ਕੇਕੜੇ ਦਾ ਭਰਾ ਵੀ ਅਪਰਾਧਿਕ ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਸੂਤਰਾਂ ਨੇ ਦੱਸਿਆ ਕਿ ਸਿਰਸਾ ਜ਼ਿਲੇ ਦੇ ਤਖਤਮਲ ਪਿੰਡ ਦੇ ਨਿੱਕੇ  ਨਾਲ ਕੇਕੜਾ ਕਥਿਤ ਤੌਰ ‘ਤੇ ਮੂਸੇਵਾਲਾ ਕੋਲ ਪਹੁੰਚਿਆ ਸੀ ਅਤੇ ਹਮਲਾਵਰਾਂ ਨੂੰ ਸੂਚਿਤ ਕੀਤਾ ਸੀ, ਜਿਨ੍ਹਾਂ ਨੇ 29 ਮਈ ਨੂੰ ਉਸ ਨੂੰ ਗੋਲੀ ਮਾਰ ਦਿੱਤੀ ਸੀ। ਸੂਤਰਾਂ ਨੇ ਦੱਸਿਆ ਕਿ ਗੈਂਗਸਟਰਾਂ ਨੇ ਇਸ ਕੰਮ ਲਈ ਜਾਣਬੁੱਝ ਕੇ ਕੇਕੜਾ ਚੁਣਿਆ ਸੀ ਕਿਉਂਕਿ ਉਹ ਆਲੇ-ਦੁਆਲੇ ਤੋਂ ਵਾਕਫ਼ ਹੀ ਨਹੀਂ ਸੀ, ਸਗੋਂ ਆਸ-ਪਾਸ ਰਹਿਣ ਲਈ ਸੁਰੱਖਿਅਤ ਥਾਂ ਵੀ ਰੱਖਦਾ ਸੀ। ਪੁਲਿਸ ਨੇ ਕਿਹਾ ਕਿ ਉਹ ਲਗਭਗ 45 ਮਿੰਟ ਮੂਸੇਵਾਲਾ ਦੇ ਘਰ ਰਿਹਾ ਅਤੇ ਅਪਰਾਧ ਤੋਂ ਕੁਝ ਘੰਟੇ ਪਹਿਲਾਂ ਗਾਇਕ ਨਾਲ ਸੈਲਫੀ ਲਈ। ਦੋਵਾਂ ਨੇ ਘਰੋਂ ਨਿਕਲਦੇ ਹੀ ਹਮਲਾਵਰਾਂ ਨੂੰ ਸੂਚਨਾ ਦਿੱਤੀ, ਤੁਰੰਤ ਬਾਅਦ ਹੀ ਵਾਰਦਾਤ ਨੂੰ ਅੰਜਾਮ ਦੇ ਦਿੱਤਾ ਗਿਆ।