ਕਾਗਜ਼ ਰੱਦ ਹੋਣ ਤੇ ਟਾਵਰ ‘ਤੇ ਜਾ ਚੜ੍ਹਿਆ ਉਮੀਦਵਾਰ

ਝਾਂਸੀ –ਸੱਤਾ ਦਾ ਲਾਲਚ ਬੰਦੇ ਤੋਂ ਕੀ ਨਹੀਂ ਕਰਾਉਂਦਾ.. ਦੇਸ਼ ਦੇ ਪੰਜ ਵੱਖ-ਵੱਖ ਸੂਬਿਆਂ ‘ਚ ਵਿਧਾਨ ਸਭਾ ਚੋਣਾਂ ਚੱਲ ਰਹੀਆਂ ਹਨ। ਹਰ ਪਾਸੇ ਸਿਰਫ਼ ਚੋਣ ਚਰਚਾ ਹੀ ਚੱਲ ਰਹੀ ਹੈ। ਕੋਈ ਆਪਣੀ ਪਸੰਦ ਦਾ ਉਮੀਦਵਾਰ ਜਿੱਤਦਾ ਦੇਖਣਾ ਚਾਹੁੰਦਾ ਹੈ ਤੇ ਕੋਈ ਖੁਦ ਹੀ ਚੋੜ ਲੜਣਾ ਚਾਹੁੰਦਾ ਹੈ। ਅਜਿਹਾ ਹੀ ਇੱਕ ਮਾਮਲਾ ਉੱਤਰ ਪ੍ਰਦੇਸ਼ ਦੇ ਝਾਂਸੀ ਜ਼ਿਲ੍ਹੇ ਵਿੱਚ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਵਿਅਕਤੀ ਨੇ ਆਜ਼ਾਦ ਉਮੀਦਵਾਰ ਨਾਮਜ਼ਦਗੀ ਦਾਖ਼ਲ ਕੀਤੀ ਸੀ। ਪੜਤਾਲ ਦੌਰਾਨ ਉਸ ਦੇ ਨਾਮਜ਼ਦਗੀ ਪੱਤਰ ਰੱਦ ਕਰ ਦਿੱਤੇ ਗਏ। ਫਾਰਮ ਰੱਦ ਹੋਣ ਤੋਂ ਨਾਰਾਜ਼ ਉਮੀਦਵਾਰ ਮੋਬਾਈਲ ਟਾਵਰ ਉਤੇ ਚੜ੍ਹ ਗਿਆ ਤੇ ਹੰਗਾਮਾ ਕਰਨ ਲੱਗਾ। ਇਸ ਸਬੰਧੀ ਜਦੋਂ ਸਥਾਨਕ ਪੁਲਿਸ ਨੂੰ ਸੂਚਨਾ ਮਿਲੀ ਤਾਂ ਉਹ ਮੌਕੇ ’ਤੇ ਪਹੁੰਚ ਗਏ ਤੇ ਨਾਰਾਜ਼ ਆਜ਼ਾਦ ਉਮੀਦਵਾਰ ਨੂੰ ਕਿਸੇ ਤਰ੍ਹਾਂ ਮਨਾ ਕੇ ਹੇਠਾਂ ਉਤਾਰਿਆ। ਇਸ ਆਜ਼ਾਦ ਉਮੀਦਵਾਰ ਦੀ ਪਛਾਣ ਪਵਨ ਯਾਦਵ ਉਰਫ਼ ਪਵਨ ਯਾਦਵ ਇੰਜੀਨੀਅਰ ਵਜੋਂ ਹੋਈ ਹੈ। ਦਰਅਸਲ ਉਸ ਨੇ ਝਾਂਸੀ ਸਦਰ ਤੋਂ ਵਿਧਾਨ ਸਭਾ ਸੀਟ ਤੋਂ ਆਜ਼ਾਦ ਉਮੀਦਵਾਰ ਵਜੋਂ ਨਾਮਜ਼ਦਗੀ ਦਾਖ਼ਲ ਕੀਤੀ ਸੀ। ਦੱਸਿਆ ਜਾਂਦਾ ਹੈ ਕਿ ਉਨ੍ਹਾਂ ਦਾ ਨਾਮਜ਼ਦਗੀ ਪੱਤਰ ਪੜਤਾਲ ਤੋਂ ਬਾਅਦ ਰੱਦ ਕਰ ਦਿੱਤਾ ਗਿਆ ਸੀ। ਇਸ ਨਾਲ ਉਹ ਬਹੁਤ ਗੁੱਸੇ ਵਿੱਚ ਆ ਗਿਆ ਅਤੇ ਮੋਬਾਈਲ ਟਾਵਰ ਉਤੇ ਚੜ੍ਹ ਗਿਆ। ਪਵਨ ਯਾਦਵ ਦਾ ਲੰਬੇ ਸਮੇਂ ਤੋਂ ਵਿਵਾਦਾਂ ਨਾਲ ਸਬੰਧ ਰਿਹਾ ਹੈ। ਉਹ ਪਿਛਲੇ ਦਿਨੀਂ ਜੇਲ੍ਹ ਵੀ ਜਾ ਚੁੱਕਾ ਹੈ। ਉਹ ਆਪਣੀ ਕਾਰ ਵਿੱਚ ਹੂਟਰ ਵਜਾ ਕੇ ਗੱਡੀ ਚਲਾਉਣ ਅਤੇ ਜ਼ਿਲ੍ਹੇ ਦੇ ਉੱਚ ਅਧਿਕਾਰੀਆਂ ਖ਼ਿਲਾਫ਼ ਇਤਰਾਜ਼ਯੋਗ ਟਿੱਪਣੀਆਂ ਕਰਨ ਕਾਰਨ ਵੀ ਸੁਰਖੀਆਂ ਵਿੱਚ ਰਿਹਾ ਹੈ।