ਏਸ਼ੀਆ ਕੱਪ-ਪਾਕਿ ਨੇ ਨੇਪਾਲ ਨੂੰ 238 ਦੌੜਾਂ ਨਾਲ ਹਰਾਇਆ

ਮੁਲਤਾਨ-ਏਸ਼ੀਆ ਕੱਪ ਦੀ ਸਭ ਤੋਂ ਵੱਡੀ ਜਿੱਤ ਭਾਰਤ ਨੇ 2008 ਵਿਚ ਹਾਂਗਕਾਂਗ ’ਤੇ (256 ਦੌੜਾਂ) ਦਰਜ ਕੀਤੀ ਸੀ। ਹੁਣ ਕਪਤਾਨ ਬਾਬਰ ਆਜ਼ਮ (151) ਤੇ ਇਫਤਿਖਾਰ ਅਹਿਮਦ (109 ਅਜੇਤੂ) ਦੇ ਧਮਾਕੇਦਾਰ ਸੈਂਕੜਿਆਂ ਦੀ ਬਦੌਲਤ ਪਾਕਿਸਤਾਨ ਨੇ ਏਸ਼ੀਆ ਕੱਪ-2023 ਦੇ ਉਦਘਾਟਨੀ ਮੈਚ ਵਿਚ ਬੁੱਧਵਾਰ ਨੂੰ ਨੇਪਾਲ ਨੂੰ 238 ਦੌੜਾਂ ਦੇ ਵੱਡੇ ਫਰਕ ਨਾਲ ਹਰਾ ਕੇ ਜੇਤੂ ਆਗਾਜ਼ ਕੀਤਾ। ਪਾਕਿਸਤਾਨ ਨੇ ਨੇਪਾਲ ਸਾਹਮਣੇ 343 ਦੌੜਾਂ ਦਾ ਵੱਡਾ ਟੀਚਾ ਰੱਖਿਆ, ਜਿਸ ਦੇ ਜਵਾਬ ਵਿਚ ਨੇਪਾਲ ਦੀ ਪੂਰੀ ਟੀਮ 23.4 ਓਵਰਾਂ ’ਚ 104 ਦੌੜਾਂ ’ਤੇ ਸਿਮਟ ਗਈ। ਬਾਬਰ ਨੇ ਆਪਣਾ 19ਵਾਂ ਵਨ ਡੇ ਸੈਂਕੜਾ ਲਾਉਂਦੇ ਹੋਏ 131 ਗੇਂਦਾਂ ’ਤੇ 14 ਚੌਕਿਆਂ ਤੇ 4 ਛੱਕਿਆਂ ਦੀ ਮਦਦ ਨਾਲ 151 ਦੌੜਾਂ ਬਣਾਈਆਂ, ਜਿਹੜਾ ਏਸ਼ੀਆ ਕੱਪ ’ਚ ਕਿਸੇ ਕਪਤਾਨ ਦਾ ਸਭ ਤੋਂ ਵੱਡਾ ਸਕੋਰ ਹੈ। ਬਾਬਰ ਇਸ ਦੇ ਨਾਲ ਹੀ ਸਭ ਤੋਂ ਘੱਟ ਪਾਰੀਆਂ (102) ਵਿਚ 19 ਵਨ ਡੇ ਸੈਂਕੜੇ ਲਾਉਣ ਵਾਲਾ ਬੱਲੇਬਾਜ਼ ਬਣ ਗਿਆ।
ਬਾਬਰ ਦੇ ਸਾਥੀ ਇਫਤਿਖਾਰ ਨੇ 71 ਗੇਂਦਾਂ ’ਚ 11 ਚੌਕੇ ਤੇ 4 ਛੱਕੇ ਲਾ ਕੇ ਅਜੇਤੂ 109 ਦੌੜਾਂ ਬਣਾਈਆਂ ਤੇ ਦੋਵਾਂ ਨੇ 5ਵੀਂ ਵਿਕਟ ਲਈ 214 ਦੌੜਾਂ ਦੀ ਸਾਂਝੇਦਾਰੀ ਬਣਾ ਕੇ ਨੇਪਾਲ ਦੇ ਗੇਂਦਬਾਜ਼ਾਂ ਨੂੰ ਚਿੱਤ ਕਰ ਦਿੱਤਾ। ਨੇਪਾਲ ਵੱਲੋਂ ਸੋਮਪਾਲ ਕਾਮੀ ਨੇ ਸਭ ਤੋਂ ਵੱਧ 28 ਦੌੜਾਂ ਬਣਾਈਆਂ ਜਦਕਿ ਆਰਿਫ ਸ਼ੇਖ ਨੇ 26 ਦੌੜਾਂ ਦੀ ਪਾਰੀ ਖੇਡੀ। ਟੀਮ ਦੇ 8 ਬੱਲੇਬਾਜ਼ ਦਹਾਈ ਦਾ ਅੰਕੜਾ ਵੀ ਨਹੀਂ ਛੂ ਸਕੇ। ਪਾਕਿਸਤਾਨ ਲਈ ਸ਼ਾਦਾਬ ਖਾਨ ਨੇ ਸਭ ਤੋਂ ਵੱਧ 4 ਵਿਕਟਾਂ ਜਦਕਿ ਸ਼ਾਹੀਨ ਅਫਰੀਦੀ ਤੇ ਹੈਰਿਸ ਰਾਊਫ ਨੂੰ 2-2 ਵਿਕਟਾਂ ਮਿਲੀਆਂ। ਨਸੀਮ ਸ਼ਾਹ ਤੇ ਮੁਹੰਮਦ ਨਵਾਜ਼ ਨੂੰ ਇਕ-ਇਕ ਵਿਕਟ ਹਾਸਲ ਹੋਈ। ਇਹ ਵਨ ਡੇਅ ਕ੍ਰਿਕਟ ਵਿਚ ਪਾਕਿਸਤਾਨ ਦੀ ਤੀਜੀ ਸਭ ਤੋਂ ਵੱਡੀ ਜਿੱਤ ਹੈ ਜਦਕਿ ਏਸ਼ੀਆ ਕੱਪ ਦੇ ਇਤਿਹਾਸ ਵਿਚ ਦੂਜੀ ਸਭ ਤੋਂ ਵੱਡੀ ਜਿੱਤ ਹੈ।