ਆਈਐਸ ਦੇ ਬੰਦੂਕਧਾਰੀਆਂ ਦਾ ਇਰਾਕੀ ਫੌਜੀ ਬੈਰਕਾਂ ਉੱਤੇ ਹਮਲਾ, 11 ਸੈਨਿਕਾਂ ਦੀ ਮੌਤ

ਬਗਦਾਦ- ਇਸਲਾਮਿਕ ਸਟੇਟ ਕੱਟੜਪੰਥੀ ਸਮੂਹ ਦੇ ਬੰਦੂਕਧਾਰੀਆਂ ਨੇ ਬੀਤੇ ਦਿਨੀ ਉੱਤਰੀ ਬਗਦਾਦ ਦੇ ਇੱਕ ਪਹਾੜੀ ਖੇਤਰ ਵਿੱਚ ਇੱਕ ਫੌਜੀ ਬੈਰਕ ਉੱਤੇ ਹਮਲਾ ਕਰ ਦਿੱਤਾ, ਜਿਸ ਵਿੱਚ 11 ਸੈਨਿਕਾਂ ਦੀ ਮੌਤ ਹੋ ਗਈ। ਹਮਲੇ ਦੇ ਸਮੇਂ ਜਵਾਨ ਸੌਂ ਰਹੇ ਸਨ। ਇਰਾਕੀ ਸੁਰੱਖਿਆ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਹਮਲਾ ਅਲ-ਅਜ਼ੀਮ ਜ਼ਿਲ੍ਹੇ ਵਿੱਚ ਹੋਇਆ, ਜੋ ਕਿ ਦਿਆਲਾ ਸੂਬੇ ਵਿੱਚ ਬਾਕੂਬਾਹ ਦੇ ਉੱਤਰ ਵਿੱਚ ਇੱਕ ਖੁੱਲ੍ਹੀ ਥਾਂ ਹੈ। ਹਮਲੇ ਬਾਰੇ ਵੇਰਵੇ ਅਜੇ ਉਪਲਬਧ ਨਹੀਂ ਹਨ। ਦੋ ਅਧਿਕਾਰੀਆਂ ਨੇ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਬੋਲਦਿਆਂ ਐਸੋਸੀਏਟਡ ਪ੍ਰੈਸ (ਏਪੀ) ਨੂੰ ਦੱਸਿਆ ਕਿ ਇਸਲਾਮਿਕ ਸਟੇਟ ਸਮੂਹ ਦੇ ਅੱਤਵਾਦੀ ਸਥਾਨਕ ਸਮੇਂ ਅਨੁਸਾਰ ਤੜਕੇ 3 ਵਜੇ ਦੇ ਕਰੀਬ ਬੈਰਕਾਂ ਵਿੱਚ ਦਾਖਲ ਹੋਏ ਅਤੇ ਸੈਨਿਕਾਂ ਨੂੰ ਗੋਲੀ ਮਾਰ ਕੇ ਮਾਰ ਦਿੱਤਾ। ਰਾਜਧਾਨੀ ਬਗਦਾਦ ਤੋਂ 120 ਕਿਲੋਮੀਟਰ (75 ਮੀਲ) ਉੱਤਰ ਵਿੱਚ ਇਹ ਹਮਲਾ ਹਾਲ ਹੀ ਦੇ ਮਹੀਨਿਆਂ ਵਿੱਚ ਇਰਾਕੀ ਬਲਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਸਭ ਤੋਂ ਘਾਤਕ ਹਮਲਿਆਂ ਵਿੱਚੋਂ ਇੱਕ ਹੈ।