ਅਫਗਾਨ ’ਚ ਤਾਲਿਬਾਨ ਸਰਕਾਰ ਤੋਂ ਖੁਸ਼ ਨੇ ਬਹੁਤੇ ਪਾਕਿਸਤਾਨੀ

 ਸਰਵੇਖਣ ਦੌਰਾਨ ਹੋਇਆ ਖੁਲਾਸਾ
ਇਸਲਾਮਾਬਾਦ-ਪਾਕਿਸਤਾਨ ਦੇ ਲੋਕ ਅਫਗਾਨਿਸਤਾਨ ’ਚ ਤਾਲਿਬਾਨ ਸਰਕਾਰ ਤੋਂ ਖੁਸ਼ ਹਨ। ਸੋਧ ਸੰਗਠਨ ਗੈਲਪ ਇੰਟਰਨੈਸ਼ਨਲ ਐਸੋਸੀਏਸ਼ਨ ਨਾਲ ਸਬੰਧਤ ਗੈਲਪ ਪਾਕਿਸਤਾਨ ਦੇ ਇਕ ਸਰਵੇਖਣ ਵਿਚ ਇਸ ਤੱਥ ਦਾ ਖੁਲਾਸਾ ਹੋਇਆ ਹੈ। ਸਰਵੇਖਣ ਦੇ ਤਹਿਤ 2400 ਤੋਂ ਵੱਧ ਲੋਕਾਂ ਨਾਲ ਇਸ ਸੰਬੰਧ ਵਿਚ ਰਾਏ ਲਈ ਗਈ ਅਤੇ ਉਹਨਾਂ ਤੋਂ ਪੁੱਛਿਆ ਗਿਆ ਕਿ ਕੀ ਤੁਸੀਂ ਅਫਗਾਨਿਸਤਾਨ ਵਿਚ ਤਾਲਿਬਾਨ ਸਰਕਾਰ ਦੇ ਗਠਨ ਤੋਂ ਖੁਸ਼ ਹੋ? ਨਤੀਜਿਆਂ ਮੁਤਾਬਕ ਤਾਲਿਬਾਨ ਸ਼ਾਸਨ ਨੂੰ ਲੈਕੇ 55 ਫੀਸਦੀ ਪਾਕਿਸਤਾਨੀਆਂ ਨੇ ਕਿਹਾ ਕਿ ਉਹ ਖੁਸ਼ ਹਨ ਅਤੇ 25 ਫੀਸਦੀ ਲੋਕਾਂ ਨੇ ਨਾਖੁਸ਼ੀ ਜਤਾਈ ਜਦਕਿ 20 ਫੀਸਦੀ ਨੇ ਕੋਈ ਪ੍ਰਤੀਕਿਰਿਆ ਨਹੀਂ ਦਿੱਤੀ। ਸੂਬਾ-ਪਾਰ ਵਿਸ਼ਲੇਸ਼ਣ ਵਿਚ ਪਾਇਆ ਗਿਆ ਕਿ ਤਾਲਿਬਾਨ ਸਰਕਾਰ ਲਈ ਸਭ ਤੋਂ ਵੱਧ ਸਮਰਥਨ ਖੈਬਰ-ਪਖਤੂਨਖਵਾ ਦੇ 65 ਫੀਸਦੀ ਲੋਕਾਂ ਨੇ ਜਤਾਇਆ। ਇਸ ਦੇ ਬਾਅਦ ਬਲੋਚਿਸਤਾਨ ਤੋਂ 55 ਫੀਸਦੀ ਅਤੇ ਪੰਜਾਬ ਅਤੇ ਸਿੰਧ ਤੋਂ 54 ਫੀਸਦੀ ਲੋਕਾਂ ਨੇ ਇਸ ਦੇ ਪੱਖ ਵਿਚ ਆਪਣੀ ਰਾਏ ਜਾਹਰ ਕੀਤੀ। ਸ਼ਹਿਰੀ ਆਬਾਦੀ ਵਿਚ 59 ਫੀਸਦੀ ਤਾਲਿਬਾਨ ਸਰਕਾਰ ਦੇ ਗਠਨ ਦੇ ਪੱਖ ਵਿਚ ਆਪਣਾ ਸਮਰਥਨ ਦਿੱਤਾ ਜਦਕਿ 20 ਫੀਸਦੀ ਨੇ ਕਿਹਾ ਕਿ ਉਹ ਇਸ ਨਾਲ ਨਾਖੁਸ਼ ਹਨ। ਉੱਥੇ ਪੇਂਡੂ ਆਬਾਦੀ ਵਿਚ 53 ਫੀਸਦੀ ਲੋਕ ਪੱਖ ਅਤੇ 28 ਫੀਸਦੀ ਵਿਰੋਧ ਵਿਚ ਰਹੇ। ਸਰਵੇਖਣ ਵਿਚ ਸ਼ਾਮਲ 58 ਫੀਸਦੀ ਪੁਰਸ਼ ਅਤੇ 36 ਫੀਸਦੀ ਬੀਬੀਆਂ ਨੇ ਮੰਨਿਆ ਕਿ ਉਹ ਅਫਗਾਨਿਸਤਾਨ ਵਿਚ ਤਾਲਿਬਾਨ ਸਰਕਾਰ ਦੇ ਗਠਨ ਤੋਂ ਖੁਸ਼ ਹਨ।